Mwa ku fumanela litaba ka bunolo

Mukete puo

Mu ye fa kalulo ya bubeli ya litaba ze li teñi

Mu ye kwa litaba za mwahali

Mu ye kwa litaba za mwahali

Lipaki za Jehova

Silozi

Bibele ya fa Intaneti

BIBELE YA TOLOKO YA LIFASI LELINCA

1 Makolonika 13:1-14

LITABA ZE MWAHALI

  • Aleka iyo ngiwa kwa Kiriati-jearimi (1-14)

13  Davida alelisana ni bazamaisi ba litopa za masole ba 1,000 ni bazamaisi ba litopa za masole ba 100 ni mueteleli yomuñwi ni yomuñwi.+  Mi cwale Davida abulelela puteho kaufela ya Isilaele, ali: “Haiba mwalumela mi haiba ki nto yelumelelwa ki Jehova Mulimu waluna, halulumeñi liñusa kwa banabahabo luna babasiyezi mwa libaka kaufela za Isilaele ni kwa baprisita ni Malivi mwa mileneñi yabona yenani mafulisezo,+ kuli batahe bato swalisana ni luna.  Mi luyo nga Aleka+ ya Mulimu waluna, luikutise.” Kakuli nebasika ibabalela mwa mazazi a Saule.+  Puteho kaufela yalumela kueza cwalo, kakuli sicaba kaufela nesiboni kuli kulukile.  Davida kihaa kopanya Isilaele kaufela, kukalela kwa nuka* ya Egepita kuyo fita ni kwa Lebo-hamati,*+ kuli bayo nga Aleka ya Mulimu wa niti kwa Kiriati-jearimi.+  Davida ni Isilaele kaufela bakambamela kwa Baala,+ kwa Kiriati-jearimi, wa Juda, kuyo nga kwateñi Aleka ya Mulimu wa niti, yena Jehova, yainzi mwa lubona fahalimwaa* likerubimi,+ fokubizezwanga libizo lahae.  Kono balonga Aleka ya Mulimu wa niti mwa koloi yenca+ mi baizwisa mwa ndu ya Abinadabi, mi Uza ni Ahio nebaetelela koloi yeo.+  Davida ni Isilaele kaufela banyakalala ka maata abona kaufela fapilaa Mulimu wa niti, ka lipina, liharepa, zelizwa zeñwi za mihala, tulupanyana,+ likambeliso,+ ni litolombita.+  Kono habafita fa mapulelo a Kidoni, Uza aotolola lizoho lahae kuswala kwa Aleka, kakuli likomu nelibatile kuiwisa. 10  Buhali bwa Jehova kiha butukela Uza, mi amubulaya kakuli naaotolozi lizoho lahae kuswala kwa Aleka,+ mi ashwela honafo fapilaa Mulimu.+ 11  Kono Davida afilikana* kabakala kuli buhali bwa Jehova nebutukezi Uza; mi sibaka seo sabizwa Perezi-uza* kufitela ni la kacenu le. 12  Ka mukwa ocwalo, Davida asaba Mulimu wa niti ka lizazi leo mi ali: “Nikatisa cwañi Aleka ya Mulimu wa niti ku na?”+ 13  Davida naasika tisa Aleka mwa Muleneñi wa Davida mwanaapila, kono alukisa kuli iiswe kwa ndu ya Obedi-edomo wa Mugiti. 14  Aleka ya Mulimu wa niti yaina ku ba ndu ya Obedi-edomo, neiinzi mwa ndu yahae ka likweli zetaalu, mi Jehova azwelapili kufuyola ba ndu ya Obedi-edomo ni zahae kaufela.+

Litaluso ze kwatasi

Kamba “kukalela kwa Shihore.”
Kamba “kwa munyako wa Hamati.”
Kamba mwendi, “mwahalaa.”
Kamba “anyema.”
Lelitalusa “Buhali Butukezi Uza.”