Mwa ku fumanela litaba ka bunolo

Mukete puo

Mu ye fa kalulo ya bubeli ya litaba ze li teñi

Mu ye kwa litaba za mwahali

Mu ye kwa litaba za mwahali

Lipaki za Jehova

Silozi

Bibele ya fa Intaneti

BIBELE YA TOLOKO YA LIFASI LELINCA

2 Makolonika 14:1-15

LITABA ZE MWAHALI

  • Lifu la Abija (1)

  • Asa, mulena wa Juda (2-8)

  • Asa utula Maetopia ba 1,000,000 (9-15)

14  Abija ashwa, abulukiwa sina bo kuku wahae, mi bamubuluka mwa Muleneñi wa Davida;+ mi Asa mwanaa hae amuyola fa bulena. Mwa mazazi ahae, naha yapumula ka lilimo zelishumi.  Asa aeza zende ni zelukile mwa meeto a Jehova Mulimu wahae.  Azwisa lialetare za milimu isili+ ni libaka zelumbile, atubaka misumo ya macwe ya kulapela,+ mi alemaka likota za kulapela.*+  Kuzwa fo, abulelela Majuda kuli babate Jehova Mulimu wa bo kuku wabona ni kumamela Mulao ni litaelo zahae.  Ka mukwa ocwalo, azwisa libaka zelumbile ni lialetare za insense mwa mileneñi kaufela ya Juda,+ mi ka nako ya puso yahae, mubuso wazwelapili kuba mwa kozo.  Ayaha mileneñi yesilelelizwe mwa Juda,+ kakuli naha neili mwa kozo, mi naasika lwaniswa mwa lilimo zeo, kabakala kuli Jehova naamufile pumulo.+  Abulelela Majuda, ali: “Haluyaheñi mileneñi ye, mi luipotolose ka mamota ni litawala,+ ni ka likwalo* ni lipakiso. Kakuli naha isali yaluna, kabakala kuli lubatile Jehova Mulimu waluna. Lumubatile, mi ulufile pumulo mwa maneku kaufela.” Ka mukwa ocwalo, musebezi wabona wa kuyaha wakonda.+  Asa naanani mpi ya baana ba Juda ba 300,000, bane balwana ka litebe zetuna ni ka malumo. Mi ku ba lusika lwa Benjamine naanani lindwalume zemaata ze 280,000 zelwezi litebe zenyinyani,* mi nelilwana ka buta.*+  Hasamulaho, Zera wa Muetopia ataha kuto balwanisa anani mpi ya baana ba 1,000,000 ni likoloi ze 300.+ Hafita mwa Maresha,+ 10  Asa azwa kuyo mulwanisa, mi bayema mwa sibaka sabona kuitukiseza ndwa mwa Musindi wa Zefata kwa Maresha. 11  Asa kihaa huweleza ku Jehova Mulimu wahae,+ ali: “Wena Jehova, hauna taba ni kuli batu beutusa ki babañata kamba habana maata.+ Lutuse, wena Jehova Mulimu waluna, kakuli ki wena yelusepile,*+ mi lutilo lwanisa sicaba se ka libizo lahao.+ Wena Jehova, ki wena Mulimu waluna. Usike watuhelela mutu kukutula.”+ 12  Cwale Jehova atula Maetopia fapilaa Asa ni fapilaa Juda, mi Maetopia basaba.+ 13  Asa ni batu bahae babalelekisa kuyo fita kwa Gerari,+ mi Maetopia bazwelapili kubulaiwa kufitela kutokwa nihaiba alimuñwi ku bona yanaapilile, kakuli nebabulailwe ki Jehova ni mpi yahae. Hamulaho baikungela tutu yeñata hahulu. 14  Kutuha fo, basinya mileneñi kaufela yeneli mwa matuko a Gerari, kakuli Jehova naatahisize kuli batu ba mwateñi babe ni sabo; mi Majuda baikungela tutu ya mwa mileneñi kaufela, kakuli nekunani tutu yeñata mwateñi. 15  Hape balwanisa batu bane bapila mwa litende bane baluwile limunanu, mi bahapa lingu ni likamele zeñata-ñata, kihona bakutela kwa Jerusalema.

Litaluso ze kwatasi

Linzwi ka linzwi, “likwalo zeinzi ka bubeli.”
Ili litebe zenyinyani zeneeitusiswanga hañata ki bakunupi ba masho.
Linzwi ka linzwi, “mi nelihata buta.”
Linzwi ka linzwi, “kakuli lutiyezi ku wena.”