ສຳລັບຜົວເມຍ
1: ໃຫ້ຖືວ່າຊີວິດຄູ່ເປັນເລື່ອງທີ່ສຳຄັນ
ໝາຍຄວາມວ່າແນວໃດ?
ຜົວເມຍທີ່ຖືວ່າຊີວິດຄູ່ເປັນເລື່ອງທີ່ສຳຄັນຈະຄິດວ່າຄວາມຜູກພັນຂອງເຂົາເຈົ້າຕ້ອງແໜ້ນແຟ້ນຢູ່ສະເໝີ ແລະການຄິດແບບນີ້ເຮັດໃຫ້ເຂົາເຈົ້າຮູ້ສຶກໝັ້ນຄົງ. ເຂົາເຈົ້າໝັ້ນໃຈວ່າບໍ່ວ່າຈະເກີດຫຍັງຂຶ້ນ ເຂົາເຈົ້າກໍຈະຢູ່ນຳກັນຕະຫຼອດໄປ.
ບາງຄູ່ຕ້ອງອົດທົນຢູ່ນຳກັນຍ້ອນຖືກສັງຄົມແລະຄົນໃນຄອບຄົວກົດດັນ. ແຕ່ຈະດີກວ່າຫຼາຍຖ້າທັງສອງຄົນຢູ່ນຳກັນຍ້ອນຮັກແລະນັບຖືກັນ.
ຄຳແນະນຳໃນຄຳພີໄບເບິນ: “ຜົວກໍຢ່າໄປຈາກເມຍ.”—1 ໂກຣິນໂທ 7:11
“ຖ້າເຈົ້າຖືວ່າຊີວິດຄູ່ເປັນເລື່ອງທີ່ສຳຄັນ ເຈົ້າກໍຈະບໍ່ໃຈຮ້າຍງ່າຍ ແຕ່ຈະຟ້າວໃຫ້ອະໄພແລະຟ້າວຂໍໂທດກັນ. ເຈົ້າຈະເບິ່ງວ່າບັນຫາເປັນພຽງອຸປະສັກ ບໍ່ແມ່ນສາເຫດທີ່ຈະເຮັດໃຫ້ປະກັນ.”—ໄມກ້າ
ເປັນຫຍັງຈຶ່ງສຳຄັນ?
ເມື່ອມີບັນຫາ ຄົນທີ່ບໍ່ຖືວ່າຊີວິດຄູ່ເປັນເລື່ອງທີ່ສຳຄັນກໍຈະສະຫຼຸບງ່າຍໆວ່າ ‘ເຮົາບໍ່ໄດ້ເກີດມາຄູ່ກັນ’ ແລະເຂົາເຈົ້າຈະຊອກວິທີປະກັນ.
“ຫຼາຍຄົນແຕ່ງດອງໂດຍຄິດໄວ້ກ່ອນແລ້ວວ່າລາວມີ ‘ແຜນສຳຮອງ’ ນັ້ນຄື ຖ້າຢູ່ນຳກັນບໍ່ລອດກໍປະກັນໂລດ. ຄົນທີ່ຄິດເຖິງເລື່ອງຢ່າຮ້າງຕັ້ງແຕ່ກ່ອນຈະແຕ່ງດອງກໍບໍ່ໄດ້ຖືວ່າຊີວິດຄູ່ເປັນເລື່ອງທີ່ສຳຄັນຕັ້ງແຕ່ທຳອິດແລ້ວ.”—ຈີນ
ເຈົ້າສາມາດເຮັດຫຍັງໄດ້?
ກວດເບິ່ງໂຕເອງ
ຕອນທີ່ຜິດກັນ . . .
-
ເຈົ້າຮູ້ສຶກເສຍໃຈບໍທີ່ແຕ່ງດອງກັບຜູ້ນີ້?
-
ເຈົ້າຢາກໄປຢູ່ກັບຄົນອື່ນບໍ?
-
ເຈົ້າເວົ້າບໍວ່າ “ເຮົາປະກັນດີກວ່າ” ຫຼື “ຂ້ອຍຊິໄປຊອກຫາຄົນໃໝ່ທີ່ເຫັນຄ່າໃນໂຕຂ້ອຍ”?
ຖ້າເຈົ້າຕອບວ່າແມ່ນຢ່າງໜ້ອຍ 1 ຂໍ້ກໍສະແດງວ່າຕອນນີ້ເປັນເວລາທີ່ເຈົ້າຕ້ອງຖືວ່າຊີວິດຄູ່ເປັນເລື່ອງທີ່ສຳຄັນ.
ລົມກັບຄູ່ຂອງເຈົ້າ
-
ສາຍສຳພັນໃນຊີວິດຄູ່ຂອງເຮົາຍັງແໜ້ນແຟ້ນຄືເກົ່າບໍ? ຖ້າບໍ່ ເປັນຍ້ອນຫຍັງ?
-
ເຮົາເຮັດຫຍັງໄດ້ແດ່ໃນຕອນນີ້ເພື່ອເຮັດໃຫ້ຊີວິດຄູ່ແໜ້ນແຟ້ນຫຼາຍຂຶ້ນ?
ລອງເຮັດເບິ່ງ
-
ຂຽນຂໍ້ຄວາມຫວານໆໃຫ້ຄູ່ຂອງເຈົ້າເປັນບາງເທື່ອ
-
ເຮັດໃຫ້ເຫັນວ່າຊີວິດຄູ່ຂອງເຈົ້າສຳຄັນໂດຍຕັ້ງຮູບຄູ່ໄວ້ເທິງໂຕະເຮັດວຽກຫຼືເອົາຮູບໄວ້ໃນກະເປົາເງິນ
-
ໂທລະສັບຫຼືສົ່ງຂໍ້ຄວາມຫາຄູ່ຂອງເຈົ້າທຸກມື້ຕອນເຈົ້າໄປເຮັດວຽກຫຼືບໍ່ໄດ້ຢູ່ນຳກັນ
ຄຳແນະນຳໃນຄຳພີໄບເບິນ: “ເມື່ອພະເຈົ້າໃຫ້ 2 ຄົນມາຢູ່ນຳກັນແລ້ວກໍຢ່າໃຫ້ມະນຸດເຮັດໃຫ້ແຍກຈາກກັນ.”—ມັດທາຍ 19:6
