Mwa ku fumanela litaba ka bunolo

Mukete puo

Mu ye fa kalulo ya bubeli ya litaba ze li teñi

Mu ye kwa litaba za mwahali

Mu ye kwa litaba za mwahali

Lipaki za Jehova

Silozi

Bibele ya fa Intaneti

BIBELE YA TOLOKO YA LIFASI LELINCA

Malaki 1:1-14

LITABA ZE MWAHALI

  • Lilato la Jehova kwa batu bahae (1-5)

  • Baprisita bafa matabelo asabonahali hande (6-14)

    • Libizo la Mulimu likaba lelituna mwahalaa macaba (11)

1  Lushango lolubuima: Ki le linzwi labulela Jehova ku Isilaele ka Malaki:*  “Nibonisize lilato ku mina batu,”+ kubulela Jehova. Kono muli: “Ulubonisize cwañi lilato?” “Kana Isau nesi mwanahabo Jakobo?”+ kubulela Jehova. “Kono nenilatile Jakobo,  mi nenitoile Isau;+ mi malundu ahae neni aezize matota+ ni kusiyela mawawa a mwa naheñi+ saanda sahae.”  “Edomo nihaali: ‘Lutubilwe, kono lukakuta, luyahe sinca zesinyehile,’ Jehova wa limpi sabulela ki se, uli: ‘Bakayaha, kono na, nikalutulula, mi bakabizwa kuli “naha ya bumaswe” ni “batu babahanilwe ki Jehova kuya kuile.”+  Meeto amina akabona taba yeo, mi mukali: “Jehova abubekwe mwa naha kaufela ya Isilaele.”’”  “‘Mwana ukuteka ndatahe,+ mi mutanga ukuteka mulenaa hae. Cwale haiba ni ndataa mina,+ likute leli niswanela+ likai? Mi haiba ni mulenaa* mina, ikai sabo* yeniswanela kusabiwa ka yona?’ ki sona sabulela Jehova wa limpi ku mina baprisita babashwaula libizo laka.+ “‘Kono muli: “Lushwauzi cwañi libizo lahao?”’  “‘Ka kutahisa lico* zesilafezi fa aletare yaka.’ “‘Mi muli: “Lukusilafalize cwañi?”’ “‘Ka kubulela kuli: “Tafule ya Jehova+ ki nto yenyazahala.”  Mi hamufa folofolo yeshwile meeto sina sitabelo, muli: “Hakusika fosahala.” Mi hamufa folofolo ya sihole kamba yekula, muli: “Hakusika fosahala.”’”+ “Shangwe, hamulike kufa lifolofolo zeo ku mubusisi wamina. Kikuli uka mitabela kamba kumiamuhela hande?” kubulela Jehova wa limpi.  “Mi cwale shangwe, hamukupe ku* Mulimu, kuli alushemube. Ka linubu zecwalo zezwa mwa lizoho lamina, kana ku mina kunani yakaamuhelwa hande ki yena?” kubulela Jehova wa limpi. 10  “Mi ki mañi ku mina yaitatela kukwala likwalo?*+ Kakuli hamukoni nihaiba kutukisa mulilo kwa aletare yaka musa lifisi.+ Hani mitabeli,” kubulela Jehova wa limpi, “mi hanitabeli mpo ifi kamba ifi yezwa mwa lizoho lamina.”+ 11  “Kakuli kuzwa kwa mapazulelo a lizazi kuya kwa malikelelo alona,* libizo laka likaba lelituna mwahalaa macaba.+ Mwa libaka kaufela kukaciswa matabelo, mi linubu likaezezwa libizo laka, sina mpo yekenile; kakuli libizo laka likaba lelituna mwahalaa macaba,”+ kubulela Jehova wa limpi. 12  “Kono mwalishwaula*+ ka kubulela kuli: ‘Tafule ya Jehova isilafezi, mi linubu zebeiwa fateñi, ni lico zayona, zanyazahala.’+ 13  Hape muli: ‘Hamubone! Ki nto yekatalisa!’ mi mununka fateñi ka kusheununa,” kubulela Jehova wa limpi. “Mi mutisa lifolofolo zeuzwizwe, za lihole, ni zekula. Ki cwalo, mutisa lika zecwalo sina mpo! Kikuli niiamuhele mwa lizoho lamina?”+ kubulela Jehova. 14  “Kukutiwe mutu wa bupumi, yanani folofolo yamuuna yeiketile, mwa mutapi wahae, kono ueza buitamo ni kufa Jehova sitabelo sa folofolo yenyazahala.* Kakuli na, ni Mulena yomutuna,”+ kubulela Jehova wa limpi, “mi libizo laka likatahisa sabo mwahalaa macaba.”+

Litaluso ze kwatasi

Lelitalusa “Numwana Waka.”
Kamba “mulena yomutuna.”
Kamba “likute.”
Linzwi ka linzwi, “sinkwa.”
Kamba “hamunolofaze pata ya.”
Kubonahala kuli sesitaluswa fo, ki likwalo za tempele, zenekwaliwanga ki yafilwe musebezi wo.
Kamba “kuzwa kwa upa kuya kwa wiko.”
Kamba mwendi, “mwanishwaula.”
Kamba “yesika iketa.”