Mwa ku fumanela litaba ka bunolo

Mukete puo

Mu ye fa kalulo ya bubeli ya litaba ze li teñi

Mu ye kwa litaba za mwahali

Mu ye kwa litaba za mwahali

Lipaki za Jehova

Silozi

Mukutele ku Jehova

 Kalulo 3

Haiba Lufoselizwe—Halunani ‘Libaka la Kutongoka’

Haiba Lufoselizwe—Halunani ‘Libaka la Kutongoka’

Bo Linda babulela kuli: “Kaizeli yomuñwi mwa puteho yaluna naanitamelelize kuli nenimuuzwelize masheleñi. Babañwi mwa puteho nebautwile taba yeo mi bakala kuyemela kaizeli yo. Hasamulaho wa nako, kaizeli yo aziba zeneezahahezi luli mi anitaluseza kuli naafosize kunitameleza kuli nenimuuzwelize. Nihaike kuli kaizeli yo naakupile swalelo, neniikutwile kuli hanina kukona kumuswalela bakeñisa bumaswe bwanaaniezize.”

KANA ni mina mubile ni butata bobuswana ni bwa bo Linda, bane baezizwe maswe ki mulumeli ka bona? Ka bumai, batu babañwi basitatalisizwe ki likezo za balumeli babañwi kuli mane batuhezi kueza hande kwa moya. Kana ni mina mubile ni butata bobucwalo?

Kana Kunani Mutu Yakona ‘Kulukauhanya Kwa Lilato la Mulimu’?

Kubulela feela niti, kukona kulubela taata kuswalela mulumeli ka luna yalufoselize. Kono kakuba Bakreste, luswanela kulatana. (Joani 13:34, 35) Haiba lufoselizwe ki mulumeli ka luna, lukona kuutwa hahulu butuku kwa pilu.—Samu 55:12.

Niti kikuli Bibele ibonisa kuli ka linako zeñwi, Bakreste babaanga ni ‘mabaka a kutongoka’ babañwi. (Makolose 3:13) Nihakulicwalo, haluipumana mwa muinelo ocwalo, kukona kulubela taata kuitiisa. Kana kunani nto yekona kulutusa? Munyakisise likuka zetaalu za mwa Mañolo:

Ndataa luna wa kwa lihalimu waziba lika kaufela. Jehova waziba lika kaufela zeezahala kuluna, kukopanyeleza cwalo ni lika zesika luka zelutalimana ni zona ni manyando elitahisa. (Maheberu 4:13) Kutuha fo, Jehova waikutwanga bumaswe halunyanda. (Isaya 63:9) Hatuhelelangi “ñalelwa kamba manyando,” kamba nto ifi kamba ifi, nihaiba yomuñwi wa batanga bahae ‘kulukauhanya kwa lilato’ lahae. (Maroma 8:35, 38, 39) Kacwalo, ni luna lusike lwatuhelela nto ifi kamba ifi nihaiba mutu ufi kamba ufi kulukauhanya ku Jehova.

Kuswalela hakutalusi kutuhelela bumaswe. Haluswalela babalufoselize, halunyinyafazi, kuyemela, kulumeleza, kamba kutuhelela likezo zabona zesika luka. Muhupule kuli Jehova nikamuta hatabiswangi ki sibi, kono waswalela hakunani libaka la kueza cwalo. (Samu 103:12, 13; Habakuki 1:13) Jehova halususueza kuswalela babañwi, ulukupa kuli lumulikanyise. Yena ‘hanyemeli mutu kuya kuile.’—Samu 103:9; Mateu 6:14.

Lwatuseha halusa buluki ndimbelela. Ka nzila ifi? Munyakisise muinelo olatelela: Munanula licwe lelibukitinyana, ni kuliswalelela inze muotolozi lizoho lamina. Mwendi hakuna kumibela taata kuliswala ka nako yekuswani. Kono kucwañi hane mukaliswalelela cwalo ka nako yetelele? Nemukazwelapili kuliswala ka nako yekuma kai, kana ki ka muzuzu ulimuñwi, ka hora, kamba kufitelela fo? Niti kikuli lizoho lamina likakatala hahulu, isiñi kabakala kuli licwe leo liekezehile kwa bukiti kono kabakala kuli mulisweli ka nako yetelele. Ki mona mokuinezi haiba  muba ni ndimbelela. Haluzwelapili kunyemela mutu, nihaiba kuli ki bunyemi bobunyinyani, lukazwelapili kuikutwisa hahulu butuku kwa pilu ni kufita. Ki lona libaka Jehova halususueza kuli luambuke ndimbelela. Niti kikuli, kuambuka ndimbelela kutusa luna ka sibili.—Liproverbia 11:17.

Kuambuka ndimbelela kutusa luna ka sibili

“Neniikutwile Inge Kuli Jehova ki Yena Yanaasweli Kuambola ni Na”

Ki nto mañi yenetusize bo Linda kuambuka ndimbelela hane baezizwe maswe ki mulumeli ka bona? Nto yeñwi yene batusize, neli kunahanisisa Mañolo abonisa libaka haluswanela kuswalela babalufoselize. (Samu 130:3, 4) Hape nto yenesusuelize hahulu bo Linda, ki kuziba kuli haluswalela babañwi, Jehova ni yena ukaluswalela. (Maefese 4:32–5:2) Litaba zeo neli bafitile hahulu kwa pilu kuli mane babulela manzwi a kuli: “Neniikutwile inge kuli Jehova ki yena yanaasweli kuambola ni na.”

Hamulaho wa nako, bo Linda nebakonile kuambuka ndimbelela. Nebaswalezi kaizeli yanaabafoselize, mi cwale kaizeli yo seli mulikanaa bona yomutuna. Bo Linda bazwezipili kusebeleza Jehova. Ni mina muikolwise kuli Jehova ubata kumitusa ka nzila yeswana.