Mu ye kwa litaba za mwahali

Mu ye fa kalulo ya bubeli ya litaba ze li teñi

Mu ye kwa litaba za mwahali

Lipaki za Jehova

Silozi

Bibele ya fa Intaneti | BIBELE YA TOLOKO YA LIFASI LELINCA

Baatuli 10:1-18

10  Mwamulaho wa Abimeleki, Tola mwanaa Pua, mwanaa Dodo, muuna wa lusika lwa Isakare, alamulela Isilaele.+ Naapila mwa Shamiri mwa naha ya malundu ya Efraimi.  Aatulela Isilaele ka lilimo ze 23. Kihona ashwa mi abulukiwa mwa Shamiri.  Mwamulaho wahae kwataha Jairi wa Mugiliadi mi aatulela Isilaele ka lilimo ze 22.  Naanani bana babashimani ba 30 bane bapahama limbongolo ze 30, mi nebanani mileneñi ye 30, yebizwa Havoto-jairi+ ni la kacenu le; i mwa naha ya Giliadi.  Hamulaho wa fo, Jairi ashwa mi abulukiwa mwa Kamona.  Maisilaele hape baeza zemaswe fapilaa Jehova,+ mi bakala kusebeleza bo Baale,+ ni maswaniso a Ashitaroti, milimu ya Arami,* milimu ya Sidoni, milimu ya Moabi,+ milimu ya Maamoni,+ ni milimu ya Mafilisita.+ Bafulalela Jehova mi nebasika musebeleza.  Buhali bwa Jehova kiha butukela Maisilaele, mi abalekisa mwa mazoho a Mafilisita ni Maamoni.+  Mi banyandisa maswe Maisilaele ni kubahatelela mwa silimo seo—nebahatelezi Maisilaele kaufela ka lilimo ze 18 mwa naha ye mwabuse bwa Jordani yeneebanga ya Maamori, ili mwa Giliadi.  Maamoni ni bona nebasilanga Jordani kuyo lwanisa Juda ni Benjamine ni ba ndu ya Efraimi; mi Maisilaele nebaziyelehile hahulu. 10  Mi cwale Maisilaele baitilelela ku Jehova kuli abatuse,+ bali: “Lukufoselize, kakuli lufulalezi Mulimu waluna ni kusebeleza bo Baale.”+ 11  Kono Jehova abulelela Maisilaele kuli: “Kana nenisika milamulela kwa Maegepita+ ni kwa Maamori,+ Maamoni, Mafilisita,+ 12  Masidoni, Maamaleke, ni Mamidiani, hane bamihatelezi? Hane muitilelezi ku na, neni milamulezi ku bona. 13  Kono nemu nifulalezi ni kuyo sebeleza milimu isili.+ Ki lona libaka hanisike namilamulela hape.+ 14  Hamuye kwa milimu yemuiketezi, muyo kupa tuso ku yona.+ Imilamulele ka nako ya ziyezi yamina.”+ 15  Kono Maisilaele babulelela Jehova kuli: “Luezize sibi. Ulueze moulatela kaufela. Feela ululamulele kacenu, lwakupa.” 16  Mi bazwisa milimu ya kusili mwahalaa bona mi basebeleza Jehova,+ kuli mane apalelwa kutuhelela Isilaele mwa manyando ahae.+ 17  Hamulaho wa nako, Maamoni+ babiziwa, mi bayo toma mafulo mwa Giliadi. Maisilaele ni bona bakopana hamoho mi batoma mafulo mwa Mizipa. 18  Sicaba sa Giliadi ni manduna basona baikambota, bali: “Ki mañi yakaetelela ndwa ya kulwanisa Maamoni?+ Abe yena nduna wa batu kaufela babayahile mwa Giliadi.”

Litaluso ze kwatasi

Kamba “Siria.”