Mu ye kwa litaba za mwahali

Mu ye fa kalulo ya bubeli ya litaba ze li teñi

Mu ye kwa litaba za mwahali

Lipaki za Jehova

Silozi

Bibele ya fa Intaneti | BIBELE YA TOLOKO YA LIFASI LELINCA

Zakaria 5:1-11

LITABA ZE MWAHALI

  • Pono 6: Muputo ofufa (1-4)

  • Pono 7: Sikotolo sa efa (5-11)

    • Musali yamwahali yabizwa Bumaswe (8)

    • Sikotolo siiswa kwa Shinari (9-11)

5  Hape natalima, mi nabona muputo ofufa.  Anibuza, ali: “Ubonañi?” Naalaba, nali: “Nibona muputo ofufa, oeza liñokolwa* ze 20 mwa butelele ni liñokolwa ze 10 mwa bupala.”  Cwale ali ku na: “Se ki sikuto sesiya mwa lifasi kaufela, kakuli mutu kaufela yauzwa,+ sina mokuñolezwi kwa lineku leliñwi la muputo, hasika fiwa koto; mi mutu kaufela yaitama ka kukonka,+ sina mokuñolezwi kwa lineku leliñwi la muputo, hasika fiwa koto.  ‘Ki na yasilumile,’ kubulela Jehova wa limpi, ‘mi sikakena mwa ndu ya lisholi ni mwa ndu ya mutu yaeza buitamo bwa buhata ka libizo laka; mi sikaina cwalo mwa ndu yeo ni kuisinya, mi sikasinya ni mabala ni macwe ayona.’”  Cwale lingeloi lene libulela ni na lataha mi lato li ku na: “Inuka, mi ubone sesifita.”  Kiha nibuza, nali: “Ki sika mañi?” Laalaba, lali: “Se ki sona sikotolo sa efa* sesifita.” Lazwelapili, lali: “Ki mona mobabonahalela cwalo mwa lifasi kaufela.”  Mi nabona kuli sikwahezo sa laundi sa loto sinanulezwi mwahalimu, mi nekunani musali yanaainzi mwa sikotolo.  Lingeloi kiha lili: “Musali yo uyemela bumaswe.” ­Kihona ­limunepela mwa sikotolo sa efa seo, mi hasamulaho lakwahela sikwahezo sa loto fa mulomo wa sikotolo.  Cwale natalima mi nabona basali bababeli babataha, mi nebafufa mwa mbyumbyulu. Mafufa abona naaswana ni mafufa a mbondwanyunyi. Mi bananulela sikotolo mwahalaa lifasi ni lihalimu. 10  Cwale nabuza lingeloi lene libulela ni na, nali: “Baisa kai sikotolo sa efa?” 11  Laalaba, lali: “Baisa sikotolo seo kwa naha ya Shinari*+ kuli bayo muyahela ndu; mi hase ilukisizwe, ukaiswa kwateñi mwa sibaka sa swanela kuba ku sona.”

Litaluso ze kwatasi

Ñokolwa neieza lisentimita ze 44.5 (mainci a 17.5). Mubone Litaba Zeekelizwe B14.
Linzwi ka linzwi, “efa,” ili kutalusa sikotolo kamba sizuma sene siitusiswa kwa kupimisa efa. Efa neli tikanyezo mone kukwana malita a 22. Mubone Litaba Zeekelizwe B14.
Fo kikuli, naha ya Babilona.