Mu ye kwa litaba za mwahali

Mu ye fa kalulo ya bubeli ya litaba ze li teñi

Mu ye kwa litaba za mwahali

Lipaki za Jehova

Silozi

Mwa Kona ku ba ni Tabo Mwa Lubasi

 KALULO 1

Mu Kupe Mulimu Kuli A mi Tuse ku ba ni Tabo Mwa Linyalo

Mu Kupe Mulimu Kuli A mi Tuse ku ba ni Tabo Mwa Linyalo

“Yena ya na ba bupile kwa makalelo naa ba bupile ba li muuna ni musali.”—Mateu 19:4

Jehova * Mulimu naa tomile linyalo la pili. Bibele i lu bulelela kuli Mulimu naa bupile musali wa pili mi “a mu tisa ku Adama.” Adama naa tabile hahulu kuli mane a bulela kuli: “Cwale, yena yo, ki lisapo la masapo a ka, ki nama ya nama ya ka.” (Genese 2:22, 23) Jehova u sa bata kuli batu ba ba nyalani ba be ni tabo.

Ha mu kena mwa linyalo, mwendi mu ka nahana kuli lika kaufela li ka zamaya feela hande. Nihakulicwalo, nihaiba bo muuna ni musali ba ba nyalani ili ba ba latana hahulu, ba ka kopana ni matata. (1 Makorinte 7:28) Mwa broshuwa ye, mu ka fumana likuka za mwa Bibele zeo haiba mu li sebelisa, za kona ku mi tusa ku ba ni tabo mwa linyalo kamba mwa lubasi lwa mina.—Samu 19:8-11.

 1 MU AMUHELE BUIKALABELO BWA MI FILE JEHOVA

ZE I BULELA BIBELE: Muuna ki yena toho ya lubasi.—Maefese 5:23.

Haiba mu nyezi, Jehova u bata kuli mu babalele bo musalaa mina ka lilato. (1 Pitrosi 3:7) Jehova naa ezize bo musalaa mina kuli ba be batusi ba mina mi u bata kuli mu ba kuteke ni ku ba lata. (Genese 2:18) Mu swanela ku lata hahulu bo musalaa mina kuli mane mu swanela ku tabela ku eza ze ba bata bona pili mu si ka eza kale ze mu bata mina.—Maefese 5:25-29.

Haiba mu nyezwi, Jehova u bata kuli mu kuteke hahulu bo muunaa mina ni kuli mu ba tuse ku peta buikalabelo bo ba filwe. (1 Makorinte 11:3; Maefese 5:33) Mu latelele likatulo ze ba eza mi mu swalisane ni bona ka ku tala. (Makolose 3:18) Ha mu eza cwalo, mu ka latwa hahulu ki bo muunaa mina mi ni Jehova u ka mi lata.—1 Pitrosi 3:1-6.

ZE MU KONA KU EZA:

  • Mu buze bakumina kuli ki lika mañi ze mu tokwa ku eza kuli mu be muuna yo munde kamba musali yo munde. Mu teeleze ka tokomelo ku ze ba mi bulelela mi mu like ka taata ku eza licinceho

  • Mu be ni pilu-telele. Ku ka nga nako ye telele kuli mañi ni mañi wa mina a eze lika ze ka tabisa yo muñwi

2 MU BONISE LULI KULI MWA IYAKATWA MAIKUTO A BAKUMINA

ZE I BULELA BIBELE: Mu swanela ku isa pilu kwa lika ze tabisa bakumina. (Mafilipi 2:3, 4) Mu nge bakumina kuli ki ba butokwa ka ku hupulanga kuli Jehova u bata kuli batanga ba hae ba be ba ba “bunolo kwa batu kaufela.” (2 Timotea 2:24) “Yo muñwi ha bulela, manzwi a hae a taba sina mukwale; kono mulomo wa ya butali u wisa pilu.” Kacwalo mu ketange manzwi a ku itusisa ha mu bulela. (Liproverbia 12:18) Moya wa Jehova u ka mi tusa kuli mu bulele ka musa ni ka lilato.—Magalata 5:22, 23; Makolose 4:6.

ZE MU KONA KU EZA:

  • Mu lapele kuli mu si ke mwa fela pilu ni ku kupa Mulimu kuli a mi tuse ku nahanisisa ze mu ka bulela pili mu si ka ambola kale taba ye ñwi ya butokwa ni bakumina

  • Mu nahane hande ka za lika ze mu ka bulela ni mo mu ka li bulelela

 3 MU LUMELELANANGE MWA LIKA

ZE I BULELA BIBELE: Ha mu kena mwa linyalo, mu ba “nama i liñwi” ni bakumina. (Mateu 19:5) Nihakulicwalo, ha mu mutu a li muñwi kono mwa shutana ni bakumina mi mwendi mibonelo ya mina ya shutana. Kamukwaocwalo, mu swanela ku lumelelananga mwa mihupulo ni mwa maikuto. (Mafilipi 2:2) Ku swalisana ki kwa butokwa hahulu ha mu eza likatulo. Bibele i bulela kuli: “Milelo i tiiswa ki ku elezana.” (Liproverbia 20:18) Mu tuhelele likuka za mwa Bibele kuli li mi etelele ha mu nze mu eza likatulo za butokwa ni bakumina.—Liproverbia 8:32, 33.

ZE MU KONA KU EZA:

  • Mu taluseze bakumina mo mu ikutwela mu si ke mwa ba taluseza feela litaba ze ñwi kamba mo mu ngela lika

  • Mu buzange bakumina pili mu si ka eza kale nto ye ñwi

^ par. 4 Jehova ki libizo la Mulimu sina mo ku taluselizwe mwa Bibele.

Muitute Zeñata

TAWALA YA MULIBELELI

Baana ba ba Nyezi—Mu Babalele Basali ba Mina

Lubasi lwa kona ku babalelwa hande kwa neku la kwa mubili kono inze lu sa babalelwi ka nzila ya butokwa ka ku fitisisa.