Mu ye kwa litaba za mwahali

Mu ye fa kalulo ya bubeli ya litaba ze li teñi

Mu ye kwa litaba za mwahali

Lipaki za Jehova

Silozi

Taba Yende Yezwa ku Mulimu!

 TUTO 9

Lubasi Lwamina Lukona Kuba Cwañi ni Tabo?

Lubasi Lwamina Lukona Kuba Cwañi ni Tabo?

1. Ki kabakalañi linyalo halili la butokwa kuli kubeni tabo mwa lubasi?

Taba yende izwa ku Jehova, yena Mulimu yatabile, mi ubata kuli mabasi abeni tabo. (1 Timotea 1:11) Mulimu ki yena musimululi wa linyalo. Linyalo leliezizwe ka mulao ki la butokwa kuli kubeni tabo mwa lubasi bakeñisa kuli litahisa mukunda mobakona kuhulisezwa bana. Bakreste habanyalana, baswanela kulatelela milao ya mwa silalanda sabona yeama linyalo.Mubale Luka 2:1, 4, 5.

Mulimu uunga cwañi linyalo? Ubata kuli linyalo mwahalaa muuna ni musali libe leliinelela. Jehova ubata kuli baana babanyezi ni basali babanyezwi basepahale ku mutu yebanyalani ni yena. (Maheberu 13:4) Mulimu utoile telekano. (Malaki 2:16) Niteñi, walumeleza Bakreste kulelekana ni kunyala kamba kunyalwa sinca haiba yomuñwi mwa linyalo aeza bubuki.Mubale Mateu 19:3-6, 9.

2. Batu babanyalani baswanela kupilisana cwañi?

Jehova naabupile baana ni basali kuli basebelisane hamoho mwa linyalo. (Genese 2:18) Ka kuba toho ya lubasi, muuna yanyezi uswanela kubabalela lubasi lwahae kwa mubili ni kuluta lubasi lwahae za Mulimu. Uswanela kulata hahulu musalaa hae. Batu babanyalani baswanela kulatana ni kukutekana. Bakeñisa kuli batu baba mwa linyalo kaufela habasika petahala, kuswalelana ki kwa butokwa hahulu kakuli kuka batusa kuba ni tabo.Mubale Maefese 4:31, 32; 5:22-25, 33; 1 Pitrosi 3:7.

3. Kana mwaswanela kusiya bakumina hakusina tabo mwa linyalo lamina?

Haiba mwa linyalo lamina kunani butata, mina ni bakumina mulike ka taata kubonisana lilato. (1 Makorinte 13:4, 5) Linzwi la Mulimu halisusuezi batu babanyalani kutatulula butata bobu mwa linyalo labona ka kukauhana.Mubale 1 Makorinte 7:10-13.

4. Mulimu ubata kuli mina bana mufumaneñi?

Jehova ubata kuli mubeni tabo. Umifa kelezo yende hahulu ya zemuswanela kueza kuli muikole bunca bwamina. Ubata kuli mutusiwe ki butali ni yeloseli ya bashemi bamina. (Makolose 3:20) Jehova hape ubata kuli mubeni tabo yetahiswa ki kusebeleza Mubupi wamina ni Mwanaa hae.Mubale Muekelesia 11:9–12:1; Mateu 19:13-15; 21:15, 16.

5. Bashemi, kiñi zebatokwa bana bamina kuli babeni tabo?

Muswanela kubeleka ka taata kuli mufumanele bana bamina lico, malobalo, ni liapalo. (1 Timotea 5:8) Kono kuli bana bamina babeni tabo, hape mutokwa kubaluta kulata Mulimu ni kuli baitute ku yena. (Maefese 6:4) Haiba mulata hahulu Mulimu, mukasusueza hahulu bana bamina kulata Mulimu. Haiba mulaela bana bamina ka kuitusisa Linzwi la Mulimu, bakahula hande.Mubale Deuteronoma 6:4-7; Liproverbia 22:6.

Bana batusiwanga haiba mubasusueza ni kubababaza. Hape batokwa kusikululwa ni kukalimelwa. Kuluta bana bamina ka nzila yeo kuka babukeleza kuli basike baeza lika zekona kubapalelwisa kuba ni tabo. (Liproverbia 22:15) Niteñi, kalimelo haiswaneli kufiwa ka buhali kamba ka situhu.Mubale Makolose 3:21.

Lipaki za Jehova bahatisa libuka zeshutana-shutana sihulu zeñolezwi kutusa bashemi ni bana. Litaba zeñozwi mwa libuka zeo lizwa mwa Bibele.Mubale Samu 19:7, 11.

 

Muitute Zeñata

MWA KONA KU BA NI TABO MWA LUBASI

Mu Kupe Mulimu Kuli A Mi Tuse ku ba ni Tabo Mwa Linyalo

Mu itusise lipuzo ze peli ze bunolo ze ka mi tusa ku tiisa linyalo la mina.

MWA KONA KU BA NI TABO MWA LUBASI

Mwa ku Tatululela Matata

Ku ba ni mubonelo o swanela ku kona ku tahisa kuli linyalo la mina li tiye mi ku be ni tabo ku fita ku ba ni linyalo le li fokola mo ku na ni matata.