ວຽກຂອງພະຍານພະເຢໂຫວາໄດ້ຮັບການສະໜັບສະໜູນດ້ານການເງິນແນວໃດ?

ເປີດ

ວຽກທົ່ວໂລກຂອງເຮົາໄດ້ຮັບການສະໜັບສະໜູນທາງດ້ານການເງິນໂດຍການບໍລິຈາກດ້ວຍຄວາມສະໝັກໃຈຈາກພະຍານພະເຢໂຫວາແຕ່ລະຄົນ. a ມີການຕັ້ງກ່ອງບໍລິຈາກໄວ້ໃນບ່ອນທີ່ເຮົາປະຊຸມ ແລະຍັງມີການບໍລິຈາກໂດຍວິທີອື່ນໆເຊິ່ງບອກໄວ້ໃນໜ້າເວັບໄຊເລື່ອງການບໍລິຈາກ. ໃນໜ້າເວັບໄຊນັ້ນມີທາງເລືອກຕ່າງໆທີ່ເຮົາສາມາດເລືອກບໍລິຈາກສຳລັບວຽກທົ່ວໂລກ ສຳລັບຫໍປະຊຸມທ້ອງຖິ່ນ ຫຼືບໍລິຈາກສຳລັບທັງສອງກໍໄດ້.

ພະຍານພະເຢໂຫວາບໍ່ຈຳເປັນຕ້ອງໃຫ້ສິບເປີເຊັນຂອງລາຍໄດ້ ຫຼືບໍ່ຈຳເປັນຕ້ອງບໍລິຈາກຈຳນວນເງິນທີ່ສະເພາະເຈາະຈົງ. (2 ໂກຣິນໂທ 9:7) ເຮົາບໍ່ເຄີຍແຜ່ເງິນ ບໍ່ເກັບຄ່າເຂົ້າປະຊຸມ ບໍ່ເກັບຄ່າຮັບບັບເຕມາ ຄ່າງານສົບແລະງານດອງ ຫຼືກິດຈະກຳອື່ນໆທາງສາສະໜາ. ເຮົາບໍ່ລະດົມເງິນທຶນຈາກການຂາຍເຂົ້າໜົມ ຂາຍເຄື່ອງ ຂາຍຂອງກິນ ແລ່ນມາລະທອນ ງານກິນລ້ຽງ ຫຼືກິດຈະກຳອື່ນໆ. ເຮົາບໍ່ປະກາດຊື່ ຫຼືບໍ່ເປີດເຜີຍຊື່ຂອງຜູ້ບໍລິຈາກ. (ມັດທາຍ 6:2-4) ເວັບໄຊແລະປຶ້ມຕ່າງໆຂອງເຮົາບໍ່ມີການໂຄສະນາເພື່ອຫາລາຍໄດ້.

ປະຊາຄົມຂອງພະຍານພະເຢໂຫວາແຕ່ລະບ່ອນຈະລາຍງານການເງິນທຸກເດືອນໃນການປະຊຸມເຊິ່ງທຸກຄົນສາມາດຮູ້ໄດ້. ບັນທຶກຕ່າງໆຂອງບັນຊີໃນແຕ່ລະປະຊາຄົມມີການກວດສອບເປັນປະຈຳເພື່ອເຮັດໃຫ້ແນ່ໃຈວ່າມີການໃຊ້ເງິນບໍລິຈາກຢ່າງເໝາະສົມ.—2 ໂກຣິນໂທ 8:20, 21

ວິທີຕ່າງໆໃນການບໍລິຈາກ

ກ່ອງບໍລິຈາກ: ເຈົ້າສາມາດປ່ອນເງິນຫຼືເຊັກໄດ້ໃນກ່ອງບໍລິຈາກຢູ່ຫໍປະຊຸມ ຫໍປະຊຸມໃຫຍ່ ຫຼືບ່ອນອື່ນໆທີ່ເຮົາຈັດການປະຊຸມ.
ການບໍລິຈາກແບບອອນລາຍ: ໃນຫຼາຍປະເທດ ເຈົ້າອາດໃຊ້ໜ້າເວັບໄຊ “ບໍລິຈາກໃຫ້ພະຍານພະເຢໂຫວາ” ເພື່ອບໍລິຈາກໂດຍທາງບັດເຄຣດິດ ບັດເດບິດ ໂອນເງິນຜ່ານທະນາຄານ ຫຼືຮູບແບບເອເລັກໂຕຣນິກອື່ນໆ. b ພະຍານພະເຢໂຫວາບາງຄົນເລືອກທີ່ຈະ “ແບ່ງເງິນໄວ້” ແຕ່ລະເດືອນເພື່ອຈະບໍລິຈາກໄດ້ເປັນປະຈຳໂດຍໃຊ້ວິທີໃດວິທີໜຶ່ງທີ່ເວົ້າມານີ້.—1 ໂກຣິນໂທ 16:2
ການໃຫ້ແບບກຽມໄວ້ລ່ວງໜ້າ: ການບໍລິຈາກບາງແບບຕ້ອງວາງແຜນໄວ້ລ່ວງໜ້າ ຫຼືຕ້ອງປຶກສາດ້ານກົດໝາຍ. ການວາງແຜນແບບນັ້ນອາດເຮັດໃຫ້ເຈົ້າໄດ້ປະໂຫຍດດ້ານພາສີ-ອາກອນໃນປະເທດຂອງເຈົ້າ. ຫຼາຍຄົນໄດ້ຮັບປະໂຫຍດເມື່ອເຂົ້າໃຈຫຼາຍຂຶ້ນກ່ຽວກັບການບໍລິຈາກໃນປະເທດຂອງເຂົາເຈົ້າ ເຊິ່ງເຂົາເຈົ້າອາດເລືອກທີ່ຈະບໍລິຈາກຕອນທີ່ຍັງມີຊີວິດຢູ່ ຫຼືໃຫ້ມີການບໍລິຈາກຕອນທີ່ເຂົາເຈົ້າເສຍຊີວິດ. ຂໍໃຫ້ຕິດຕໍ່ກັບສຳນັກງານສາຂາຂອງພະຍານພະເຢໂຫວາໃນປະເທດຂອງເຈົ້າ ຖ້າເຈົ້າຕ້ອງການບໍລິຈາກໃນສິ່ງທີ່ກ່ຽວຂ້ອງກັບເລື່ອງຕໍ່ໄປນີ້:
- ບັນຊີທະນາຄານ
- ເງິນປະກັນແລະເງິນບຳນານ
- ອະສັງຫາລິມະຊັບ
- ຫຸ້ນແລະພັນທະບັດ
- ພິໄນກຳ