Mwa ku fumanela litaba ka bunolo

Mukete puo

Mu ye fa kalulo ya bubeli ya litaba ze li teñi

Mu ye kwa litaba za mwahali

Mu ye kwa litaba za mwahali

Lipaki za Jehova

Silozi

Bibele ya fa Intaneti

BIBELE YA TOLOKO YA LIFASI LELINCA

Isaya 47:1-15

LITABA ZE MWAHALI

  • Kuwa kwa Babilona (1-15)

    • Banuhi ba linaleli batompololwa (13-15)

47  Tuluka, uine mwa liluli, Wena mwalyanjo, mwanaa Babilona wamusizana.+ Uine fafasi fokusina lubona,+ Wena mwanaa Makaladeya wamusizana, Kakuli batu habasana kukubiza yababalelwa, yabeka-bekiwa.   Uunge sibeliso, ubele fulaulo. Uzwise lisila leuikwahezi kwa pata. Shuña sitino sahao, uikapule kwa mahutu ahao. Usile linuka.   Ukatubulwa, usiyale mapunu. Maswabi ahao akabonahala. Nika kukutiseza bumaswe bwahao,+ mi hakuna mutu yaka nitibela.*   “Muliululi waluna Ki Yakenile wa Isilaele; Libizo lahae ki Jehova wa limpi.”+   Uine fo, inze ukuzize mi ukene mwa lififi, Wena mwanaa Makaladeya wamusizana;+ Batu habasana kukubiza Mufumahali* wa Mibuso.+   Nenihalifezi sicaba saka.+ Nasilafaza saanda saka,+ Mi nabafa mwa lizoho lahao.+ Kono hausika babonisa sishemo.+ Mane walwalisa basupali coko yebukiti.+   Wali: “Nikaba Mufumahali* kamita, kuya kuile.”+ Neusika isa pilu kwa lika zene ueza; Neusika nahanisisa molika felela.   Cwale utwa taba ye, wena yalata minyaka,+ Yainzi mwa buiketo, yali mwa pilu yahae: “Ki na, mi hakuna yomuñwi hape.+ Hanina kuba mbelwa. Hanina kuziba mokuinezi kushwelwa ki bana.”+   Kono lika zepeli ze, lika kutahela ka sipundumukela, mwa lizazi lililiñwi:+ Kushwelwa ki bana ni kuba mbelwa. Lika kutahela ka tikanyo yetezi+ Kabakala* buloi bwahao bobuñata ni liposo zahao zemaata.+ 10  Neusepile bumaswe bwahao. Neuize: “Hakuna yanibona.” Butali bwahao ni zibo yahao ki zona zekukelusize, Mi mwa pilu yahao, ubulela kuli: “Ki na, mi hakuna yomuñwi hape.” 11  Kono ukatahelwa ki ziyezi, Mi mabibo ahao haana kuitibela.* Ukatahelwa ki kozi; hauna kukona kuipima. Ukatahelwa ki sinyeho ka sipundumekela, ili yeusika ziba kale.+ 12  Cwalehe, zwelapili kuitusisa liposo zahao ni buloi bwahao bobutuna,+ Zeuikatalize kueza kuzwa kwa bwanana bwahao. Mwendi ukatuseha; Mwendi ukasabisa batu. 13  Ukatalisizwe ki baelezi bahao babañata-ñata. Cwale habayeme bakupilise, Bona babalapela mahalimu,* babashalimela linaleli,+ Baba kuzibisa, ka linako za kutasa kwa kweli, Zeka kutahela kwapili. 14  Bona! Baswana sina mataka. Mulilo uka bacisa. Habakoni kuipilisa kwa maata a malimi a mulilo. Ao haki mashala a kuitutumuna ka ona, Mi wo haki mulilo wa kuola. 15  Baambeleli bahao bakaba cwalo ku wena, Bona bene uikataza kusebeza ni bona kuzwa kwa bwanana bwahao. Bakayambaela, yomuñwi ni yomuñwi mwa nzila yahae.* Hakuna yaka kupilisa.+

Litaluso ze kwatasi

Kamba mwendi, “mi hanina kukatana ni mutu ka sishemo.”
Kamba “Muoli.”
Kamba “Muoli.”
Kamba mwendi, “Kusina taba ni.”
Kamba “Mi hauna kuziba mwakuitibela ka mabibo ahao.”
Kamba mwendi, “Bona babaalula mahalimu; Bona babanuha ka linaleli.”
Linzwi ka linzwi, “kwa sibaka sahae.”