Mwa ku fumanela litaba ka bunolo

Mukete puo

Mu ye fa kalulo ya bubeli ya litaba ze li teñi

Mu ye kwa litaba za mwahali

Mu ye kwa litaba za mwahali

Lipaki za Jehova

Silozi

Bibele ya fa Intaneti

BIBELE YA TOLOKO YA LIFASI LELINCA

Deuteronoma 10:1-22

LITABA ZE MWAHALI

  • Kueziwa matapa amabeli hape (1-11)

  • Satokwa Jehova (12-22)

    • Usabe Jehova mi umulate (12)

10  “Ka nako yani, Jehova anibulelela kuli: ‘Uikezeze matapa amabeli a macwe, aswana sina apili,+ mi ukambamele ku na fa lilundu; hape uswanela kuikezeza aleka* ya kota.  Mi fa matapa ao nikañola fateñi manzwi anaali fa matapa apili, ene utubile, mi uswanela kubeya matapa ao mwa aleka.’  Kiha senieza aleka fa kota ya akeshya mi nabeta matapa amabeli a macwe aswana ni apili, mi nakambama fa lilundu inze nisweli matapa amabeli mwa lizoho laka.+  Mi cwale añola fa matapa ao manzwi aswana ni anaañozi sapili,+ yona Milao Yelishumi,*+ yanaa mibulelezi Jehova fa lilundu mwa mulilo+ ka lizazi lene mukopani hamoho;*+ mi Jehova anifa yona.  Mi nasikuluha ni kushetumuka fa lilundu,+ nabeya matapa mwa aleka yene niezize, mona mwasainzi, kulikana ni mwanaa nilaelezi Jehova.  “Maisilaele bafunduka mwa Beeroti Bene-jakana, baya mwa Mosera. Aruni ashwela mwa Mosera mi abulukwa,+ mi Eliazare mwanaa hae akala kusebeza sina muprisita mwa sibaka sa ndatahe.+  Bafunduka mo, mi baya mwa Gudigoda, mi bafunduka mwa Gudigoda kuya mwa Jotibata,+ yona naha ya linukana.*  “Ka nako yani, Jehova aketa lusika lwa Livi,+ kuli balwale aleka ya tumelelano ya Jehova,+ kuli basebeleze Jehova, mi bafuyaule ka libizo lahae,+ sina mobasa ezeza ni kacenu le.  Ki lona libaka Livi hasina kabelo kamba saanda mwahalaa banabahabo yena. Jehova ki yena saanda sahae, kulikana ni mwanaa mubulelezi Jehova Mulimu wahao.+ 10  Neniinzi fa lilundu mazazi a 40 ni masihu a 40 sina mone niezelize sapili,+ mi Jehova aniutwa ka nako yani hape.+ Jehova alumela kusa mibulaya. 11  Cwale Jehova ali ku na: ‘Zamaya uyo etelela sicaba, mi sicaba siitukiseze kufunduka, kuli bakene mwa naha ni kuiluwa, yona naha yene nisepisize bo kuku wabona kuli nika bafa yona.’+ 12  “Cwale wena Isilaele, Jehova Mulimu wahao satokwa kuli ueze ki sika mañi?+ Satokwa feela kikuli: usabe Jehova Mulimu wahao,+ uzamaye mwa linzila zahae kaufela,+ umulate, usebeleze Jehova Mulimu wahao ka pilu yahao kaufela ni ka moyo* wahao kaufela,+ 13  mi umamele milao ni litaelo za Jehova zeni kulaela kacenu, kuli likutuse.+ 14  Bona, lihalimu ki la Jehova Mulimu wahao, nihaiba mahalimu a mahalimu,* ni lifasi ni ze ku lona kaufela.+ 15  Kono bo kuku wamina ki bona feela banaasutelezi ku bona Jehova, mi ki bona feela banaalatile, mi uketile mina baikulu babona,+ mwahalaa macaba kaufela, sina mokuinezi kacenu le. 16  Cwale mukenise* lipilu zamina+ mi mutuhele muñañatoho.*+ 17  Kakuli Jehova Mulimu wamina ki Mulimu wa milimu+ ni Mulena wa malena, ki Mulimu yomutuna, yamaata, ni yasabisa, yasaketululi mutu+ mi halumeli kulekiwa kweta. 18  Uatulela mwana yasina ndatahe* ni mbelwa+ ka kuluka, mi ulata muzwahule,+ umufa lico ni liapalo. 19  Ni mina muswanela kulata muzwahule, kakuli nemuli bazwahule mwa naha ya Egepita.+ 20  “Uswanela kusaba Jehova Mulimu wahao, umusebeleze,+ umukumalele, mi uswanela kukonka ka libizo lahae. 21  Ki Yena yeuswanela kulumbeka.+ Ki yena Mulimu wahao, yakuezelize lika zetuna ze kaufela ni zesabisa, zona lika zeuiponezi ka meeto ahao.+ 22  Bo kuku wahao habashetumukela kwa Egepita neli batu ba 70,+ kono cwale Jehova Mulimu wahao ukuatisize sina linaleli za lihalimu.+

Litaluso ze kwatasi

Kamba “likwati.”
Linzwi ka linzwi, “Manzwi Alishumi.” Hape abizwa Litaelo Zelishumi.
Kamba “lene muputehani.”
Kamba “milapo ya mezi.”
Kamba “mahalimu apahami ka kufitisisa.”
Linzwi ka linzwi, “muise kwa mupato.”
Linzwi ka linzwi, “mi mutuhele kuomeleza milala yamina.”
Kamba “ndiala.”