Mwa ku fumanela litaba ka bunolo

Mukete puo

Mu ye fa kalulo ya bubeli ya litaba ze li teñi

Mu ye kwa litaba za mwahali

Mu ye kwa litaba za mwahali

Lipaki za Jehova

Silozi

Bibele ya fa Intaneti

BIBELE YA TOLOKO YA LIFASI LELINCA

Jeremia 24:1-10

LITABA ZE MWAHALI

  • Lifeiga zende ni zemaswe (1-10)

24  Cwale Jehova anibonisa lizuma zepeli za lifeiga, zetomilwe fapilaa tempele ya Jehova, Mulena Nebukadenezare* wa Babilona hasaaisize mwa buhapiwa Jekonia+ mwanaa Joyakimi,*+ mulena wa Juda, hamoho ni manduna ba Juda, likwala za misebezi ya mazoho, ni bambuti;* abazwisa mwa Jerusalema kubaisa kwa Babilona.+  Sizuma sesiñwi nesinani lifeiga zende hahulu, inge lifeiga zapili kubuzwa, kono sizuma sesiñwi sona nesinani lifeiga zemaswe luli, zemaswe hahulu kuli mane nelisa konwi kuciwa.  Cwale Jehova anibuza, ali: “Ubonañi Jeremia?” Kiha nili: “Nibona lifeiga; lifeiga zende ki zende hahulu, kono zemaswe zona limaswe luli, limaswe hahulu kuli mane halikonwi kuciwa.”+  Linzwi la Jehova kiha litaha ku na, lali:  “Jehova Mulimu wa Isilaele sabulela ki se, uli: ‘Bahapiwa ba Juda, benizwisize mwa sibaka se, ni kubaisa mwa naha ya Makaladeya, nika baanga ka mukwa omunde sina lifeiga zende zeo.  Nika batalima kuli nibaeze hande, mi nikatahisa kuli bakutele mwa naha ye.+ Nika bayaha, mi hanina kubalutulula; nika bacala, mi hanina kubakumula.+  Mi nika bafa pilu ya kuniziba kuli ki na Jehova.+ Bakaba sicaba saka, mi nikaba Mulimu wabona,+ kakuli bakakutela ku na ka pilu yabona kaufela.+  “‘Kono Jehova sabulela ki se, ka za lifeiga zemaswe hahulu kuli mane halikonwi kuciwa,+ uli: “Ki mona monika ngela Mulena Zedekia+ wa Juda cwalo, ni manduna bahae, ni bo masiyaleti ba mwa Jerusalema babasiyezi mwa naha ye, ni babapila mwa naha ya Egepita.+  Nika batahiseza ziyezi kuli babe nto yesabisa hahulu kwa mibuso kaufela ya lifasi,+ nikatahisa kuli bashubulwe, babe lishitanguti, basheununwe, babe babakutilwe+ mwa libaka kaufela monika bahasanyeza.+ 10  Mi nika balumela mukwale,+ lukupwe, ni butuku bobuyambukela bobubulaya,+ kufitela bayunda mwa naha yene nifile bona ni bo kuku wabona.”’”

Litaluso ze kwatasi

Linzwi ka linzwi, “Nebukaderezare,” ka muñolelo omuñwi.
Hape ubizwa Joyakini ni Konia.
Kamba mwendi, “bayahi ba mamota.”