Mwa ku fumanela litaba ka bunolo

Mukete puo

Mu ye fa kalulo ya bubeli ya litaba ze li teñi

Mu ye kwa litaba za mwahali

Mu ye kwa litaba za mwahali

Lipaki za Jehova

Silozi

Mwa Kona ku ba ni Tabo Mwa Lubasi

 KALULO 3

Mwa ku Tatululela Matata

Mwa ku Tatululela Matata

“Mu latane ka lilato le lituna yo muñwi ku yo muñwi, kakuli lilato li kwahela libi ze ñata.”—1 Pitrosi 4:8

Mina ni bakumina ha mu kalisa bupilo bwa mina mwa linyalo, mu ka kopana ni matata a shutana-shutana. Mwendi matata ao, a ka ba teñi bakeñisa kuli mu ka nga lika ka ku shutana, maikuto a mina ha na ku swana, mi mu ka ba ni mubonelo o shutana ka za bupilo. Kamba mwendi matata a kona ku tahiswa ki batu ba bañwi ni likezahalo ze ñwi ze ne si ka libelelwa.

Mwa kona ku nahana kuli ha mu na ku kopananga ni miinelo ye taata mwa linyalo la mina, kono Bibele i lu bulelela kuli lu swanela ku tatululanga matata a luna. (Mateu 5:23, 24) Mu ka tatululanga hande matata a mina haiba mu sebelisa likuka za mwa Bibele.

 1 MU AMBOLISANE ZA BUTATA BO MU TALIMANA NI BONA

ZE I BULELA BIBELE: “Ku na ni nako . . . ya ku bulela.” (Muekelesia 3:1, 7) Mu bone teñi kuli mwa tanda nako ye ñata ya ku ambolisana za butata bo. Mu bulelele bakumina mo mu ikutwela luli ni mo mu ngela butata bo. Mu bulelelange bakumina niti ka nako kaufela. (Maefese 4:25) Nihaikaba kuli sibeli sa mina mu halifile hahulu, mu si ke mwa lwana. Ku bulela ka bunolo ku kona ku tahisa kuli mu ikambote hande ili nto ye ka tahisa kuli mu si ke mwa lwana ni bakumina.—Liproverbia 15:4; 26:20.

Nihaikaba kuli ha mu lumelelani fa taba ye ñwi, mu bonise sishemo, mi mu late ni ku kuteka bakumina. (Makolose 4:6) Mu like ku tatululanga butata kapili-pili, mi mu si ke mwa tuhela ku bulelisana.—Maefese 4:26.

ZE MU KONA KU EZA:

  • Mu tome nako ye swanela ya ku ambolisananga za butata bo

  • Haiba ki nako ya mina ya ku teeleza, mu si ke mwa kauleza bakumina ha ba nze ba bulela. Ni mina mu ka ba ni kolo ya mina ya ku bulela.

 2 MU TEELEZE MI MU UTWISISE

ZE I BULELA BIBELE: “Mu latane yo muñwi ni yo muñwi ka lilato la mizwale. Mwa ku fanana likute mu be ba pili.” (Maroma 12:10) Mu swanela ku teelezanga ka tokomelo. Mu like ku utwisisa mubonelo wa bakumina inze ‘mu utwelana butuku ni ku bonisa buikokobezo.’ (1 Pitrosi 3:8; Jakobo 1:19) Mu si ke mwa ipumisa inge kuli mwa teeleza. Haiba kwa konahala, mu tuhele ze mu eza kaufela, mu ise hahulu pilu ku bakumina, mi mu ba buze haiba kwa konahala kuli mu buisane taba yeo hasamulaho. Haiba mu nga bakumina kuli ki batusi ba mina isiñi balwanisi ba mina, ha mu na ku “halifa kapili.”—Muekelesia 7:9.

ZE MU KONA KU EZA:

  • Mu teeleze ku bakumina ka pilu ya mina kaufela nihaikaba kuli ze ba bulela ha li mi tabisi

  • Mu lemuhe sisupo mwa litaba ze ba bulela bakumina. Mu bone mo ba itusiseza lilama za mubili ha ba nze ba bulela, ni mo li utwahalela linzwi la bona

3 MU EZE ZE MU LUMELELANI

ZE I BULELA BIBELE: “Musebezi kaufela u na ni so ku fumanisa; kono ku buabua kwa mulomo ku isa kwa bubotana.” (Liproverbia 14:23) Ku lumelelana mwa ku tatululela hande butata bo buñwi ha ku si ka likana. Mu tokwa ku eza ze mu lumelelani. Kuli mu eze cwalo mu ka tokwa ku sebeza ka taata luli, kono ku ka ba ze nde ze ka zwa mwateñi. (Liproverbia 10:4) Haiba mu sebelisana hande ni bakumina, mu ka “fumana se situna kwa musebezi” wa mina.—Muekelesia 4:9.

ZE MU KONA KU EZA:

  • Mu bate linzila ze tusa ze mu ka latelela sibeli sa mina kuli mu tatulule butata bwa mina

  • Mu kuta-kutelange ku nyakisisa zwelopili ye bile teñi