Mwa ku fumanela litaba ka bunolo

Mukete puo

Mu ye fa kalulo ya bubeli ya litaba ze li teñi

Mu ye kwa litaba za mwahali

Mu ye kwa litaba za mwahali

Lipaki za Jehova

Silozi

Mwa Kona ku ba ni Tabo Mwa Lubasi

 KALULO 7

Mwa ku Lutela Mwanaa Mina

Mwa ku Lutela Mwanaa Mina

“Manzwi ao, e ni ku laela kacenu, a ine mwa pilu ya hao; mi u na ni ku a luta bana ba hao ka tokomelo.”—Deuteronoma 6:6, 7

Jehova ha naa tomile lubasi, naa file bashemi maata fahalimwaa bana ba bona. (Makolose 3:20) Ka ku ba bashemi, mu na ni buikalabelo bwa ku luta mwanaa mina kuli a late Jehova ni ku mu tusa kuli a yo ba mutu ya itingwa ha ka hula. (2 Timotea 1:5; 3:15) Hape mu swanela ku ziba ze mwa pilu ya mwanaa mina. Ku zwa fo, mu tokwa ku tomela mwanaa mina mutala o munde. Mwa kona ku luta hande mwanaa mina ka za Linzwi la Jehova haiba mina pili mu itebuha lona.—Samu 40:8.

 1 MU BE BA BA ATUMELEHA KWA BANA BA MINA

ZE I BULELA BIBELE: “U lukela ku ba ya teeleza kapili, ya sa akufi ku bulela.” (Jakobo 1:19) Mu bata kuli bana ba mina ba ikutwe ku lukuluha ha ba ambola ni mina. Bana ba mina ba swanela ku ziba kuli mwa tabela ku teeleza ku bona ha ba bata ku ambola ni mina. Mu bone teñi kuli mwa lubasi ku na ni kozo ilikuli bana ba mina ba lukuluhange ku talusa mo ba ikutwela. (Jakobo 3:18) Haiba bana ba mina ba ikutwa kuli mu na ni buhali kamba mwa ba atulanga, mwendi ha ba na ku lukuluha ha ba ambola ni mina. Mu be ni pilu-telele kwa bana ba mina mi mu kuta-kutelange ku ba kolwisa kuli mwa ba lata.—Mateu 3:17; 1 Makorinte 8:1.

ZE MU KONA KU EZA:

  • Mu si ke mwa ipatehisanga bana ba mina ha ba bata ku ambola ni mina

  • Mu ambolisanange ni bana ba mina ka nako ni nako, isiñi feela ha ba li mwa matata

2 MU LIKE KU UTWISISA ZE BA BULELA LULI

ZE I BULELA BIBELE: “Ya tokomela linzwi u ka konda.” (Liproverbia 16:20) Ka linako ze ñwi, mu ka tokwa ku lemuha luli ze ba talusa bana ba mina ha ba bulela mo ba ikutwela. Hañata ba banca ha ba bulela lika, ba shangelanga litaba kamba ba bulelanga lika ze si zona luli. “Ya alaba a si ka utwisisa pili, u iponisa bukuba.” (Liproverbia 18:13) Mu si ke mwa halifanga kapili.—Liproverbia 19:11.

ZE MU KONA KU EZA:

  • Mu si ke mwa kaulezanga bana ba mina ha ba bulela, kamba ku halifa hahulu ku si na taba ni ze ba bulela

  • Mu like ku hupula mo ne mu ikutwelanga ha ne mu sa li banana mi mu hupule lika ze ne mu nga ku ba za butokwa ku mina

 3 MU SEBELISANE HANDE NI BANA BA MINA

ZE I BULELA BIBELE: “Mwanaa ka, utwa ndataho ha ku laya, mi u si ke wa hanyeza maho h’a ku luta.” (Liproverbia 1:8) Jehova u file bashemi maata fahalimwaa bana ba bona. Mu swanela ku luta bana ba mina kuli ba mi kuteke ni ku mi utwa. (Maefese 6:1-3) Bana ba kona ku ziba haiba bashemi ha ba ‘swalisani hande hamoho ka munahano u li muñwi.’ (1 Makorinte 1:10) Haiba mu shelana ni bakumina, mu si ke mwa bonisa kuli mu shelani fapilaa bana ba mina kakuli ku eza cwalo ku ka tahisa kuli bana ba mina ba si ke ba mi kuteka.

ZE MU KONA KU EZA:

  • Mu ambolisane ka mo mu ka kalimelanga bana ba mina

  • Haiba mina ni bakumina mu na ni mubonelo o shutana ili wa mo mu swanela ku lutela bana ba mina, mu like ku utwisisa mubonelo wa bakumina

 4 MU BE NI MULELO

ZE I BULELA BIBELE: “Luta mwana nzila ya swanezi ku zamaya.” (Liproverbia 22:6) Ku luta mwana ka swanelo ha ku koni ku itahela feela. Mu swanela ku ziba mo mu ka lutela bana ba mina, mi mu swanela ku ziba mo mu ka ba felanga kalimelo. (Samu 127:4; Liproverbia 29:17) Ku kalimela ha ku talusi feela ku fa mutu koto, kono ku ama ku tusa bana ku utwisisa libaka ha mu tomile milao yeo. (Liproverbia 28:7) Ku zwa fo, mu lute bana ba mina ku lata Linzwi la Jehova ni ku ziba likuka ze mwateñi. (Samu 1:2) Ha mu ka eza cwalo, mu ka tusa bana ba mina ku ba ni lizwalo le li kenile.—Maheberu 5:14.

ZE MU KONA KU EZA:

  • Mu bone teñi kuli bana ba mina ba lemuha kuli Mulimu u teñi luli mi ba kona ku mu sepa

  • Mu tuse bana ba mina ku ziba ni ku ambuka lika ze kona ku ba tahiseza kuli ba eze sibi, inge cwalo lika ze fumaneha fa Intaneti. Mu ba lute ku ziba mwa ku ambukela batu ba ba tabela ku shengula banana

“Luta mwana nzila ya swanezi ku zamaya”

Muitute Zeñata

Mu Swanela ku Kalimela Cwañi Bana ba Mina?

Bibele i talusa lika ze taalu ze tusa mwa ku fa kalimelo ye sebeza.