Mwa ku fumanela litaba ka bunolo

Mukete puo

Mu ye fa kalulo ya bubeli ya litaba ze li teñi

Mu ye kwa litaba za mwahali

Mu ye kwa litaba za mwahali

Lipaki za Jehova

Silozi

Bibele ya fa Intaneti

BIBELE YA TOLOKO YA LIFASI LELINCA

Maroma 4:1-25

LITABA ZE MWAHALI

  • Abrahama naabizizwe kuba yalukile kabakala tumelo (1-12)

    • Abrahama, ndate wa babanani tumelo (11)

  • Sepiso iamuhelwa ka tumelo (13-25)

4  Hakulicwalo, lukali ki lika mañi zanaafumani Abrahama, yena kuku waluna ka sipepo?  Ka mutala, haiba Abrahama naabeilwe kuba yalukile kabakala misebezi, naakaba ni libaka la kuitumba, kono naasike aitumba ku Mulimu.  Kakuli liñolo libulelañi? “Abrahama naabile ni tumelo ku Jehova,* mi aangiwa kuba yalukile kabakala tumelo yahae.”+  Cwale ku mutu yasebeza, tuwelo yahae haiingiwi kuli ki kumushemuba, kono iingiwa sina nto yalukela kufiwa.*  Haili mutu yasasebezi kono ulumela ku Mulimu yabeya muezalibi kuba yalukile, tumelo yahae ibalwa kuli ki kuluka.+  Sina Davida ni yena mwabulelela za tabo ya mutu yabalwa ki Mulimu kuba yalukile kusina misebezi, haize:  “Tabo ki ya babaswalezwi likezo zabona zemaswe ni babakwahelezwi* libi zabona;  tabo ki ya mutu yo Jehova* haana kuhupula sibi sahae.”+  Cwale kana tabo ye itaha feela kwa batu babaile kwa mupato kamba itaha ni kwa batu babasika ya kwa mupato?+ Kakuli lubulela kuli: “Abrahama aangiwa kuba yalukile kabakala tumelo yahae.”+ 10  Cwale Abrahama naali cwañi tumelo yahae haibaliwa kuli ki kuluka? Kana nasaaile kwa mupato kamba naasika ya kale? Naasika ya kale kwa mupato. 11  Mi naaamuhezi sisupo+—ona mupato—sina liswayo la kuluka kabakala tumelo yanaanani pili asika ya kale kwa mupato, kuli ibe yena ndatahe batu kaufela babanani tumelo+ niha basika ya kwa mupato, ilikuli babaliwe kuba babalukile; 12  ni kuli ibe yena ndatahe bana babaile kwa mupato, isiñi feela ku babamamela mupato, kono ni ku babazamaya hande mwa mutala wa tumelo yanaanani yona ndataa luna Abrahama+ pili asikaya kale kwa mupato. 13  Kakuli sepiso ya kuyola saanda sa lifasi neisika fiwa ku Abrahama kamba bana* bahae kabakala mulao,+ kono neifilwe kabakala kuluka kokutiswa ki tumelo.+ 14  Kakuli haiba babamamela mulao ki bona babayola saanda, uzibe tumelo haisana tuso mi sepiso ifelisizwe. 15  Kakuli mane Mulao utahisa buhali bwa Mulimu,+ kono fokusina mulao, hakulobiwi mulao.+ 16  Ki lona libaka sepiso iezizwe ka tumelo, kuli ifiwe ka sishemo sa Mulimu,+ ili kutiisa sepiso yeo kwa bana* kaufela ba Abrahama,+ isiñi feela ku babamamela Mulao, kono ni ku babanani tumelo yeswana ni yanaanani yona Abrahama, yena ndataa luna kaufela.+ 17  (Kubile cwalo sina mokuñolezwi kuli: “Nikuketile kuba ndatahe macaba amañata.”)+ Fo neli fapilaa Mulimu, ili yo Abrahama naabonisize tumelo ku yena, yapilisa babashwile ni kubiza zesiyo inge kuli liteñi.* 18  Niha nekusina sepo, aba ni tumelo kabakala sepo yahae, kuli naakaba ndatahe macaba amañata kulikana ni sene sibulezwi, hane kuizwe: “Ni bana* bahao ki fona fobaka kuma kwa buñata.”+ 19  Mi nihaike naasika fokola mwa tumelo, anahana mubili wahae, one seuswana sina oshwile (kakuli naabato ba wa lilimo ze 100),+ ni kunahana Sara yanaafitelezi lilimo za kupepa.*+ 20  Kono kabakala sepiso ya Mulimu, naasika fokola ka kutokwa tumelo; kono atiya ka tumelo yahae, inzaa kanyisa Mulimu 21  mi naakozwi ka kutala kuli sanaasepisize Mulimu naakona hape kusieza.+ 22  Kabakaleo, “aangiwa kuba yalukile kabakala tumelo yahae.”+ 23  Kono manzwi a kuli, “tumelo yahae neibalezwi ku yena” naasika ñolwa kabakala hae anosi,+ 24  kono naañozwi ni kabakala luna, babaka baliwa kuba babalukile, kakuli lulumela ku Yena yanaazusize Mulenaa luna Jesu kwa bafu.+ 25  Naabulailwe kabakala lifoso zaluna+ mi naazusizwe kwa bafu kuli lubaliwe kuba babalukile.+

Litaluso ze kwatasi

Kamba “sina sikoloti.”
Kamba “babaswalezwi.”
Linzwi ka linzwi, “peu.”
Linzwi ka linzwi, “peu.”
Kamba mwendi, “kutahisa kuli lika zesiyo libeteñi.”
Linzwi ka linzwi, “peu.”
Kamba “yanaali mumba.”