Mu ye kwa litaba za mwahali

Mu ye fa kalulo ya bubeli ya litaba ze li teñi

Mu ye kwa litaba za mwahali

Lipaki za Jehova

Silozi

Bibele ya fa Intaneti | BIBELE YA TOLOKO YA LIFASI LELINCA

Exoda 27:1-21

LITABA ZE MWAHALI

  • Aletare ya linubu za kucisa (1-8)

  • Lapa (9-19)

  • Oli ya lilambi (20-21)

27  “Ukaeza aletare ya kota ya akeshya;+ ikalikana liñokolwa* zeketalizoho mwa butelele ni liñokolwa zeketalizoho mwa bupala. Aletare iswanela kuba ni maneku amane alikanelela mi ibe liñokolwa zetaalu mwa butelele bwa kuya mwahalimu.+  Ukaeza manaka+ mwa makona ayona amane; manaka ao akaba fa aletare, mi ukakwahela aletare ka kopa.+  Ukaeza lihemele za kuolelisa mufuse* wayona, ni lifocolo, ni mikeke ya kwiti, ni litabisa, ni lipizana za mulilo, mi ukaeza lisebeliso zayona kaufela ka kopa.+  Ukaezeza aletare bwalango bwa kopa, mi fa bwalango ukabeya fateñi mauti amane a kopa, mwa makona ayona amane.  Uka bubeya mwatasaa libala la mwa matuko a aletare, mi bwalango bwa kopa bo, bukacikisa hanyinyani fafasi mwa aletare.  Ukaezeza aletare likota za akeshya mi uka likwahela ka kopa.  Likota zeo likacomekiwa mwa mauti ilikuli libe kwa maneku amabeli a aletare, aletare hailwaliwa.+  Ukaeza aletare sina likwati la mabala lelinani musima mwahali. Iswanela kueziwa sina mwakuboniselize fa lilundu.+  “Ukaeza lapa+ la tabernakele. Kwa lineku la mboela, ili kutalima kwa mboela, lapa likaba ni masila alepelela, a line yende yeotilwe, alikana liñokolwa ze 100 mwa butelele, kwa lineku lililiñwi.+ 10  Lapa likaba ni misumo ye 20 ni matomelo a kopa a 20. Limapo za misumo ni mifohola* yayona libe za silivera. 11  Masila alepelela a kwa lineku la mutulo ni ona akalikana liñokolwa ze 100 mwa butelele, mi kukaba ni misumo ye 20 ni matomelo ayona a kopa a 20, ni limapo za silivera ni mifohola* ya misumo. 12  Kube ni masila alepelela kwa lineku la wiko, alikana ni liñokolwa ze 50 mwa bupala bwa lapa, ni misumo yelishumi ni matomelo alishumi. 13  Lapa lilikane liñokolwa ze 50 mwa bupala bwalona kwa lineku la upa, kwa mapazulelo a lizazi. 14  Kukaba ni masila alepelela kwa lineku lililiñwi, akwahela sibaka sesilikana liñokolwa ze 15, ni misumo yemilaalu ni matomelo amalaalu.+ 15  Mi kwa lineku leliñwi, kukaba ni masila alepelela, akwahela sibaka sesilikana liñokolwa ze 15, ni misumo yemilaalu ni matomelo amalaalu. 16  “Kwa munyako wa lapa kube ni lisila lelilikana liñokolwa ze 20 mwa butelele, leliezizwe ka bwanda bwa mubala wa ndilu, boya bwa folofolo bwa mubala wa pulipela, bwanda bwa bufubelu bobutona, ni line yende yeotilwe, yeindilwe hamoho,+ ni misumo yemine ni matomelo ayona amane.+ 17  Misumo kaufela yepotolohile lapa ikaba ni mañomeliso a silivera ni limapo za silivera, kono matomelo ayona akaba a kopa.+ 18  Lapa lilikane liñokolwa ze 100 mwa butelele,+ liñokolwa ze 50 mwa bupala, ni liñokolwa zeketalizoho mwa bupahamo, liezwe ka line yende yeotilwe, mi liswanela kuba ni matomelo a kopa. 19  Lisebeliso kaufela ni lika zeitusiswa mwa sebelezo ya kwa tabernakele, hamohocwalo ni limapo za tende ni limapo kaufela za lapa, likaba za kopa.+ 20  “Ulaele Maisilaele kuli bakutiseze oli ya olive yesitilwe, ya kuitusisa kwa kutahisa liseli, kuli lilambi lituke kamita.+ 21  Mwa tende ya makopanelo, ili kwande a lisila lelili bukaufi ni Bupaki,+ Aruni ni bana bahae bakalukisa kuli lilambi lizwelepili kutuka kuzwa manzibwana kuisa kakusasana fapilaa Jehova.+ Wo ki mulao wa kuya kuile obaka mamela Maisilaele mwa masika abona kaufela.+

Litaluso ze kwatasi

Ñokolwa neieza lisentimita ze 44.5 (mainci a 17.5). Mubone Litaba Zeekelizwe B14.
Kamba “mufuse wa mafula,” fo kikuli, mufuse okolobisizwe ki mafula a matabelo.
Kamba “litamiso.”
Kamba “litamiso.”