Mwa ku fumanela litaba ka bunolo

Mukete puo

Mu ye fa kalulo ya bubeli ya litaba ze li teñi

Mu ye kwa litaba za mwahali

Mu ye kwa litaba za mwahali

Lipaki za Jehova

Silozi

Bibele ya fa Intaneti

BIBELE YA TOLOKO YA LIFASI LELINCA

Jobo 5:1-27

LITABA ZE MWAHALI

  • Elifazi uzwelapili kubulela (1-27)

    • ‘Mulimu uswasa bababutali mwa bupumi bwabona’ (13)

    • ‘Jobo asike ahana kukalimelwa ki Mulimu’ (17)

5  “Hakuhuweleze! Kana kunani yaka kualaba? Ki mañi ku babakenile yeuka kupa tuso ku yena?   Kakuli ndimbelela ikabulaya yasina ngana, Mi muna ukabulaya yapumiwa ka bunolo.   Niboni mutu yasina ngana hatoma mibisi, Kono ka sipundumukela ndu yahae yakutiwa.   Bana bahae habana yabasileleza, Mi bahatelelwa kwa munyako wa muleneñi,+ kusina yabalamulela.   Yashwile tala umucela zakutuzi, Uikungela nihaiba ze mwa mikakani, Mi maluwo abona ateezwi katwa.   Kakuli lika zemaswe halizwangi mwa liluli, Mi butata habumelangi mwa mubu.   Kakuli mutu upepezwi manyando, Sina feela mulilo haunani kutatalakanela mwahalimu.   Kono kambe ki na, nenika ikupela ku Mulimu, Mi nenika fitisa taba yaka ku Mulimu,   Ku yena yaeza lika zetuna zesakonwi kubatisiswa, Lika zemakaza, zesakonwi kubalwa. 10  Unelisa pula fa lifasi Mi ububiseza mezi mwa masimu. 11  Wa mayemo a kwatasi wamupahamisa, Mi yalembwalile wamupahamisa ka kumupilisa. 12  Usinya milelo ya babanani maano amaswe, Ilikuli musebezi wa mazoho abona usike wakonda. 13  Uswasa bababutali mwa bupumi bwabona,+ Kuli milelo ya babatalifile ipale. 14  Bakopana ni lififi ka nako ya musihali, Mi musihali babubutela inge kuli ki busihu. 15  Ulamulela mutu kwa mukwale o mwa mulomo wabona, Ulamulela mubotana mwa lizoho la yamaata, 16  Kuli ba mayemo a kwatasi babe ni sepo, Kono babasika luka bakwaliwe milomo. 17  Bona! Mutu yakalimelwa ki Mulimu ukaba yatabile; Hakulicwalo, usike wahana kukalimelwa ki Yamaata Kaufela! 18  Kakuli ki yena yautwisa butuku, kono hape wafolisa fokuholofezi; Ki yena yaholofaza, kono hape wafolisa ka mazoho ahae. 19  Uka kusileleza kwa liziyezi ze 6, Mane nihaiba ziyezi yabu 7 haina kukutahela. 20  Ka nako ya lukupwe uka kusileleza kwa lifu, Mi uka kulamulela kwa buhali bwa mukwale ka nako ya ndwa. 21  Ukasilelezwa kwa lilimi leliutwisa butuku,+ Mi hauna kusaba sinyeho haika taha. 22  Ukaseha sinyeho ni tala, Mi hauna kusaba libatana za mwa lifasi. 23  Kakuli macwe a mwa naheñi haana kukuholofaza,* Mi libatana za mwa naheñi likapila ni wena ka kozo. 24  Ukaziba kuli tende yahao isilelelizwe,* Mi hauna kutonda sesiñwi hauka tatuba mafulisezo ahao. 25  Ukaba ni bana babañata, Mi baikulu bahao bakaata sina limela za mwa lifasi. 26  Ukaya mwa libita inze usatiile, Sina mañata a zekutuzwi zekubukanyizwe ka nako yazona. 27  Bona! Lubatisisize taba ye, mi lufumani kuli kucwalo. Hakuteeleze mi uiamuhele.”

Litaluso ze kwatasi

Kamba “akaeza tumelelano ni wena.”
Linzwi ka linzwi, “kozo.”