Mu ye kwa litaba za mwahali

Mu ye fa kalulo ya bubeli ya litaba ze li teñi

Mu ye kwa litaba za mwahali

Lipaki za Jehova

Silozi

Bibele ya fa Intaneti | BIBELE YA TOLOKO YA LIFASI LELINCA

Muekelesia 12:1-14

LITABA ZE MWAHALI

  • Uhupule Mubupi pili usika supala kale (1-8)

  • Manzwi a mafelelezo a mubuleli (9-14)

    • Manzwi a butali aswana sina likota zeshengile za kusotezisa mapulu (11)

    • Usabe Mulimu wa niti (13)

12  Cwalehe uhupule Mubupi wahao Yomutuna mwa mazazi a bunca bwahao,+ pili mazazi a liziyezi* asika taha kale,+ ni lilimo lisika fita kale haukali: “Hani litabeli”;  pili lizazi ni liseli ni kweli ni linaleli lisika unsufala kale,+ ni malu asika kuta kale, pula hase inelile;*  zazi lebaka kala kushekesha* balibeleli ba ndu, mi baana babatiile baobama, mi basali batuhela kusita kabakala kuli seli babanyinyani, mi basali babanangela mwa mahaulo bapalelwa kubona hande;+  muta likwalo zetalimezi kwa nzila likwaliwa, muta mulumo wa cika ufukuzeha, muta mutu azuswa ki mulumo wa nyunywani, mi bana kaufela babasizana baopelela lipina mwatasi.+  Hape mutu usabiswa ki libaka zelumbile, mi mwa nzila kunani zesabisa. Mi kota ya alumondi itubula lipalisa,+ mi mbimba yakotobana, ni muselo otahisa takazo ya kuca wapwaceha, kakuli mutu uzamaya alibile kwa ndu yahae ya kamita+ mi batu babalila bazamaya-zamaya mwa nzila;+  muhala wa silivera usika zwisiwa kale, ni mukeke wa kwiti wa gauda usika tubiwa kale, ni nkwana ye kwa ­liweluwelu isika pwaceha kale, ni liwili la kwa lisima lisika tubiwa kale.  Mi cwale liluli likutela mwa mubu,+ mona molizwile, mi moya* ukutela ku Mulimu wa niti yanaa ufanile.+  Mubuleli uli:+ “Halina tuso!* Lika kaufela halina tuso.”+  Mubuleli naanani butali mi hape naazwezipili kuluta batu litaba zanaaziba,+ mi anahanisisa ni kubatisisa ka tokomelo kuli akopanye* mashitanguti amañata.+ 10  Mubuleli abata kufumana manzwi atabisa+ ni kuñola manzwi anepahezi a niti. 11  Manzwi a bababutali aswana sina likota zeshengile za kusotezisa mapulu,+ mi manzwi abona kaufela aswana sina limapo zekokotezwi ka kutiya; azwa ku mulisana alimuñwi. 12  Mwanaka, haili ka za litaba zeñwi kwandaa ze, nikulemusa kuli: Libuka zeñolwa ki zeñata, halifeli, mi kulibala hahulu kukatalisa mubili.+ 13  Lika kaufela hase liutwilwe, mafelelezo a taba ki a: Usabe Mulimu wa niti+ mi umamele milao yahae,+ kakuli yeo ki yona swanelo kaufela ya mutu.+ 14  Kakuli Mulimu wa niti ukaatula likezo kaufela, ni lika kaufela zepatilwe, aliatule kuli ki zende kamba ki zemaswe.+

Litaluso ze kwatasi

Kamba “mazazi a likozi.”
Kamba mwendi, “malu haakuta ni pula.”
Kamba “kungangama.”
Kamba “maata a bupilo.”
Kamba “Ki za mbango.”
Kamba “akolohanye.”