Mwa ku fumanela litaba ka bunolo

Mukete puo

Mu ye fa kalulo ya bubeli ya litaba ze li teñi

Mu ye kwa litaba za mwahali

Mu ye kwa litaba za mwahali

Lipaki za Jehova

Silozi

Bibele ya fa Intaneti

BIBELE YA TOLOKO YA LIFASI LELINCA

Isaya 24:1-23

LITABA ZE MWAHALI

  • Jehova ukazwisa batu mwa naha (1-23)

    • Jehova ki Mulena mwa Sione (23)

24  Hamubone! Jehova uzwisa batu mwa naha* mi uieza matota.+ Ufetula* naha+ mi ulundula babayahile mwateñi.+   Batu kaufela bakaswana: Sicaba ni muprisita, Mutanga wamuuna ni mulenaa hae wamuuna, Mutanga wamusali ni mulenaa hae wamusali, Muleki ni mulekisi, Yakalima yomuñwi ni yakalimiwa, Mukolotisi ni yakolota.+   Batu kaufela bakazwiswa mwa naha; Lika kaufela mwa naha likahapiwa,+ Kakuli Jehova ki yena yabulezi cwalo.   Naha yalila;*+ yasinyeha. Mubu waoma; wafela maata. Batu babakutekeha mwa naha baletuka.   Naha isilafalizwe ki babayahile ku yona,+ Kakuli habasika mamela milao,+ Bafetuzi litaelo,+ Mi habasika latelela tumelelano ya kamita.*+   Ki lona libaka sikuto hasisinya naha,+ Ni babayahile mwateñi habafumanwa ni mulatu. Ki lona libaka babayahile mwa naha habafukuzehile, Ni hakusiyezi batu babanyinyani hahulu.+   Waine yenca yalila,* kota ya veine yaoma,+ Mi batu kaufela ba lipilu zetabile batonga.+   Tabo ya tulupanyana ifelile; Lilata la ba mikiti lifelile; Mulumo wa tabo wa harepa ufelile.+   Banwa waine kusina pina, Mi bucwala bwababa ku baba bunwa. 10  Tolopo yeyubekilwe ishandaukile;+ Ndu ni ndu ikwalilwe kuli kusike kwakena mutu mwateñi. 11  Balilela waine mwa makululu. Minyaka kaufela haisa liyo; Tabo ya mwa naha ifelile.+ 12  Muleneñi usinyehile; Sikwalo saona situbakilwe.+ 13  Kakuli mwahalaa macaba, naha ikaba cwana: Ikaswana sina kota ya olive yenatiwa,+ Sina miselo ya veine yebubulwa hamulaho wa kutulo.+ 14  Bakatumusa kwa manzwi abona, Bakahuweleza ka tabo. Baba kwa liwate* bakazibahaza bulena bwa Jehova.+ 15  Ki lona libaka habaka lumbeka Jehova mwa naha ya liseli;*+ Mwa lioli za mwa liwate, bakalumbeka libizo la Jehova Mulimu wa Isilaele.+ 16  Kwa mafelelezo a lifasi, luutwa lipina zeli: “Kanya ki ya* Yena Yalukile!”+ Kono nili: “Naletuka, naletuka! Ninani bumai! Babasa sepahali baezize ka kusasepahala; Ka kutokwa busepahali, babasa sepahali baezize ka kusasepahala.”+ 17  Wena yayahile mwa naha, luwewe, mikoti, ni tutwa likulibelezi.+ 18  Mutu kaufela yasaba mulumo otahisa luwewe ukawela mwa mukoti, Mi mutu kaufela yazwa mwa mukoti ukaswasiwa mwa katwa.+ Kakuli mahaulo a mezi a kwahalimu akatibululwa, Mi mitomo ya naha ikazikinyeha. 19  Naha ipazuhile fahali; Naha izikinyehile; Naha ingangama hahulu.+ 20  Naha yatantalika sina mutu yakozwi, Yakwendoka sina sibuma sesinyanganyiswa ki moya. Iimezwi ki bufosi bwayona;+ Ikawa, mi haina kuzuha hape. 21  Ka lizazi leo, Jehova ukanata mpi ya mwa libaka za kwahalimu Ni malena ba lifasi baba mwa lifasi. 22  Mi bakakubukanywa hamoho Sina mapantiti bababeilwe mwa mukoti, Mi bakakwalelwa mwa tolongo ya fafasi; Hamulaho wa mazazi amañata, bakanatwa. 23  Kweli yekwanile ikakokobezwa, Mi lizazi lelibenya likaswabiswa,+ Kakuli Jehova wa limpi ubile Mulena+ fa Lilundu la Sione+ ni mwa Jerusalema, Ukaba ni kanya fapilaa baana-bahulu ba sicaba sahae.*+

Litaluso ze kwatasi

Kamba “lifasi.”
Kamba “Ubondolola pata ya.”
Kamba mwendi, “yaoma.”
Kamba “ya kwaikale.”
Kamba mwendi, “yaoma.”
Kamba “kwa wiko.”
Kamba “kwa upa.”
Kamba “Kukabiswe.”
Linzwi ka linzwi, “fapilaa baana-­bahulu bahae.”