Mwa ku fumanela litaba ka bunolo

Mukete puo

Mu ye fa kalulo ya bubeli ya litaba ze li teñi

Mu ye kwa litaba za mwahali

Mu ye kwa litaba za mwahali

Lipaki za Jehova

Silozi

Bibele ya fa Intaneti

BIBELE YA TOLOKO YA LIFASI LELINCA

Baatuli 17:1-13

LITABA ZE MWAHALI

  • Milimu ya maswaniso ya Mika ni muprisita wahae (1-13)

17  Nekunani muuna yabizwa Mika yanaapila mwa naha ya malundu ya Efraimi.+  Abulelela mahe kuli: “Lishekele za silivera ze 1,100 zene utondile mi seukuta mutu yanaa liingile, inze niikutwela—bona! Silivera yeo ikuna. Ki na yanaa iingile.” Mahe kihaa li: “Haike Jehova afuyole mwanaka.”  Mi akutiseza mahe lishekele za silivera ze 1,100, kono mahe ali: “Luli nikafa Jehova silivera yezwa mwa lizoho laka kuli mwanaka aitusise yona kwa kueza mulimu wa kubeta ni mulimu wa sipi.*+ Cwale nakukutiseza yona.”  Hasaakutiselize mahe silivera yeo, mahe aanga lishekele za silivera ze 200 mi alifa mumbuti wa lisipi za silivera. Mumbuti aeza mulimu wa kubeta ni mulimu wa sipi;* zabeiwa mwa ndu ya Mika.  Muuna yo yabizwa Mika naanani ndu ya milimu, mi aeza efoda+ ni maswaniso a literafimi*+ mi aketa* yomuñwi wa bana bahae babashimani kuli abe muprisita wahae.+  Mwa mazazi ao, nekusina mulena mwa Isilaele.+ Mutu ni mutu naaikezeza feela sanaabona kuli silukile.*+  Cwale nekunani mutangana mwa Betelehema+ wa Juda wa lubasi lwa Juda. Mutangana yo neli Mulivi+ yanaayahile mo ka nakonyana.  Muuna yo asiya muleneñi wa Betelehema wa mwa Juda kuyo bata sibaka sa kupila ku sona. Hanaazamaya cwalo, apunya fa ndu ya Mika, mwa naha ya malundu ya Efraimi.+  Mika ali ku yena: “Uzwa kai?” Yena amualaba, ali: “Ni Mulivi yazwa kwa Betelehema wa mwa Juda, mi nizamaya nibata sibaka sa kupila ku sona.” 10  Cwale Mika ali ku yena: “Ina ni na, ube ndate* ni muprisita waka. Nika kufanga lishekele za silivera zelishumi ka silimo ni liapalo ni lico.” Mi Mulivi akena mwahali. 11  Mulivi alumela cwalo kuina ni muuna yo, mi mutangana yo aba inge yomuñwi wa bana bahae. 12  Hape Mika aketa* Mulivi yo kuba muprisita wahae,+ mi apila mwa ndu ya Mika. 13  Mi Mika ali: “Cwale naziba kuli Jehova uka nieza hande, kakuli Mulivi yo saali muprisita waka.”

Litaluso ze kwatasi

Kamba “siswaniso sa sipi yeshengunuzwi.”
Kamba “siswaniso sa sipi yeshengunuzwi.”
Kamba “milimu ya lubasi; milimu ya maswaniso.”
Linzwi ka linzwi, “ataza lizoho la.”
Kamba “sanaanahana kuli silukile.”
Kamba “muelezi.”
Linzwi ka linzwi, “ataza lizoho la.”