Mwa ku fumanela litaba ka bunolo

Mukete puo

Mu ye fa kalulo ya bubeli ya litaba ze li teñi

Mu ye kwa litaba za mwahali

Mu ye kwa litaba za mwahali

Lipaki za Jehova

Silozi

Bibele ya fa Intaneti

BIBELE YA TOLOKO YA LIFASI LELINCA

2 Samuele 9:1-13

LITABA ZE MWAHALI

  • Davida ubonisa Mefibosheti lilato lelisa feli (1-13)

9  Cwale Davida ali: “Kana kusanani yasiyezi ku ba ndu ya Saule yenika bonisa lilato lelisa feli kabakala Jonatani?”+  Nekunani mutanga wa ba ndu ya Saule yabizwa Ziba.+ Kiha bamubiza kuli aye ku Davida, mi mulena amubuza, ali: “Kana ki wena Ziba?” Amualaba, ali: “Ki na mutangaa hao.”  Mulena aekeza, ali: “Kana kusanani yasiyezi ku ba ndu ya Saule yenika bonisa lilato la Mulimu lelisa feli?” Ziba ali ku Mulena: “Kusasiyezi mwanaa Jonatani; ki sihole sa mahutu.”+  Mulena amubuza, ali: “Ukai?” Ziba amualaba, ali: “U kwa ndu ya Makiri+ mwanaa Amiele, kwa Lo-debari.”  Kapili-pili, Mulena Davida aluma batu kuyo muunga kwa ndu ya Makiri mwanaa Amiele kwa Lo-debari.  Mefibosheti mwanaa Jonatani mwanaa Saule hafitile ku Davida, ato kubama ni kuwiseza pata fafasi. Davida kihaa li ku yena: “Mefibosheti!” Yena amualaba, ali: “Mutangaa hao ki yo.”  Davida ali ku yena: “Usike wasaba, kakuli nika kubonisa lilato lelisa feli+ kabakala Jonatani ndataho, mi nika kukutiseza naha kaufela ya kuku wahao Saule, mi kamita ukacanga lico* kwa tafule yaka.”+  Mefibosheti kihaa kubama ni kuwiseza pata fafasi, ali: “Ni mañi kuli unishemube* cwana, na mutangaa hao, yaswana sina nja yeshwile?”+  Cwale mulena aluma batu kuyo biza Ziba sikombwa sa Saule, mi ato li ku yena: “Lika kaufela zanaaluwile Saule ni ba ndu yahae kaufela nilifa ku muikulu wa muñaa hao.+ 10  Umulimele simu—wena ni bana bahao ni batanga bahao—mi umukutulele zekabeiwa mwateñi, libe lico za ba ndu ya muikulu wa muñaa hao. Kono haili Mefibosheti muikulu wa muñaa hao, yena ukacanga lico kwa tafule yaka kamita.”+ Cwale Ziba naanani bana ba 15 ni batanga ba 20.+ 11  Ziba kihaa li ku mulena: “Mutangaa hao ukaeza lika kaufela zamulaela mulena muñaa hae.” Mi Mefibosheti akala kucanga kwa tafule ya Davida* sina yomuñwi wa bana ba mulena. 12  Cwale Mefibosheti naanani mwana yomunyinyani wamushimani yabizwa Mika;+ mi batu kaufela bane bapila mwa ndu ya Ziba baba batanga ba Mefibosheti. 13  Mi Mefibosheti apila mwa Jerusalema, kakuli kamita naacanga lico kwa tafule ya mulena;+ mi naali sihole sa mahutu.+

Litaluso ze kwatasi

Linzwi ka linzwi, “ukacanga sinkwa.”
Linzwi ka linzwi, “kuli utalimise pata yahao ku na.”
Kamba mwendi, “yaka.”