Mwa ku fumanela litaba ka bunolo

Mukete puo

Mu ye fa kalulo ya bubeli ya litaba ze li teñi

Mu ye kwa litaba za mwahali

Mu ye kwa litaba za mwahali

Lipaki za Jehova

Silozi

Mu Lute Bana ba Mina

 TUTO 2

Rebeka Naa Bata ku Tabisa Jehova

Rebeka Naa Bata ku Tabisa Jehova

Rebeka ne li musali ya naa lata Jehova. Muunaa Rebeka ne li Isaka. Isaka ni yena naa lata Jehova. Rebeka naa zibani cwañi ni Isaka? Rebeka naa bonisize cwañi kuli naa bata ku tabisa Jehova? Ha lu kaleñi ka ku nyakisisa za Isaka, yena muunaa Rebeka.

Bashemi ba Isaka ne li bo Abrahama ni Sara. Ne ba pila mwa naha ya Kanana, ili mo ne ku pila batu ba ne ba sa lapeli Jehova. Kono Abrahama naa bata kuli mwanaa hae a nyale musali ya lapela Jehova. Kacwalo, a luma mutangaa hae, mwendi Eliezere kuli a yo batela Isaka musali kwa sibaka se si bizwa Karani ili ko ne ku pila bahabo Abrahama.

Rebeka naa itatezi ku sebeza ka taata kuli a ke mezi a ku fa likamele

Eliezere a funduka ni batanga ba bañwi ba Abrahama. Ko ne ba ya ne li kwahule luli. Ne ba zamaya ni likamele ze lishumi inze ba shimbile lico ni limpo. Eliezere naa ka ziba cwañi musali ya naa swanela ku ketela Isaka? Eliezere ni batanga ba bañwi ha se ba fitile kwa Karani, ba yema fa lisima kakuli Eliezere naa ziba kuli batu ne ba tuha ba taha kwa ku ka mezi. Eliezere a lapela ku Jehova mi a li: ‘Ha ni ka kupa kalibe kuli a ni fe mezi mi wa ni fa ni ku fa likamele za ka, ni ka ziba kuli yo ki yena musali yo ketile.’

Rebeka ya naa li kalibe a taha kwa lisima. Bibele i bulela kuli Rebeka ne li yo  munde hahulu. Eliezere a kupa Rebeka mezi a ku nwa mi Rebeka a alaba kuli: ‘Kaniti ni ka ku fa mezi mi hape ni ka fa ni likamele za hao mezi.’ U nahane feela taba yeo! Likamele ha li shwile linyolwa li nwanga mezi a mañata hahulu, kacwalo, Rebeka naa kuta-kutezi ku yo ka mezi kwa lisima. Kana wa bona mwa sebeleza Rebeka ka taata mwa siswaniso se si fa likepe 6?— Eliezere naa komokile mwa naa alabezi tapelo ya hae Jehova.

Eliezere a fa Rebeka limpo ze ñata ze nde. Rebeka a memela Eliezere ni batanga ba bañwi kwa ndu ya ndatahe. Eliezere a talusa libaka Abrahama ha naa mu lumile kwa sibaka seo ni mo Jehova naa alabezi tapelo ya hae. Lubasi lwa Rebeka ne lu tabela kuli Rebeka a nyalwe ku Isaka.

Rebeka a ya kwa Kanana ni Eliezere mi a yo nyalwa ku Isaka

Kana u nahana kuli Rebeka naa tabela ku nyalwa ku Isaka?— Rebeka naa ziba kuli Jehova ki yena ya naa lumile Eliezere. Kacwalo, lubasi lwa Rebeka lwa buza Rebeka haiba naa tabela ku ya kwa Kanana kuli a yo nyalwa ku Isaka. Rebeka a alaba kuli: ‘Eni, na lata ku ya.’ Honafo, Rebeka a ya ni Eliezere. Ha ba yo fita mwa Kanana, Rebeka a nyalwa ku Isaka.

Bakeñisa kuli Rebeka naa ezize za naa bata Jehova kuli a eze, Jehova naa mu fuyauzi. Hamulaho wa lilimo ze ñata, Jesu a pepelwa mwa lusika lwa Rebeka! Haiba u likanyisa Rebeka ni ku tabisa Jehova, ni wena u ka fuyaulwa ki yena.