Mu ye kwa litaba za mwahali

Mu ye fa kalulo ya bubeli ya litaba ze li teñi

Mu ye kwa litaba za mwahali

Lipaki za Jehova

Silozi

Mwa Kona ku ba ni Tabo Mwa Lubasi

 KALULO 5

Mo mu Kona ku Utwanela ni Bahabo Mina

Mo mu Kona ku Utwanela ni Bahabo Mina

“Mu apale . . . sishemo, buikokobezo, bunolo, ni pilu-telele.”—Makolose 3:12

Batu ha ba nyalana, ba ba lubasi lu lu luñwi. Nihaike kuli mu ka zwelapili ku lata ni ku kuteka bashemi ba mina, bakumina se li bona batu ba butokwa hahulu ka ku fitisisa ku mina fa lifasi. Ku kona ku ba taata ku bahabo mina ba bañwi ku lumela muinelo wo. Kono likuka za mwa Bibele za kona ku mi tusa ku ba ni buitikaneleli ilikuli mu zwelepili ku utwana ni bahabo mina ha mu nze mu lika ka taata ku swalisana hande ni bakumina.

 1 MU NGE BAHABO MINA KA NZILA YE SWANELA

ZE I BULELA BIBELE: “Kuteka ndataho ni maho.” (Maefese 6:2) Ku si na taba ni fo mu fita, mu swanela ku zwelapili ku kuteka bashemi ba mina. Hape mu swanela ku lemuha kuli bakeñisa kuli bakumina ba na ni bashemi, ba swanela ku iyakatwa bashemi ba bona. “Lilato ha li na muna,” kacwalo, mu si ke mwa bilaezwa ki swalisano ye ba na ni yona bakumina ni bahabo bona.—1 Makorinte 13:4; Magalata 5:26.

ZE MU KONA KU EZA:

  • Mu ambuke ku itusisanga lipulelo ze cwale ka “Bahabo mina kamita ba ni nga kuli ha ni na tuso” kamba “Bo ma mina ha ba tabelangi lika ze ni eza”

  • Mu nge lika mo ba li ngela bakumina

 2 MU BE NI BUNDUME HA KU TOKWAHALA

ZE I BULELA BIBELE: “Muuna u ka tokolomoha ndatahe ni mahe mi u ka kumalela musalaa hae; mi ba ka ba nama i liñwi feela.” (Genese 2:24) Ha mu kena mwa linyalo, bashemi ba mina ba kana ba ikutwa kuli ba sa na ni maata fahalimwaa mina, mi ba kana ba bata ku icocomeza mwa linyalo la mina.

Mina ni bakumina mu swanela ku lumelelana lika ze ba sa swaneli ku ikenya ku zona bashemi ba mina ze ama linyalo la mina mi mu zibise bashemi ba mina ka lilato za taba yeo. Mwa kona ku ba bulelela ka ku lukuluha ni ka ku nonga fa sisupo kono mu eze cwalo ka likute. (Liproverbia 15:1) Ku ba ni buikokobezo, bunolo, ni pilu-telele ku ka mi tusa ku ba ni swalisano ye nde ni bahabo mina mi mu ka zwelapili ku “swalelana ka lilato.”—Maefese 4:2.

ZE MU KONA KU EZA:

  • Haiba mu bilaela kuli bahabo ba icocomeza hahulu mwa linyalo la mina, mu ambole taba yeo ni bakumina ka nako ye mu si ka halifa kaufelaa mina

  • Mu lumelelane mo mu ka tatululela matata ao