ຈາກປົກ | ຄຳຕົວະທີ່ເຮັດໃຫ້ມະນຸດບໍ່ຢາກຮັກພະເຈົ້າ
ເປັນຫຍັງຈຶ່ງຍາກທີ່ຈະຮັກພະເຈົ້າ?
“‘ເຈົ້າຕ້ອງຮັກພະເຢໂຫວາພະເຈົ້າຂອງເຈົ້າສຸດຫົວໃຈ ສຸດຊີວິດ ແລະສຸດຄວາມຄິດ.’ ນີ້ເປັນກົດໝາຍຂໍ້ສຳຄັນທີ່ສຸດແລະເປັນຂໍ້ທຳອິດ.”—ພະເຢຊູຄລິດ ປີ ຄ.ສ 33 a
ບາງຄົນຮູ້ສຶກວ່າຍາກທີ່ຈະຮັກພະເຈົ້າ. ສຳລັບເຂົາເຈົ້າແລ້ວ ພະເຈົ້າເບິ່ງຄືວ່າລຶກລັບ ຫ່າງໄກ ຫຼືເຖິງກັບໂຫດຮ້າຍນຳ. ລອງມາຟັງຄວາມຄິດເຫັນຕໍ່ໄປນີ້:
“ຂ້ອຍອະທິດຖານຂໍໃຫ້ພະເຈົ້າຊ່ວຍ ແຕ່ໃນຂະນະດຽວກັນ ຂ້ອຍກໍຮູ້ສຶກວ່າເພິ່ນຢູ່ໄກເກີນໄປ ແລະເຂົ້າເຖິງໄດ້ຍາກ. ສຳລັບຂ້ອຍແລ້ວ ເພິ່ນເປັນພະເຈົ້າທີ່ເຢັນຊາແລະບໍ່ສົນໃຈເຮົາ.”—ມາໂຄ, ອີຕາລີ.
“ເຖິງວ່າຂ້ອຍຢາກຮັບໃຊ້ພະເຈົ້າສຸດຫົວໃຈ ແຕ່ເບິ່ງຄືວ່າເພິ່ນຢູ່ຫ່າງໄກໂພດ. ຂ້ອຍຄິດວ່າເພິ່ນເປັນພະເຈົ້າທີ່ໂຫດຮ້າຍແລະມັກລົງໂທດມະນຸດ. ຂ້ອຍບໍ່ເຊື່ອວ່າເພິ່ນຈະມີຄວາມອົບອຸ່ນແລະຄວາມອ່ອນໂຍນ.”—ໂຣຊາ, ກົວເຕມາລາ.
“ຕອນຍັງນ້ອຍ ຂ້ອຍຄິດວ່າພະເຈົ້າຖ້າຈອບຈັບຜິດມະນຸດ ແລະພ້ອມຈະລົງໂທດເຮົາທຸກເວລາ. ຕອນໃຫຍ່ຂຶ້ນ ຂ້ອຍພັດຮູ້ສຶກວ່າເພິ່ນຢູ່ສູງເກີນໄປ. ພະເຈົ້າເປັນຄືກັບນາຍົກລັດຖະມົນຕີທີ່ມີໜ້າທີ່ຈັດການບັນຫາຕ່າງໆໃຫ້ປະຊາຊົນ ແຕ່ບໍ່ໄດ້ສົນໃຈເຂົາເຈົ້າແທ້.”—ເຣມົນ, ການາດາ.
ເຈົ້າເດຄິດແນວໃດ? ເປັນເລື່ອງຍາກແທ້ໆບໍທີ່ຈະຮັກພະເຈົ້າ? ຜູ້ທີ່ເປັນຄລິດສະຕຽນຖາມຄຳຖາມນີ້ມາຫຼາຍສະຕະວັດແລ້ວ. ໃນຍຸກກາງ ສະມາຊິກສ່ວນໃຫຍ່ຂອງຄລິດສາສະໜາຈັກເຖິງກັບເຊົາອະທິດຖານຕໍ່ພະເຈົ້າທີ່ຍິ່ງໃຫຍ່ສູງສຸດ. ຍ້ອນຫຍັງ? ຍ້ອນເຂົາເຈົ້າຢ້ານຈົນບໍ່ກ້າເຂົ້າໃກ້ເພິ່ນ. ນັກປະຫວັດສາດ ວິວ ດູແຣນບອກວ່າ: “ຄົນທົ່ວໄປທີ່ເປັນຄົນບາບຈະກ້າອະທິດຖານເຖິງພະເຈົ້າທີ່ເປັນຕາຢ້ານແລະຢູ່ຫ່າງໄກຈາກມະນຸດໄດ້ແນວໃດ?”
ເປັນຫຍັງຫຼາຍຄົນເບິ່ງວ່າພະເຈົ້າ “ເປັນຕາຢ້ານແລະຢູ່ຫ່າງໄກ”? ແທ້ໆແລ້ວ ຄຳພີໄບເບິນສອນແນວໃດກ່ຽວກັບພະເຈົ້າ? ການຮູ້ຄວາມຈິງກ່ຽວກັບພະເຈົ້າຈະຊ່ວຍເຈົ້າໃຫ້ຮັກເພິ່ນໄດ້ບໍ?
