Mwa ku fumanela litaba ka bunolo

Mukete puo

Mu ye fa kalulo ya bubeli ya litaba ze li teñi

Mu ye kwa litaba za mwahali

Mu ye kwa litaba za mwahali

Lipaki za Jehova

Silozi

Bibele ya fa Intaneti

BIBELE YA TOLOKO YA LIFASI LELINCA

Exoda 26:1-37

LITABA ZE MWAHALI

  • Tabernakele (1-37)

    • Masila a tende (1-14)

    • Mafulemu ni matomelo (15-30)

    • Lisila ni lisila la fa munyako (31-37)

26  “Ueze tabernakele+ ka masila a tende alishumi a bwanda bwa line yende yeotilwe, bwanda bwa mubala wa ndilu, boya bwa folofolo bwa mubala wa pulipela, ni bwanda bwa bufubelu bobutona. Ulukele fateñi maswaniso a likerubimi.+  Lisila leliñwi ni leliñwi lilikane liñokolwa* ze 28 mwa butelele ni liñokolwa zeene mwa bupala. Masila kaufela alikanelele.+  Masila a tende aketalizoho akangungahanywa kuba lisila lililiñwi, mi masila amañwi aketalizoho ni ona akangungahanywa kuba lisila lililiñwi.  Ukaeza mañomelelo a bwanda bwa mubala wa ndilu kwa mafelelezo a lisila lililiñwi, leli kwa mafelelezo a masila angungahanyizwe, mi ueze cwalo ni kwa mafelelezo a lisila la mafelelezo kwa masila amañwi angungahanyizwe foakato ngungahanela masila ao.  Ukabeya mañomelelo a 50 kwa lisila lililiñwi ni mañomelelo a 50 kwa mafelelezo a lisila leliñwi ilikuli mañomelelo angungahanya masila ao atalimane.  Ueze mañomeliso a gauda a 50 mi ukopanye masila hamoho ka mañomeliso ao, mi tabernakele ikaba nto iliñwi.+  “Hape ukaluka masila a boya bwa puli+ kueza tende yekwahela tabernakele. Ukaeza masila a cwalo a 11.+  Lisila leliñwi ni leliñwi lilikane liñokolwa ze 30 mwa butelele ni liñokolwa zeene mwa bupala. Masila kaufela a 11 alikanelele.  Ungungahanye masila aketalizoho hamoho ni kungungahanya masila amañwi a 6 hamoho, mi lisila labu 6 uliputele kwapilaa tende. 10  Mi ubeye mañomelelo a 50 kwa mafelelezo a lisila lililiñwi, leli kwa mafelelezo a masila angungahanyizwe, ni mañomelelo a 50 kwa mafelelezo a lisila leliñwi fa sibaka fokungungahanela masila ao. 11  Ueze mañomeliso a kopa a 50 mi ukenye mañomeliso ao mwa mañomelelo ni kukopanya tende hamoho, mi ikaba nto iliñwi. 12  Kalulo ya masila yesiyezi ikalepelela. Hafu ya lisila lelisiyala ikalepelela kwamulaho wa tabernakele. 13  Masila asiyala a tabernakele akalepelela mwa matuko a tabernakele sibaka sesilikana ñokolwa iliñwi kwa lineku ni lineku, ili kukwahela tabernakele. 14  “Hape ukaeza sikwahezo sa tende ka matalo a lingu alombilwe bufubelu mi fahalimwaa sona ubeye fateñi sikwahezo sa matalo a liñibi.+ 15  “Ukaezeza tabernakele mafulemu+ a kota ya akeshya, aakayemiswa.+ 16  Fulemu yeñwi ni yeñwi iswanela kulikana liñokolwa zelishumi mwa butelele bwa kuya mwahalimu ni ñokolwa iliñwi ni licika mwa bupala. 17  Fulemu yeñwi ni yeñwi ibe ni mishengela* yemibeli yebapani. Ueze cwalo kwa mafulemu kaufela a tabernakele. 18  Ukaeza mafulemu a 20 akaba kwa mboela wa tabernakele, akatalima kwa mboela. 19  “Ukaeza matomelo+ a silivera a 40 mokuka tomiwa mafulemu a 20: mwa matomelo amabeli kukatomiwa fulemu iliñwi ya mishengela yemibeli mi fulemu ni fulemu yetatama ikaba ni matomelo amabeli mokuka kena mishengela yayona yemibeli.+ 20  Ueze mafulemu a 20 akaba kwa lineku leliñwi la tabernakele, leli kwa mutulo 21  ni matomelo aona a silivera a 40, mwa matomelo amabeli kukatomiwa fulemu iliñwi, mi fulemu ni fulemu yetatama uka itoma mwa matomelo amabeli. 22  Ukaeza mafulemu a 6 akaba kwa lineku la tabernakele la kwamulaho, leli kwa wiko.+ 23  Ukaeza mafulemu amabeli euka toma sina matiyelo amabeli a mwa makona a kwamulaho wa tabernakele. 24  Mafulemu ao akabeiwa ka bubeli kukalela kwatasi kuisa kwahalimu, kuyo fita kwa liuti lapili. Kuezwe cwalo kwa mafulemu amabeli ao, mi akaba sina matiyelo amabeli a mwa makona. 25  Mi kukaba ni mafulemu a 8 ni matomelo aona a silivera a 16, kuli mwa matomelo amabeli kutomiwe fulemu iliñwi, mi fulemu ni fulemu yetatama ibe ni matomelo amabeli. 26  “Ukaeza mabalelo a kota ya akeshya, ueze aketalizoho a kubeya kwa mafulemu a lineku lililiñwi la tabernakele,+ 27  ni mabalelo aketalizoho a kubeya kwa mafulemu a lineku leliñwi la tabernakele, ni mabalelo amañwi aketalizoho a kubeya kwa mafulemu a kwa lineku la tabernakele la kwamulaho, leli kwa wiko. 28  Lubalelo lwa fahali lolufita fahalaa mafulemu luswanela kuzwa kwa makalelo kuisa kwa mafelelezo a lineku. 29  “Ukakwahela mafulemu ka gauda,+ mi ukaeza mauti aona a gauda kuli aswale mabalelo, mi ukwahele mabalelo ao ka gauda. 30  Ueze tabernakele kulikana ni siswaniso sayona sene ubonisizwe fa lilundu.+ 31  “Ueze lisila+ ka bwanda bwa mubala wa ndilu, boya bwa folofolo bwa mubala wa pulipela, bwanda bwa bufubelu bobutona, ni line yende yeotilwe. Kulukelwe fateñi maswaniso a likerubimi. 32  Uka lipaheka fa misumo ya akeshya yemine yekwahezwi ka gauda. Limapo zayona likaba za gauda. Misumo yeo iswanela kutomiwa fa matomelo a silivera amane. 33  Ukapaheka lisila kwa mañomelelo ni kutisa aleka ya Bupaki+ mwahalaa lisila. Lisila lika mikauhanyeza Sibaka Sesikenile+ kwa Sibaka Sesikenile Hahulu.+ 34  Ubeye sikwahezo fa aleka ya Bupaki mwa Sibaka Sesikenile Hahulu. 35  “Ukabeya tafule kwande a lisila, mi ubeye matomelo a lilambi+ kubapana ni tafule kwa lineku leli kwa mboela wa tabernakele; mi ubeye tafule kwa lineku la mutulo. 36  Ukaeza lisila la fa munyako wa tende ka bwanda bwa mubala wa ndilu, boya bwa folofolo bwa mubala wa pulipela, bwanda bwa bufubelu bobutona, ni line yende yeotilwe, yeindilwe hamoho.+ 37  Uezeze lisila la fa munyako misumo yeketalizoho ya kota ya akeshya ni kuikwahela ka gauda. Limapo zayona libe za gauda, mi uka iezeza matomelo a kopa aketalizoho ka sipi yeshengunuzwi.

Litaluso ze kwatasi

Ñokolwa neieza lisentimita ze 44.5 (mainci a 17.5). Mubone Litaba Zeekelizwe B14.
Kamba “likota zeyemi.”