Mwa ku fumanela litaba ka bunolo

Mukete puo

Mu ye fa kalulo ya bubeli ya litaba ze li teñi

Mu ye kwa litaba za mwahali

Mu ye kwa litaba za mwahali

Lipaki za Jehova

Silozi

Bibele ya fa Intaneti

BIBELE YA TOLOKO YA LIFASI LELINCA

Liproverbia 26:1-28

LITABA ZE MWAHALI

  • Mobataluselizwe bababuzwa (13-16)

  • Musike mwakena mwa kañi yesa miami (17)

  • Muambuke lishea la bukuba (18, 19)

  • Hakusina likota, mulilo watima (20, 21)

  • Manzwi a lisawana aswana sina buemba-emba bwa sico sesitabusa (22)

26  Sina litwa halisa swaneli mwa mbumbi ni pula ka nako ya kutulo, Ni likute haliswaneli mutu wa sitoto.+   Sina nyunywani haisa isabelangi feela ni kambimbi hakasa ifufelangi feela, Ni sikuto hasitahangi kusina libaka luli.*   Pafa iswanela pizi, tumo iswanela mbongolo,+ Mi tupa iswanela mikokoto ya batu ba litoto.+   Usike waalaba sitoto ka kuya ka bukuba bwasona, Kuli usike waswana ni sona.*   Alaba sitoto ka kuya ka bukuba bwasona, Kuli sisike sanahana kuli sibutali.+   Mutu yafa sitoto litaba zahae Uswana sina mutu yaipuma mahutu ni kuikolofaza.*   Lishitanguti le li mwa milomo ya batu ba litoto, Liswana sina mahutu a lihole afokola.*+   Kufa mutu wa sitoto kanya, Kuswana sina kutamelela licwe kwa kafwililo.+   Lishitanguti le li mwa milomo ya batu ba litoto, Liswana sina sicalo sa miutwa se si mwa lizoho la cakolwa. 10  Yakenya sitoto kamba lifitanzila musebezi, Uswana sina mutu yakunupa ka buta yaholofaza batu ka kukunupa-kunupa feela.* 11  Sina nja yekutela kwa mataza ayona, Sitoto ni sona sikutela kueza likezo zasona za bukuba.+ 12  Kana uboni mutu yanahana kuli ubutali?+ Mutu wa sitoto wasepisa kufita yena. 13  Yabuzwa uli: “Kunani tau yamwana mwa mukwakwa, Kunani tau mwa patelo!”+ 14  Sikwalo sikwendauka fa lisipi zeesisweli,* Mi yabuzwa ufetauha fa mumbeta wahae.+ 15  Yabuzwa ukenya lizoho lahae mwa mukeke wa lico, Kono ukatezi hahulu kuli mane hakoni nihaiba kulikutiseza kwa mulomo wahae.+ 16  Yabuzwa unahana kuli ubutali hahulu Kufita batu ba 7 babaalaba litaba za ngana. 17  Lifitanzila yafilikanywa ki* kañi yesa muami Uswana sina mutu yaswala nja kwa mazebe.+ 18  Sina sipulumuki sesikunupa masho a mulilo, ni masho, ni lifu,* 19  Kucwalo ni ku mutu yapuma mwanahabo yena, mi hasamulaho uli: “Nenieza feela lisheha!”+ 20  Hakusina likota, mulilo watima, Mi hakusina lisawana, likomano zafela.+ 21  Sina mashala aekezwa kwa mashala atuka ni likota zetukisa mulilo, Ni mutu wa likomano uzusa likañi.+ 22  Manzwi a lisawana aswana sina buemba-emba bwa sico bobutabusa;* Amiziwa ni kushetumukela mwa mba.+ 23  Manzwi aalilato aazwa mwa pilu yemaswe Aswana sina silivera yebenya fa liñetana la piza ya lizupa.+ 24  Yatoile babañwi upata sitoyo seo ka milomo yahae, Kono mwa pilu yahae upata bupumi. 25  Niha bulela ka musa, usike wamusepa, Kakuli kunani lika zenyenyisa ze 7 mwa pilu yahae.* 26  Sitoyo sahae niha sipatilwe ka bupumi, Bumaswe bwahae bukabonahala mwa puteho. 27  Yayepa musima ukawela mwateñi, Mi mutu kaufela yapindumuna licwe—lika mupyata.+ 28  Lilimi lelibulela buhata litoile babaholofazwa ki lona, Mi mulomo obulela manzwi acolaula utahisa sinyeho.+

Litaluso ze kwatasi

Kamba mwendi, “Ni sikuto sesisa swaneli hasisebezi.”
Kamba “Kuli usike walikanelela ni sona.”
Linzwi ka linzwi, “yanwa mifilifili.”
Kamba “alepelela.”
Kamba “yaholofaza batu kaufela.”
Kamba “matiyelo asona.”
Kamba mwendi, “yaikenya mwa.”
Kamba “masho abulaya.”
Kamba “sina lika zemiziwa kapili-pili.”
Kamba “Kakuli pilu yahae yanyenyisa luli.”