ເມື່ອຄົນທີ່ເຈົ້າຮັກຕາຍ
ຖ້າເຈົ້າເຄີຍສູນເສຍຄົນທີ່ຮັກ ເຈົ້າເອງກະຄືຊິມີຄວາມຮູ້ສຶກຫຼາຍຢ່າງ ນັບຕັ້ງແຕ່ໂສກເສົ້າເສຍໃຈ ໂດດດ່ຽວ ແລະໝົດແຮງ. ບາງເທື່ອເຈົ້າອາດຮູ້ສຶກໃຈຮ້າຍ ຮູ້ສຶກຜິດ ແລະຢ້ານ. ເຈົ້າອາດເຖິງຂັ້ນຄິດວ່າ ຂ້ອຍຄວນມີຊີວິດຢູ່ຕໍ່ໄປບໍ.
ຂໍໃຫ້ຮູ້ວ່າການທີ່ເຈົ້າໂສກເສົ້າບໍ່ໄດ້ໝາຍຄວາມວ່າເຈົ້າອ່ອນແອ. ແຕ່ນັ້ນສະແດງໃຫ້ເຫັນວ່າເຈົ້າຮັກຄົນທີ່ຕາຍຫຼາຍແທ້ໆ. ແນວໃດກໍຕາມ ມີວິທີໃດບໍທີ່ຈະຊ່ວຍເຈົ້າໃຫ້ຮັບມືກັບຄວາມໂສກເສົ້າໄດ້?
ວິທີທີ່ບາງຄົນຮັບມື
ເຈົ້າອາດຮູ້ສຶກວ່າຄວາມເຈັບປວດຂອງເຈົ້າຈະບໍ່ມີວັນໝົດໄປ ແຕ່ຖ້າເຈົ້າເຮັດຕາມຄຳແນະນຳຕໍ່ໄປນີ້ ເຈົ້າອາດຮູ້ສຶກດີຂຶ້ນກະໄດ້.
ໃຫ້ເວລາໂຕເອງໄດ້ໂສກເສົ້າເສຍໃຈ
ແຕ່ລະຄົນອາດສະແດງຄວາມໂສກເສົ້າເສຍໃຈຕ່າງກັນແລະອາດໃຊ້ເວລາບໍ່ທໍ່ກັນ. ແນວໃດກໍຕາມ ການຮ້ອງໄຫ້ອາດເຮັດໃຫ້ເຈົ້າໄດ້ປົດປ່ອຍຄວາມຮູ້ສຶກເຈັບປວດອອກມາ. ວາເນຊ້າທີ່ເວົ້າເຖິງກ່ອນໜ້ານີ້ເວົ້າວ່າ: “ຂ້ອຍຮ້ອງໄຫ້ເພື່ອປົດປ່ອຍຄວາມຮູ້ສຶກເຈັບປວດອອກມາ.” ໂຊເຟຍທີ່ນ້ອງສາວຕາຍກະທັນຫັນເວົ້າວ່າ: “ມັນເຈັບປວດຫຼາຍແທ້ໆເມື່ອຄິດເຖິງສິ່ງທີ່ໄດ້ເກີດຂຶ້ນ ແຕ່ມັນຊ່ວຍຂ້ອຍໃຫ້ຍອມຮັບຄວາມຈິງແລະເຮັດໃຫ້ຂ້ອຍຮູ້ສຶກດີຂຶ້ນ. ມັນເປັນຄືກັບເຮົາເອົາຜ້າພັນບາດອອກ ແລ້ວເອົາເຫຼົ້າເກົ້າສິບລ້າງບາດທີ່ອັກເສບ. ມັນແສບອີ່ຫຼີຈົນເກືອບອົດບໍ່ໄດ້ ແຕ່ໃນທີ່ສຸດການເຮັດແບບນັ້ນກໍຊ່ວຍໃຫ້ບາດຄ່ອຍໆເຊົາ.”
ບອກຄົນອື່ນວ່າເຈົ້າຄິດແລະຮູ້ສຶກແນວໃດ
ເປັນເລື່ອງທີ່ເຂົ້າໃຈໄດ້ທີ່ບາງເທື່ອເຈົ້າຢາກຢູ່ຄົນດຽວ. ແຕ່ການແບກຄວາມທຸກໄວ້ຄົນດຽວກໍເປັນຄືກັບວ່າເຈົ້າພະຍາຍາມແບກເຄື່ອງທີ່ໜັກໆດ້ວຍໂຕເອງ. ຈາເຣັດທີ່ອາຍຸ 17 ປີເຊິ່ງພໍ່ຂອງລາວຕາຍໄດ້ເວົ້າວ່າ: “ຂ້ອຍບອກຄົນອື່ນວ່າຮູ້ສຶກແນວໃດ. ຕອນນັ້ນຂ້ອຍບໍ່ແນ່ໃຈວ່າເຂົາເຈົ້າເຂົ້າໃຈສິ່ງທີ່ຂ້ອຍເວົ້າຫຼືບໍ່ ແຕ່ຂ້ອຍກໍຮູ້ສຶກດີທີ່ໄດ້ເວົ້າອອກໄປ.” ເຈນິດສ໌ທີ່ເວົ້າເຖິງໃນບົດຄວາມທຳອິດເວົ້າເຖິງປະໂຫຍດອີກຢ່າງໜຶ່ງວ່າ: “ການທີ່ຂ້ອຍໄດ້ບອກຜູ້ໃດຜູ້ໜຶ່ງວ່າຮູ້ສຶກແນວໃດກໍເຮັດໃຫ້ຂ້ອຍຮູ້ສຶກດີຂຶ້ນແລ້ວ. ມັນເຮັດໃຫ້ຂ້ອຍຮູ້ສຶກວ່າຄົນອື່ນເຂົ້າໃຈຂ້ອຍ ແລະຂ້ອຍບໍ່ຕ້ອງທົນກັບຄວາມເຈັບປວດຜູ້ດຽວ.”
ຍອມຮັບຄວາມຊ່ວຍເຫຼືອ
ທ່ານໝໍຄົນໜຶ່ງເວົ້າວ່າ: “ເມື່ອຄົນທີ່ສູນເສຍຍອມໃຫ້ໝູ່ແລະຍາດຕິພີ່ນ້ອງຊ່ວຍເຫຼືອເຂົາເຈົ້າທັນທີຫຼັງຈາກຄົນທີ່ຮັກຕາຍ ສ່ວນຫຼາຍແລ້ວເຂົາເຈົ້າຈະອົດທົນກັບຄວາມເຈັບປວດແລະຜ່ານເລື່ອງຮ້າຍໆແບບນັ້ນໄດ້ງ່າຍຂຶ້ນ.” ບອກໃຫ້ໝູ່ຮູ້ວ່າເຈົ້າຢາກໃຫ້ເຂົາເຈົ້າຊ່ວຍຫຍັງ. ທີ່ຈິງ ເຂົາເຈົ້າຄືຊິຢາກຊ່ວຍ ແຕ່ອາດບໍ່ຮູ້ວ່າຈະຊ່ວຍແນວໃດ.—ສຸພາສິດ 17:17
ໃກ້ຊິດກັບພະເຢໂຫວາພະເຈົ້າໃຫ້ຫຼາຍຂຶ້ນ
ທິນ້າບອກວ່າ: “ຕອນທີ່ຜົວຂ້ອຍຕາຍກະທັນຫັນຍ້ອນເປັນມະເຮັງ ຂ້ອຍກໍບໍ່ສາມາດເລົ່າບັນຫາ ຄວາມກັງວົນ ແລະຄວາມຮູ້ສຶກຂອງຂ້ອຍໃຫ້ລາວຟັງໄດ້ອີກຕໍ່ໄປ. ຂ້ອຍຈຶ່ງເວົ້າທຸກຢ່າງກັບພະເຢໂຫວາ. ທຸກໆເຊົ້າ ຂ້ອຍຈະຂໍໃຫ້ເພິ່ນຊ່ວຍຂ້ອຍໃຫ້ຜ່ານມື້ນັ້ນໄປໄດ້. ພະເຢໂຫວາຊ່ວຍຂ້ອຍຫຼາຍຢ່າງແທ້ໆຈົນຂ້ອຍເລົ່າບໍ່ໄດ້ໝົດ.” ທາຊ້າທີ່ແມ່ຕາຍຕອນລາວອາຍຸ 22 ປີເວົ້າວ່າ: “ການອ່ານຄຳພີໄບເບິນທຸກມື້ຊ່ວຍຂ້ອຍໃຫ້ຮູ້ສຶກດີຂຶ້ນແລະເຮັດໃຫ້ຂ້ອຍຄິດເຖິງເລື່ອງດີໆທີ່ໃຫ້ກຳລັງໃຈ.”
ນຶກພາບຕອນທີ່ພະເຢໂຫວາປຸກຄົນຕາຍໃຫ້ຟື້ນຄືນມາ
ທິນ້າເວົ້າຕໍ່ວ່າ: “ຕອນທຳອິດ ເລື່ອງການຟື້ນຄືນມາຈາກຕາຍບໍ່ໄດ້ຊ່ວຍປອບໂຍນຂ້ອຍເລີຍ ຍ້ອນຂ້ອຍກັບລູກຊາຍ 3 ຄົນຕ້ອງການລາວດຽວນີ້. ແຕ່ຕອນນີ້ຂ້ອຍຍຶດໝັ້ນກັບຄວາມຫວັງນີ້ ແລະມັນຊ່ວຍຊີວິດຂ້ອຍໄວ້ເຖິງວ່າຈະຜ່ານໄປ 4 ປີແລ້ວ. ການນຶກພາບວ່າຈະໄດ້ເຈິກັບລາວອີກເຮັດໃຫ້ຂ້ອຍສະຫງົບໃຈແລະມີຄວາມສຸກຫຼາຍແທ້ໆ!”
ເຈົ້າອາດຈະບໍ່ໄດ້ເຊົາໂສກເສົ້າເສຍໃຈທັນທີ. ແຕ່ປະສົບການຂອງວາເນຊ້າສາມາດໃຫ້ກຳລັງໃຈເຈົ້າໄດ້. ລາວເວົ້າວ່າ: “ເຈົ້າຄິດວ່າບໍ່ມີທາງທີ່ຈະຮູ້ສຶກດີຂຶ້ນໄດ້ ແຕ່ທີ່ຈິງແລ້ວເມື່ອເວລາຜ່ານໄປເຈົ້າຈະຄ່ອຍໆດີຂຶ້ນ.”
ຂໍໃຫ້ຈື່ໄວ້ວ່າ ເຖິງວ່າເຈົ້າອາດຈະຍັງເຈັບປວດຈາກການສູນເສຍ ແຕ່ຊີວິດເຈົ້າຍັງມີຄ່າແລະເຈົ້າຄວນມີຊີວິດຢູ່ຕໍ່ໄປ. ພະເຢໂຫວາພະເຈົ້າຈະຊ່ວຍເຈົ້າດ້ວຍຄວາມຮັກ. ແລ້ວເຈົ້າຈະມີຄວາມສຸກກັບສາຍສຳພັນທີ່ດີກັບຄົນອື່ນແລະມີຊີວິດທີ່ມີຄວາມໝາຍຕໍ່ໆໄປ. ອີກຈັກໜ້ອຍ ພະເຢໂຫວາຈະປຸກຄົນຕາຍໃຫ້ຟື້ນຄືນມາ. ເພິ່ນຢາກໃຫ້ເຈົ້າໄດ້ກອດຄົນທີ່ເຈົ້າຮັກອີກ. ແລ້ວຄວາມເຈັບປວດໃນໃຈຂອງເຈົ້າຈະຫາຍໄປຕະຫຼອດການເລີຍ!
ເລື່ອງທີ່ເຈົ້າອາດຈະມັກ
ຖາມ-ຕອບເລື່ອງຄຳພີໄບເບິນ
ການຄືນມາຈາກຕາຍແມ່ນຫຍັງ?
ເຈົ້າອາດແປກໃຈທີ່ຈະມີການປຸກຄົນໃຫ້ຄືນມາຈາກຕາຍໃນໂລກໃໝ່.
