ພະເຢຊູຕາຍເທິງໄມ້ກາງເຂນບໍ?
ຄຳຕອບຈາກຄຳພີໄບເບິນ
ຫຼາຍຄົນຄິດວ່າໄມ້ກາງເຂນແມ່ນສັນຍະລັກຂອງສາສະໜາຄລິດ. ແຕ່ຄຳພີໄບເບິນບໍ່ໄດ້ອະທິບາຍວ່າເຄື່ອງມືທີ່ໃຊ້ປະຫານພະເຢຊູມີລັກສະນະແນວໃດ ສະນັ້ນຈຶ່ງບໍ່ມີໃຜຮູ້ແທ້ໆວ່າພະເຢຊູຕາຍເທິງເສົາທໍລະມານແບບໃດ. ແນວໃດກໍຕາມ ຄຳພີໄບເບິນບອກໃຫ້ຮູ້ວ່າພະເຢຊູບໍ່ໄດ້ຕາຍເທິງໄມ້ກາງເຂນ ແຕ່ເປັນເສົາທຳມະດາຕົ້ນໜຶ່ງ.
ຄຳພີໄບເບິນມັກໃຊ້ຄຳພາສາກຣີກສະເຕົາຣອດສ໌ ເມື່ອເວົ້າເຖິງເຄື່ອງມືທີ່ໃຊ້ປະຫານພະເຢຊູ. (ມັດທາຍ 27:40; ໂຢຮັນ 19:17) ເຖິງວ່າຄຳພີໄບເບິນຫຼາຍສະບັບຈະແປຄຳນີ້ວ່າ “ໄມ້ກາງເຂນ” ແຕ່ນັກວິຊາການດ້ານຄຳພີໄບເບິນຫຼາຍຄົນເຫັນດີວ່າທີ່ຈິງແລ້ວຄຳນີ້ໝາຍເຖິງ “ເສົາທີ່ຕັ້ງຊື່.” a ປຶ້ມ A Critical Lexicon and Concordance to the English and Greek New Testament ບອກວ່າ ຄຳສະເຕົາຣອດສ໌ “ບໍ່ເຄີຍໝາຍເຖິງໄມ້ 2 ທ່ອນພາດໄຂວ່ກັນ.”
ບາງເທື່ອຄຳພີໄບເບິນໃຊ້ຄຳພາສາກຣີກອີກຄຳໜຶ່ງທີ່ມີຄວາມໝາຍຄືກັບຄຳວ່າສະເຕົາຣອດສ໌ ນັ້ນຄືຄຳວ່າຊີລອນ. (ກິດຈະການ 5:30; 1 ເປໂຕ 2:24) ຄຳນີ້ໝາຍເຖິງ “ໄມ້” “ທ່ອນໄມ້” “ເສົາ” ຫຼື “ຕົ້ນໄມ້.” b ປຶ້ມ The Companion Bible ຈຶ່ງສະຫຼຸບວ່າ: “ຄຳພາສາກຣີກທີ່ໃຊ້ໃນ [ພະຄຳພີພາກພັນທະສັນຍາໃໝ່] ບໍ່ໄດ້ໝາຍເຖິງໄມ້ 2 ທ່ອນເລີຍ.”
ພະເຈົ້າຍອມຮັບການນະມັດສະການໂດຍໃຊ້ໄມ້ກາງເຂນບໍ?
ຄຣຸກຊ໌ ຊິມແພັກຊ໌ ເປັນພາສາລາຕິນໝາຍເຖິງ ເສົາທ່ອນດຽວທີ່ໃຊ້ຄຶງຄົນທີ່ເຮັດຜິດຮ້າຍແຮງ
ບໍ່ວ່າພະເຢຊູຈະຕາຍດ້ວຍເຄື່ອງປະຫານແບບໃດກໍຕາມ ຄຳພີໄບເບິນກໍບໍ່ສະໜັບສະໜູນເຮົາໃຫ້ໃຊ້ໄມ້ກາງເຂນໃນການນະມັດສະການພະເຈົ້າ ຍ້ອນເຫດຜົນຕໍ່ໄປນີ້:
ພະເຈົ້າບໍ່ຍອມຮັບການນະມັດສະການທີ່ໃຊ້ຮູບບູຊາຫຼືສັນຍະລັກຕ່າງໆລວມທັງໄມ້ກາງເຂນນຳ. ພະເຈົ້າສັ່ງຄົນອິດສະຣາເອນວ່າ ຢ່າໃຊ້ “ຮູບຫຍັງກໍຕາມ” ໃນການນະມັດສະການ ແລະຄລິດສະຕຽນກໍໄດ້ຮັບຄຳສັ່ງຄ້າຍໆກັນວ່າ “ຢ່າຫຍຸ້ງກ່ຽວກັບການຂາບໄຫວ້ຮູບບູຊາ.”—ພະບັນຍັດ 4:15-19; 1 ໂກຣິນໂທ 10:14
ຄລິດສະຕຽນລຸ້ນທຳອິດບໍ່ໄດ້ໃຊ້ໄມ້ກາງເຂນໃນການນະມັດສະການ. c ຄລິດສະຕຽນທຸກຄົນຄວນເຮັດຕາມຄຳສອນແລະຕົວຢ່າງຂອງພວກອັກຄະສາວົກ.—2 ເທຊະໂລນິກ 2:15
ການໃຊ້ໄມ້ກາງເຂນມີຕົ້ນຕໍມາຈາກສາສະໜານອກຮີດ. d ຫຼາຍຮ້ອຍປີຫຼັງຈາກພະເຢຊູຕາຍ ໂບດຕ່າງໆໄດ້ບິດເບືອນຄຳສອນຂອງເພິ່ນ ສະມາຊິກໃໝ່ຂອງໂບດ “ໄດ້ຮັບອະນຸຍາດໃຫ້ໃຊ້ເຄື່ອງໝາຍແລະສັນຍະລັກແບບນອກຮີດທີ່ເຂົາເຈົ້າເຄີຍໃຊ້ຕໍ່ໄປ” ເຊິ່ງລວມເຖິງໄມ້ກາງເຂນນຳ. (The Expanded Vine’s Expository Dictionary of New Testament Words ) ແຕ່ຄຳພີໄບເບິນບໍ່ສະໜັບສະໜູນໃຫ້ໃຊ້ເຄື່ອງໝາຍຂອງສາສະໜານອກຮີດເພື່ອຈູງໃຈໃຫ້ຄົນເຂົ້າມາເປັນຄລິດສະຕຽນ.—2 ໂກຣິນໂທ 6:17
a ເບິ່ງປຶ້ມ New Bible Dictionary ສະບັບພິມຄັ້ງທີ 3 ທີ່ຮຽບຮຽງໂດຍ ດີ. ອາ. ດັບເບິນຢູ. ວູດ ໜ້າ 245; ປຶ້ມ Theological Dictionary of the New Testament ເຫຼັ້ມທີ 7 ໜ້າ 572; ປຶ້ມ The International Standard Bible Encyclopedia ສະບັບປັບປຸງ ເຫຼັ້ມທີ 1 ໜ້າ 825 ແລະປຶ້ມ The Imperial Bible-Dictionary ເຫຼັ້ມທີ 2 ໜ້າ 84.
b ເບິ່ງປຶ້ມ The Expanded Vine’s Expository Dictionary of New Testament Words ໜ້າ 1165; ປຶ້ມ A Greek-English Lexicon ຂຽນໂດຍລິດເດວແລະສະກ໋ອດ ສະບັບພິມຄັ້ງທີ 9 ໜ້າ 1191-1192 ແລະປຶ້ມ Theological Dictionary of the New Testament ເຫຼັ້ມທີ 5 ໜ້າ 37.
c ເບິ່ງປຶ້ມສາລານຸກົມບຣິແທນນິກາ ປີ 2003 ຫົວຂໍ້ “ໄມ້ກາງເຂນ”; ປຶ້ມ The Cross—Its History and Symbolism ໜ້າ 40 ແລະປຶ້ມ The Companion Bible ສຳນັກພິມມະຫາວິທະຍາໄລອ໋ອກສ໌ຟອດ ພາກຜະໜວກ 162 ໜ້າ 186.
d ເບິ່ງປຶ້ມ The Encyclopedia of Religion ເຫຼັ້ມທີ 4 ໜ້າ 165; ປຶ້ມ The Encyclopedia Americana ເຫຼັ້ມທີ 8 ໜ້າ 246 ແລະປຶ້ມ Symbols Around Us ໜ້າ 205-207.
ເລື່ອງທີ່ເຈົ້າອາດຈະມັກ
ຄຳຖາມທີ່ພົບເລື້ອຍໆ
ເປັນຫຍັງພະຍານພະເຢໂຫວາບໍ່ໃຊ້ໄມ້ກາງເຂນໃນການນະມັດສະການ?
ເຖິງວ່າເຮົາເປັນຄລິດສະຕຽນ ແຕ່ເຮົາກໍບໍ່ໃຊ້ໄມ້ກາງເຂນໃນການນະມັດສະການ. ຍ້ອນຫຍັງ?
ຄຳສອນ
ເປັນຫຍັງພະເຍຊູຈຶ່ງຕາຍ?
ໃນຄຳພີໄບເບິນໃຫ້ຄວາມສຳຄັນຫຼາຍຕໍ່ການຕາຍຂອງພະເຍຊູ. ການຕາຍຂອງເພິ່ນມີຈຸດມຸ່ງໝາຍບໍ?
ຖາມ-ຕອບເລື່ອງຄຳພີໄບເບິນ
ເຮົາຄວນຂາບໄຫວ້ຮູບບູຊາບໍ?
ພະເຈົ້າຮູ້ສຶກແນວໃດຖ້າເຮົາໃຊ້ຮູບບູຊາຫຼືຮູບປັ້ນໃນການນະມັດສະການຂອງເຮົາ?
