Mwa ku fumanela litaba ka bunolo

Mukete puo

Mu ye fa kalulo ya bubeli ya litaba ze li teñi

Mu ye kwa litaba za mwahali

Mu ye kwa litaba za mwahali

Lipaki za Jehova

Silozi

Bibele Ilulutañi?

 KAUHANYO 18

Kana Naswanela Kuneela Bupilo Bwaka ku Mulimu ni Kukolobezwa?

Kana Naswanela Kuneela Bupilo Bwaka ku Mulimu ni Kukolobezwa?

1. Ki puzo mañi yemukana mwaipuza hamulaho wa kuituta buka ye?

MWA buka ye, muitutile litaba zeñata za niti za mwa Bibele, zecwale ka sepiso ya Mulimu ka za kupila kuya kuile, muinelo obali ku ona babashwile, ni sepiso ya zuho ya bafu. (Muekelesia 9:5; Luka 23:43; Joani 5:28, 29; Sinulo 21:3, 4) Mwendi mukalisize kufumanehanga kwa mikopano ya Lipaki za Jehova mi mulumela kuli Lipaki za Jehova ba mwa bulapeli bwa niti. (Joani 13:35) Mi mwendi mukalisize kuba ni silikani sesinde ni Jehova,  mi muikatulezi kuli muka musebeleza. Kacwalo, mukana mwaipuza kuli, ‘Nitokwa kuunga muhato mañi kuli nisebeleze Mulimu?’

2. Ki kabakalañi muuna wa Muetopia hanaabata kukolobezwa?

2 Ki mona mwanaaikutwezi muuna wa Muetopia cwalo, yanaapila mwa linako za Jesu. Nakonyana hamulaho wa zuho ya Jesu, Filipi mulutiwa wa Jesu naakutalize ku muuna yo. Filipi naakolwisize muuna yo kuli Jesu neli yena Mesia. Litaba zanaautwile muuna wa Muetopia yo, neli mufitile hahulu kwa pilu kuli mane honafo feela abulela kuli: “Bona! Mezi ki a; kiñi sesi nipalelwisa kukolobezwa?”—Likezo 8:26-36.

3. (a) Ki taelo mañi yanaafile Jesu kwa balateleli bahae? (b) Mutu uswanela kukolobezwa cwañi?

3 Bibele ibonisa hande fokusweu kuli haiba mubata kusebeleza Jehova, muswanela kukolobezwa. Jesu naabulelezi balutiwa bahae kuli: “Mulute batu ba macaba kaufela kuba balutiwa, mubakolobeze.” (Mateu 28:19) Jesu yena kasibili naatomile mutala ka kukolobezwa mwa mezi. Mubili wahae kaufela neunwelisizwe mwa mezi, naasika sasiwa feela mezi fa toho. (Mateu 3:16) Kacenu, Mukreste haakolobezwa, mubili wahae kaufela uswanela kunweliswa mwa mezi luli.

4. Mutu hakolobezwa ubonisañi kwa batu babañwi?

4 Mutu hakolobezwa, ubonisa fapilaa nyangela kuli luli ubata kuba mulikanaa Mulimu mi ubata kumusebeleza. (Samu 40:7, 8) Kacwalo, mukana mwaipuza kuli, ‘Niswanela kuezañi kuli nikolobezwe?’

KUBA NI ZIBO NI TUMELO

5. (a) Muswanela kuezañi pili musika kolobezwa kale? (b) Ki kabakalañi mikopano ya Sikreste haili ya butokwa?

5 Musika kolobezwa kale, muswanela kuziba pili Jehova ni Jesu. Mi mukalisize kueza cwalo ka kuituta Bibele.  (Mubale Joani 17:3.) Kono kueza cwalo hakusika likana. Bibele ibulela kuli muswanela ‘kutala zibo yenepahezi’ ya tato ya Jehova. (Makolose 1:9) Kufumaneha kwa mikopano ya Lipaki za Jehova kuka mitusa kuba ni silikani sesinde ni Jehova. Leo ki leliñwi la mabaka abonisa butokwa bwa kufumanehanga kamita kwa mikopano yeo.—Maheberu 10:24, 25.

Pili musika kolobezwa kale, muswanela kuituta Bibele

6. Mutokwa kuziba litaba zekuma kai za mwa Bibele pili musika kolobezwa kale?

6 Niteñi, Jehova haatokwi kuli muzibe lika kaufela ze mwa Bibele kuli mukone kukolobezwa. Jehova naasatokwi kuli muuna wa Muetopia azibe lika kaufela kuli akone kukolobezwa. (Likezo 8:30, 31) Mi mane lukazwelapili kuituta za Mulimu kuya kuile. (Muekelesia 3:11) Kono kuli mukolobezwe, mutokwa kuziba ni kulumela lituto za makalelo za mwa Bibele.—Maheberu 5:12.

7. Kuituta Bibele kumitusize cwañi?

7 Bibele ibulela kuli: “Hakusina tumelo hakukonahali kutabisa Mulimu.” (Maheberu 11:6) Kacwalo, mutokwa kuba ni tumelo pili musika kolobezwa kale. Bibele ilubulelela za batu babañwi bane bapila mwa muleneñi wa Korinte wa kwaikale, bane bautwile zene baluta balateleli ba Jesu, mi “bakala kulumela mi bakolobezwa.” (Likezo 18:8) Ka mukwa oswana, kuituta Bibele kumitusize kuba ni tumelo mwa lisepiso za Mulimu ni kusepa maata a sitabelo sa Jesu, sesikona kulupilisa kwa sibi ni lifu.—Joshua 23:14; Likezo 4:12; 2 Timotea 3:16, 17.

MUBULELELE BABAÑWI LITABA ZA NITI ZEMUITUTILE MWA BIBELE

8. Ki sika mañi sesika misusueza kubulelela babañwi litaba zemuitutile?

8 Hamunze muituta litaba zeñata ze mwa Bibele ni kubona moi mituseza mwa bupilo bwamina, tumelo yamina  ikatiya. Mukabata kubulelela babañwi zemuituta. (Jeremia 20:9; 2 Makorinte 4:13) Kono ki bo mañi bomuswanela kubulelela?

Kuba ni tumelo kuswanela kumisusueza kubulelela babañwi litaba zemulumela

9, 10. (a) Ki bo mañi bomukona kukalisa kutaluseza zemuitutile? (b) Muswanela kuezañi haiba mubata kukalisa kukutaza hamoho ni puteho?

9 Mukana mwatabela kutalusa litaba zemuituta kwa lubasi lwamina, balikani bamina, bomupila ni bona kamba bomubeleka ni bona. Mukaeza hande haiba mueza cwalo, feela mubonise sishemo ni lilato hamunze mueza cwalo. Nako hainze iya, mukakalisa kukutaza hamoho ni puteho. Ka nako yemuka ikutwa kuli muitukiselize kueza cwalo, mwakona kubulelela Paki yamiluta Bibele kuli mubata kukalisa kukutaza hamoho ni puteho. Haiba mutu yamiluta Bibele aikutwa kuli muitukiselize kueza cwalo, mi haiba mupila ka kulatelela likuka ze mwa Bibele, kukalukiswa kuli mina ni mutu yamiluta Bibele mukopane hamoho ni baana-bahulu ba mwa puteho.

10 Ki lika mañi zekaezahala kwa mukopano wo? Baana-bahulu bakaambola ni mina kuli babone haiba mwautwisisa ni kulumela lituto za makalelo za mwa Bibele, kubona haiba mwasebelisa zeibulela Bibele mwa bupilo bwamina bwa ka zazi ni zazi, ni kubona haiba luli mubata kuba yomuñwi wa Lipaki za Jehova. Muhupule kuli baana-bahulu bababalela mizwale ni likaizeli kaufela ba mwa puteho, kukopanyeleza cwalo ni mina, kacwalo musike mwasaba kuambola ni bona. (Likezo 20:28; 1 Pitrosi 5:2, 3) Hamulaho wa mukopano wo, baana-bahulu baka mizibisa haiba mwakona kukalisa kukutaza hamoho ni puteho.

11. Ki kabakalañi hakuli kwa butokwa hahulu kueza licinceho, pili musika kalisa kale kukutaza hamoho ni puteho?

11 Baana-bahulu bakana bamitaluseza kuli mutokwa kueza licinceho zeñwi pili musika kalisa kale kukutaza hamoho  ni puteho. Ki kabakalañi hakuli kwa butokwa hahulu kueza licinceho zeo? Kabakala kuli halubulelela babañwi ka za Mulimu, luyemela Jehova mi kacwalo luswanela kupila ka nzila yeemukutekehisa.—1 Makorinte 6:9, 10; Magalata 5:19-21.

MUBAKE MI MUSIKULUHE

12. Ki kabakalañi batu kaufela habatokwa kubaka?

12 Kunani nto yeñwi yemutokwa kueza, pili musika kolobezwa kale. Muapositola Pitrosi naabulezi kuli: “Mubake, mi musikuluhe ilikuli libi zamina litakulwe.” (Likezo 3:19) Kubaka kutalusañi? Kutalusa kuinyaza kabakala lika zemaswe zeluezize. Ka mutala, haiba nemupila ka buhule, uzibe mukatokwa kubaka. Mi nihaikaba kuli mulikile ka taata kueza zelukile mwa bupilo bwamina kaufela, musatokwa kubaka kabakala kuli kaufelaa luna lwaezanga sibi, mi lutokwa kukupa Mulimu kuli aluswalele.—Maroma 3:23; 5:12.

13. ‘Kusikuluha’ kutalusañi?

13 Kana kuikutwa feela bumaswe kabakala lika zemuezize kulikani? Batili. Pitrosi hape naabulezi kuli mutokwa ‘kusikuluha.’ Taba yeo italusa kuli mutokwa kutuhela kueza lika zemaswe zene muezanga ni kukala kueza lika zelukile. Ka mutala, luungeni kuli muya kwa sibaka sesiñwi semusa zibi. Hase muzamaile sibakanyana, mulemuha kuli kikale mulateha. Nemuka eza cwañi? Kusina kukakanya, mukayema hanyinyani, kusikuluha ni kuliba mwa nzila yeswanela. Ka mukwa oswana, hamunze muituta Bibele, mukana mwalemuha kuli kunani mikwa kamba lika zeñwi zemutokwa kucinca mwa bupilo bwamina. “Musikuluhe” kapili kamba mueze licinceho zetokwahala, mi mukalise kueza lika zelukile.

 MUEZE BUINEELO MINA BAÑI

Kana musepisize Jehova kuli muka musebeleza?

14. Mutu ukona kuineela cwañi ku Mulimu?

14 Muhato omuñwi wa butokwa omuswanela kuunga pili musika kolobezwa kale, ki kuineela ku Jehova. Mutu haineela ku Jehova, ulapela ku Jehova, mi mwa tapelo yeo umusepisa kuli ukasebeleza feela yena anosi, ni kuli kueza tato ya Jehova ikaba yona nto ya butokwa ka kufitisisa mwa bupilo bwahae.—Deuteronoma 6:15.

15, 16. Ki nto mañi yesusuezanga mutu kuineela ku Mulimu?

15 Kusepisa Jehova kuli mukasebeleza feela yena anosi, kuswana feela inge kusepisa mutu yomuñwi yomulata kuli mukapila ni yena mwa bupilo bwamina kaufela. Ka mutala, luungeni kuli muuna ni musali ba mwa libato. Muuna hanzaa ziba hande musali yo, ukafita fa kumulata hahulu mi ukabata kumunyala. Nihaike kuli kukena mwa linyalo ki buikalabelo bobutuna, muuna uikatulela kuunga muhato wo kabakala kuli wamulata.

16 Hamunze muituta ka za Jehova, mukafita fa kumulata mi mukabata kueza momukonela kaufela kuli mumusebeleze. Lilato leo lika misusueza kusepisa Mulimu mwa tapelo kuli muka musebeleza. Bibele ibulela kuli mutu kaufela yabata kulatelela Jesu uswanela ‘kuitoboha.’ (Mareka 8:34) Taba yeo italusañi? Italusa kuli kuutwa Jehova ki yona nto yeswanela kuba yapili mwa bupilo bwamina. Zabata Jehova kuli mueze ki za butokwa hahulu kufita lika zemutabela mina ni lika zemubata kueza.—Mubale 1 Pitrosi 4:2.

MUSIKE MWAIKALELWA KULI HAMUNA KUKONDISA

17. Ki kabakalañi batu babañwi habasa ezangi buineelo ku Jehova?

17 Batu babañwi habaezangi buineelo ku Jehova, ka libaka la kuli baikalelwanga kuli habana kukona kutaleleza  sepiso yabona ya kumusebeleza. Habalati kuswabisa Jehova, kamba mwendi baanga kuli haiba basaezi buineelo ku yena, habana kutokwa kuikalabela sesiñwi ku Jehova kabakala lika zebaeza.

18. Ki nto mañi yekona kumitusa kusasaba kuli mukapalelwa kusepahala ku Jehova?

18 Lilato lamina ku Jehova lika mitusa kusasaba kuli mukapalelwa kusepahala ku yena. Bakeñisa kuli mwamulata, mukaeza momukonela kaufela kutaleleza sepiso yamina ku yena. (Muekelesia 5:4; Makolose 1:10) Hamuna kunahana kuli kueza tato ya Jehova kutaata hahulu. Muapositola Joani naañozi kuli: “Kakuli se ki sona sekutalusa kulata Mulimu, kuli lumamele milao yahae; mi niteñi milao yahae haiimezi.”—1 Joani 5:3.

19. Ki kabakalañi hamusa tokwi kusaba kuineela ku Jehova?

19 Hamutokwi kuba babapetahalile kuli muineele ku Jehova. Haabatangi kuli lueze lika zelusa koni kueza. (Samu 103:14) Uka mitusa kueza lika zelukile. (Isaya 41:10) Musepe Jehova ka pilu yamina kaufela mi ‘ukalukisa linzila zamina.’—Liproverbia 3:5, 6.

BUINEELO BWA FAPILAA NYANGELA BOBULIBISA KWA PULUSO

20. Hase muezize buineelo ku Mulimu, ki muhato mañi omuswanela kuunga?

20 Kana muikutwa kuli muitukiselize kuineela ku Jehova? Hamuineela ku Jehova, mubonisa kuli muitukiselize kuunga muhato omuñwi. Muswanela kukolobezwa.

21, 22. Mukona kubonisa cwañi tumelo yamina “fapilaa nyangela?”

21 Muzibise muswalisanisi wa sitopa sa baana-bahulu mwa puteho yamina kuli muezize buineelo ku Jehova, mi mubata kukolobezwa. Mi yena ukalukisa  kuli baana-bahulu babañwi bakopane ni mina, kubona haiba mwautwisisa lituto za Bibele za makalelo. Haiba balemuha kuli mukwanisize zetokwahala, baka mitaluseza kuli mwakona kukolobezwa fa mukopano wa mupotoloho kamba mukopano omutuna wa Lipaki za Jehova. Kwa mukopano wo, kukaba ni ngambolo yekabulela zekutalusa kukolobezwa. Mubuleli wa ngambolo  yeo ukabuza bababata kukolobezwa lipuzo zebunolo zepeli. Ka kualaba lipuzo zeo, mukabonisa tumelo yamina “fapilaa nyangela.”—Maroma 10:10.

22 Mi kihona mukakolobezwa. Mubili wamina kaufela ukanweliswa mwa mezi. Kolobezo yamina ikabonisa batu  kaufela kuli muineezi ku Jehova, mi semuli yomuñwi wa Lipaki za Jehova.

KOLOBEZO YAMINA SEITALUSA

23. Kukolobezwa “ka libizo la Ndate ni la Mwana ni la moya okenile” kutalusañi?

23 Jesu naabulezi kuli balutiwa bahae nebaka kolobezwa “ka libizo la Ndate ni la Mwana ni la moya okenile.” (Mubale Mateu 28:19.) Taba yeo italusañi? Italusa kuli mutu yakolobezwa wautwisisa za bubusi bwa Jehova, za musebezi wafilwe kupeta Jesu ki Mulimu, mi wautwisisa kuli Mulimu uitusisanga moya wahae okenile kuli apete tato yahae.—Samu 83:18; Mateu 28:18; Magalata 5:22, 23; 2 Pitrosi 1:21.

Mutu haakolobezwa ubonisa kuli ubata kueza tato ya Mulimu

24, 25. (a) Kolobezo italusañi? (b) Lukanyakisisañi mwa kauhanyo ya mafelelezo a buka ye?

24 Kolobezo italusa nto yeñwi ya butokwa hahulu. Hamunweliswa mwa mezi kutalusa kuli mushwile kwa neku la bupilo bwamina bwakale kamba mutuhezi mupilelo wamina wakale. Hamuzwa mwa mezi, mukalisa bupilo bobunca bwa kueza tato ya Mulimu. Mubonisa kuli mukasebeleza Jehova kuzwa lizazi leo lemukolobezwa. Muhupule kuli hamusika eza buineelo bwamina ku mutu, kwa kopano kamba kwa musebezi. Muneezi bupilo bwamina ku Jehova.

25 Buineelo bwamina buka mitusa kuba ni silikani sesituna ni Mulimu. (Samu 25:14) Taba yeo haitalusi kuli mutu ukapunyuha kabakala kuli ukolobelizwe. Muapositola Paulusi naañozi kuli: “Muzwelepili kulwanela kupiliswa kwamina ka sabo ni likute lelituna.” (Mafilipi 2:12) Kolobezo ki yeñwi ya lika zapili zeluswanela kueza kuli lupiliswe. Kono mukona kuba cwañi bukaufi ni Jehova? Kauhanyo ya mafelelezo a buka ye, ikaalaba puzo yeo.