Mwa ku fumanela litaba ka bunolo

Mukete puo

Mu ye fa kalulo ya bubeli ya litaba ze li teñi

Mu ye kwa litaba za mwahali

Mu ye kwa litaba za mwahali

Lipaki za Jehova

Silozi

MUZUHE! APRIL 2014

 LINAHA NI BATU

Ku Potela Naha ya Cambodia

Ku Potela Naha ya Cambodia

MINZI ye cimbauka fahalimwaa mezi, misika ye patehile, ni mikwakwa ye tezi mitututu ye sweli ku lwala lika za mifuta-futa ku kalela kwa likuhu ku isa kwa mafriji—ze ki ze ñwi za lika ze mu ka bona ni milumo ye mu ka kutwa mwa libaka ze ñwi za mwa naha ya Cambodia.

Batu ba mwa naha ya Cambodia ba zibahala ka ku ba batu ba ba lilato, ba ba silikani, ili ba ba swalisana hahulu. Ha ba li hamoho ba kana ba itusisa malumbatina a cwale ka kaizelaa ka, ima, malume, kamba kuku, mane nihaiba ku mutu ye ba kopana ni yena lwapili!

Batu ba bañwi mwa naha ya Cambodia ba pila mwa mikolo, ba bañwi ba pila mwa mandu a yahilwe fa misumo, mi ba bañwi ba pila mwa mandu a yahilwe fa lika ze cimbauka. Mane ku na ni miyaho ye cwale ka likolo, lipatela, misika, ni libaka za ku nwiseza mafula (petrol stations) ze cimbauka fahalimu a mezi

Tolwana ye bizwa dragon fruit i ciwa hahulu mwa naha ya Cambodia

Laisi ki sico sa butokwa hahulu mwa naha ya Cambodia. Ka nako ya sico ku lukiswanga misulo ye milalu kamba ye mine, mi hañata ku banga ni mulo. Litapi li tabelwa hahulu. Hañata ku ciwanga lico ze munati, ze wawata, ni ze na ni lizwai ka nako ye swana.

Ibato ba lilimo ze 2000 kwamulaho, balekisi ba Masame ni batu ba bañwi ba ne ba yanga kwa naha ya China, ba kala ku potelanga hahulu libaka ze kwatuko  ni liwate mwa naha ya Cambodia ba nze ba cincanisa siliki ni lisipi ka lilungiso, mabala a nuka hande, manaka a litou, ni gauda. Kwa nalulelule, batu ba kwa naha ya Cambodia ba kala ku amuhela lizo za kwa naha ya India ni China, mi kacwalo bulapeli bwa Sihindu ni Sibuddha bwa tuma hahulu. Kacenu, palo ye bato fitelela 90 pesenti ya batu ba ba pila mwa naha ye, ki ba bulapeli bwa Sibuddha.

Lipaki za Jehova ba kutazanga kwa batu lushango lo lu fa sepo lwa mwa Bibele mwa naha ya Cambodia. Ba tusize batu ba bañata ka ku itusisa buka ye li, Bibele I Lutañi Luli? I fumaneha mwa lipuo ze bato ba ze 250 ku kopanyeleza cwalo ni puo ya si-Cambodia.

Batu ba ba fitelela 1,500 mwa naha ya Cambodia ba sweli ku ituta Bibele ni Lipaki za Jehova mi ba fumana likalabo kwa lipuzo ze cwale ka: “Ba ba shwile ba kai?” ni “Mulelo wa Mulimu ka za lifasi ki ufi?”

Buka ya Bibele I Lutañi Luli?, ye hatisizwe ki Lipaki za Jehova ya fumaneha mwa puo ya si-Cambodia (i bonisizwe fa).