Mu ye kwa litaba za mwahali

Mu ye fa kalulo ya bubeli ya litaba ze li teñi

Mu ye kwa litaba za mwahali

Lipaki za Jehova

Silozi

Mwa Kona ku ba ni Tabo Mwa Lubasi

 KALULO 6

Bupilo Bwa Mwa Linyalo mo bu Cincezanga ha mu ba ni Mbututu

Bupilo Bwa Mwa Linyalo mo bu Cincezanga ha mu ba ni Mbututu

“Bana ki saanda se si zwa ku Muñaa Bupilo.”—Samu 127:3

Batu ba ba nyalani ha ba ba ni mbututu, ba kona ku nyakalala kono hape ka nako ye swana mbututu yo u kona ku ba tahiseza mushimbo. Bakeñisa kuli se mu li bashemi, mwendi mu ka komoka kuli buñata bwa nako ya mina ni maata a mina li felela kwa ku babalela mbututu ya mina. Haiba mu sa lobali hande ni ku palelwa ku utwisisa licinceho ze ezahala, kwa kona ku ba ni matata mwa linyalo la mina. Mina ni bakumina mu ka tokwa ku eza licinceho kuli mu babalele mbututu ya mina ni ku sileleza linyalo la mina. Kelezo ya mwa Bibele i kona ku mi tusa cwañi ku talimana ni licinceho zeo?

 1 MU UTWISISE MO MBUTUTU A CINCEZA BUPILO BWA MINA

ZE I BULELA BIBELE: “Lilato li pilu-telele ni sishemo.” Hape lilato “ha li bati za lona feela, ha li filikani.” (1 Makorinte 13:4, 5) Bakeñisa kuli se mu li bo ma mbututu, mu ka isa pilu ku mwanaa mina ya sa zo pepwa. Kono bo muunaa mina ba kana ba kalisa ku ikutwa kuli ha mu ba isi pilu, kacwalo mu si ke mwa libala kuli ni bona ba tokwa kuli mu ba ise pilu. Ka pilu-telele ni musa, mwa kona ku tusa bakumina ku ikutwa kuli ki ba butokwa ni kuli ni bona ba tusa mwa ku babalela mwanaa mina.

“Ni mina baana, mu zwelepili ku pilisana ni bona ka kutwisiso” (1 Pitrosi 3:7) Mu utwisise kuli bo musalaa mina ba ka tandanga nako ye ñata inze ba li ni mwanaa mina. Bo musalaa mina ba na ni buikalabelo bo bunca, mi mwendi ba kana ba ikutwa ku imelwa, ku topwela, kamba mane ku lembwala. Mane fokuñwi, bo musalaa mina ba kona ku mi nyemela, kono mu si ke mwa fela pilu kakuli “ya sa halifi kapili, u fita sinata kwa maata.” (Liproverbia 16:32) Mu utwisise bo musalaa mina mi mu ba fe tuso ye ba tokwa.—Liproverbia 14:29.

ZE MU KONA KU EZA:

  • Bo ndate mbututu: Mu tuse bo musalaa mina ku babalela mbututu nihaiba ka nako ya busihu. Mu kusufaze kwa nako ye mu ezanga lika ze ñwi ilikuli mu tande nako ye ñata ni bo musalaa mina ni mbututu ya mina.

  • Bo ma mbututu: Bo muunaa mina ha ba bata ku mi tusa ka ku babalela mbututu, mu amuhele tuso yeo. Haiba kuli ha ba ezi hande musebezi wo, mu si ke mwa ba nyaza, kono mu ba bonise ka lilato mo ba swanela ku ezeza.

 2 MU TIISE SILIKANI SA MINA

ZE I BULELA BIBELE: “Ba ka ba nama i liñwi.” (Genese 2:24) Nihaike kuli se mu na ni mbututu mwa lubasi lwa mina, mu hupulange kuli mina ni bakumina mu sa li “nama i liñwi.” Mu eze mo mu konela kaufela kuli mu zwelepili ku tiisa silikani sa mina.

Basali ba ba nyezwi, mu itebuhange ku bakumina bakeñisa tuso ye ba mi fa. Ha mu itumela ku bo muunaa mina, mwa kona ku ba “wisa pilu.” (Liproverbia 12:18) Baana ba ba nyezi, mu bulelelange basali ba mina kuli mwa ba lata hahulu, ni kuli ki ba butokwa hahulu ku mina. Mu ba babazange bakeñisa mo ba babalelela lubasi.—Liproverbia 31:10, 28.

“Mutu ni mutu a si ke a ipatela se si swanela yena a nosi, kono a bate se si swanela yo muñwi.” (1 Makorinte 10:24) Mu ezezange bakumina lika ze ba tabela. Ka ku ba batu ba ba nyalani, mu bange ni nako ya ku ambola, ku babaza bakumina, ni ku teelezanga ku bakumina ha ba ambola. Mu si ke mwa timanga bakumina litukiso za kwa miseme. Mu ise pilu ku ze ba tokwa bakumina. Bibele i bulela kuli: “Mu si ke mwa timana, konji ha mu lumelelani ku eza cwalo ka nako ye tomilwe.” (1 Makorinte 7:3-5) Kacwalo, mu ambole ka ku lukuluha ni bakumina taba yeo. Haiba mu ba ni pilu-telele ni ku utwisisana, linyalo la mina li ka tiya.

ZE MU KONA KU EZA:

  • Mu fumanange nako ya ku ba hamoho ni bakumina

  • Mu ezange lika ze nyinyani ze ka tahisa kuli bakumina ba ikutwe ku latiwa, ze cwale ka ku ba lumela kashango kamba ku ba fa mponyana

 3 MU LUTE MBUTUTU YA MINA

ZE I BULELA BIBELE: “Ku zwa kwa bumbututu bwa hao u zibile mañolo a kenile, a kona ku ku talifisa kuli u piliswe.” (2 Timotea 3:15) Mu lele ze mu ka eza kuli mu lute mbututu ya mina. Mwanaa mina u na ni buikoneli bwa ku ituta, niha si ka pepwa kale. Mwanaa mina ha sa li mwa mba, wa kona ku ziba linzwi la mina ni ku eza lika sina mo mu ezeza mina. Mu balelange mwanaa mina ha sa li yo munyinyani. Nihaike kuli mwendi ha na ku utwisisa ze mu bala, ku eza cwalo kwa kona ku tusa mwanaa mina kuli ha ka hula a ikolange ku bala.

Taba ya kuli mwanaa mina ki mbututu, ha i koni ku tahisa kuli a palelwe ku utwa ha mu ambola za Mulimu. Mu bone teñi kuli mwanaa mina wa teeleza ha mu lapela ku Jehova. (Deuteronoma 11:19) Nihaiba ha mu bapala hamoho, mu ambolange za lika za ezize Mulimu. (Samu 78:3, 4) Mwanaa mina ha nze a hula, u ka lemuha kuli mwa lata Jehova mi ni yena u ka ituta ku lata Jehova.

ZE MU KONA KU EZA:

  • Mu kupe Jehova kuli a mi fe butali bo bu ka mi tusa ku luta mwanaa mina

  • Mu kuta-kutelange ku bulelela mbututu ya mina manzwi kamba mihupulo ye swana ilikuli a kalise ku ituta inze a sa li mwanana

Muitute Zeñata

MUZUHE!

Ku Hulisa Bana ba ba Musa Mwa Lifasi la Batu ba ba Itata

Mu nyakisise lika ze taalu ze kona ku mi tusa ku tusa bana ba mina ku ambuka moya wa buitati.