ການຂ້າລ້າງເຜົ່າພັນເກີດຂຶ້ນໄດ້ແນວໃດ? ເປັນຫຍັງພະເຈົ້າຍອມໃຫ້ເກີດຂຶ້ນ?
ຫຼາຍຄົນທີ່ຖາມຄຳຖາມນີ້ເຄີຍສູນເສຍຄົນທີ່ເຂົາຮັກ ເຂົາເຈົ້າບໍ່ໄດ້ຕ້ອງການພຽງແຕ່ຄຳຕອບ ແຕ່ຕ້ອງການການປອບໃຈນຳ. ສ່ວນຄົນອື່ນໆເບິ່ງວ່າຮໍໂລຄອດສ໌ (ການຂ້າລ້າງເຜົ່າພັນຄົນຢິວ) ເປັນການກະທຳທີ່ໂຫດຮ້າຍທີ່ສຸດຂອງມະນຸດ. ເຂົາເຈົ້າຈຶ່ງບໍ່ຢາກເຊື່ອວ່າມີພະເຈົ້າເພາະຖ້າມີພະເຈົ້າແທ້ເພິ່ນຄືຊິບໍ່ປ່ອຍໃຫ້ເລື່ອງທີ່ບໍ່ດີແບບນີ້ເກີດຂຶ້ນ.
ຄວາມເຂົ້າໃຈຜິດໆກ່ຽວກັບພະເຈົ້າແລະຮໍໂລຄອດສ໌
ຄວາມຈິງຄື: ຄົນທີ່ມີຄວາມເຊື່ອໃນພະເຈົ້າເຄີຍສົງໄສວ່າເປັນຫຍັງພະເຈົ້າຍອມໃຫ້ມີຄວາມຊົ່ວ. ຕົວຢ່າງເຊັ່ນ ຜູ້ພະຍາກອນຮາບາກຸກຖາມພະເຈົ້າວ່າ: “ເປັນຫຍັງພະອົງຈຶ່ງໃຫ້ລູກເຫັນຄົນເຮັດຊົ່ວ? ເປັນຫຍັງພະອົງຈຶ່ງປ່ອຍໃຫ້ຄົນຂົ່ມເຫງກັນ? ເປັນຫຍັງພະອົງຈຶ່ງໃຫ້ລູກເຫັນຄວາມຈິບຫາຍແລະຄວາມຮຸນແຮງ? ແລະເປັນຫຍັງຈຶ່ງມີຄວາມຂັດແຍ່ງແລະການຜິດຖຽງກັນ?” (ຮາບາກຸກ 1:3, ລ.ມ) ພະເຈົ້າບໍ່ໄດ້ຕຳໜິຮາບາກຸກທີ່ລາວຖາມແບບນີ້ ແລະເພິ່ນຍັງໃຫ້ບັນທຶກຄຳຖາມຂອງລາວໄວ້ໃນຄຳພີໄບເບິນເພື່ອໃຫ້ເຮົາທຸກຄົນອ່ານນຳ.
ຄວາມຈິງຄື: ພະເຈົ້າກຽດຊັງຄວາມຊົ່ວແລະຄວາມທຸກທີ່ເກີດຈາກການກະທຳທີ່ຊົ່ວຊ້າ. (ສຸພາສິດ 6:16-19) ໃນສະໄໝຂອງໂນອາພະເຈົ້າຮູ້ສຶກ “ເສຍໃຈແລະເຈັບປວດໃຈ” ເມື່ອເຫັນຄວາມຮຸນແຮງທີ່ເກີດຂຶ້ນ. (ປະຖົມມະການ 6:5, 6) ດັ່ງນັ້ນ ບໍ່ຕ້ອງສົງໄສວ່າພະເຈົ້າອາດຕ້ອງຮູ້ສຶກເສຍໃຈຫຼາຍຕໍ່ເຫດການທີ່ເປັນຕາຢ້ານແບບຮໍໂລຄອດສ໌.—ມາລາກີ 3:6
ຄວາມຈິງຄື: ພະເຈົ້າຍອມໃຫ້ກອງທັບໂຣມມາທຳລາຍເມືອງເຢຣູຊາເລັມສະຕະວັດທຳອິດ. (ມັດທາຍ 23:37-24:2) ແນວໃດກໍຕາມ ຕັ້ງແຕ່ນັ້ນມາພະເຈົ້າບໍ່ໄດ້ມັກເຊື້ອຊາດເຜົ່າພັນໃດເປັນພິເສດ ຫຼືກຽດຊັງເຊື້ອຊາດເຜົ່າພັນໃດຈົນຕ້ອງລົງໂທດເຂົາເຈົ້າ. ສຳລັບພະເຈົ້າແລ້ວ “ທີ່ຈິງ ຄົນຢິວກັບຄົນກຣີກບໍ່ແຕກຕ່າງກັນ ເພາະທຸກຄົນມີຜູ້ເປັນນາຍອົງດຽວກັນຜູ້ທີ່ໃຈກວ້າງກັບທຸກຄົນທີ່ອ້ອນວອນພະອົງ.”—ໂຣມ 10:12
ຄວາມຈິງຄື: ພະເຈົ້າບໍ່ເຄີຍເປັນຕົ້ນເຫດຂອງຄວາມທຸກ ແຕ່ບາງເທື່ອເພິ່ນຍອມໃຫ້ເກີດຄວາມທຸກຊົ່ວຄາວ.—ຢາໂກໂບ 1:13; 5:11
ເປັນຫຍັງພະເຈົ້າຍອມໃຫ້ເກີດຮໍໂລຄອດສ໌?
ເຫດຜົນດຽວກັບທີ່ພະເຈົ້າຍອມໃຫ້ມະນຸດເຈິຄວາມທຸກ ພະເຈົ້າຍອມໃຫ້ເກີດຮໍໂລຄອດສ໌ເພື່ອແກ້ໄຂປະເດັນເລື່ອງສິດທິການປົກຄອງເຊິ່ງຖືກຍົກຂຶ້ນມາດົນແລ້ວ. ຄຳພີໄບເບິນບອກຈະແຈ້ງວ່າຕອນນີ້ມານເປັນຜູ້ປົກຄອງໂລກບໍ່ແມ່ນພະເຈົ້າ. (ລູກາ 4:1, 2, 6; ໂຢຮັນ 12:31) ມີຄວາມຈິງພື້ນຖານ 2 ຢ່າງຈາກຄຳພີໄບເບິນທີ່ຊ່ວຍອະທິບາຍວ່າເປັນຫຍັງພະເຈົ້າຍອມໃຫ້ເກີດຮໍໂລຄອດສ໌.
ພະເຈົ້າສ້າງມະນຸດໃຫ້ມີອິດສະຫຼະໃນການເລືອກ. ພະເຈົ້າບອກອາດາມກັບເອວາມະນຸດຄູ່ທຳອິດວ່າເພິ່ນຄາດໝາຍຫຍັງຈາກເຂົາເຈົ້າ ແຕ່ເພິ່ນບໍ່ໄດ້ບັງຄັບໃຫ້ເຂົາເຈົ້າເຊື່ອຟັງ. ເຂົາເຈົ້າສາມາດເລືອກເອງວ່າອັນໃດດີອັນໃດຊົ່ວ ແລະການທີ່ເຂົາເຈົ້າເລືອກຜິດໄດ້ສົ່ງຜົນທີ່ຊົ່ວຮ້າຍຕໍ່ມະນຸດທຸກຄົນ. ຕັ້ງແຕ່ນັ້ນເປັນຕົ້ນມາ ຜູ້ຄົນຈຳນວນຫຼາຍໄດ້ໃຊ້ອິດສະຫຼະໃນການເລືອກຂອງໂຕເອງແບບຜິດໆ. (ປະຖົມມະການ 2:17; 3:6; ໂຣມ 5:12) ເປັນຈິງແບບທີ່ປຶ້ມເຫຼັ້ມໜຶ່ງ (Statement of Principles of Conservative Judaism) ບອກໄວ້ທີ່ວ່າ: “ຄວາມທຸກສ່ວນໃຫຍ່ທີ່ເກີດຂຶ້ນໃນໂລກເປັນຜົນຈາກການໃຊ້ອິດສະຫຼະໃນການເລືອກທີ່ພະເຈົ້າປະທານໃຫ້ເຮົາແບບຜິດໆ.” ແທນທີ່ຈະເອົາອິດສະຫຼະໃນການເລືອກຂອງເຮົາກັບຄືນໄປ ພະເຈົ້າໃຫ້ມະນຸດມີໂອກາດເຮັດສິ່ງຕ່າງໆໂດຍບໍ່ຕ້ອງເພິ່ງເພິ່ນ.
ພະເຈົ້າຈະລົບລ້າງຜົນເສຍຫາຍທຸກຢ່າງທີ່ເກີດຈາກຮໍໂລຄອດສ໌. ຜູ້ລອດຊີວິດຈາກຮໍໂລຄອດສ໌ມີຄວາມຊົງຈຳທີ່ເຈັບປວດ ແຕ່ພະເຈົ້າສັນຍາວ່າຈະກຳຈັດຄວາມທຸກທັງໝົດໃຫ້ໝົດໄປແລະຈະປຸກຫຼາຍລ້ານຄົນທີ່ເສຍຊີວິດໄປແລ້ວໃຫ້ກັບມາມີຊີວິດອີກເຊິ່ງລວມເຖິງເຫຍື່ອຂອງຮໍໂລຄອດສ໌ນຳ. (ເອຊາອີ 65:17; ກິດຈະການ 24:15) ພະເຈົ້າຮັກມະນຸດຫຼາຍ ເພິ່ນຈະເຮັດໃຫ້ຄຳສັນຍາເຫຼົ່ານີ້ເປັນຈິງແນ່ນອນ.—ໂຢຮັນ 3:16
ການເຂົ້າໃຈເຫດຜົນທີ່ພະເຈົ້າຍອມໃຫ້ມີຄວາມຊົ່ວແລະວິທີທີ່ເພິ່ນຈະລົບລ້າງຜົນເສຍຫາຍທັງໝົດຊ່ວຍໃຫ້ຜູ້ລອດຊີວິດຈາກຮໍໂລຄອດສ໌ຫຼາຍຄົນສາມາດຮັກສາຄວາມເຊື່ອຕໍ່ໆໄປແລະມີຈຸດມຸ່ງໝາຍໃນຊີວິດ.
ເລື່ອງທີ່ເຈົ້າອາດຈະມັກ
ຫໍສັງເກດການ
ຄວາມທຸກລຳບາກທີ່ເຮົາເຈິເປັນການລົງໂທດຈາກອົງສັກສິດບໍ?
ພະເຈົ້າລົງໂທດຄົນທີ່ເຮັດຜິດໂດຍໃຫ້ເຂົາເຈົ້າເຈັບປ່ວຍຫຼືເຈິເລື່ອງທີ່ຮ້າຍໆບໍ?
ຄຳສອນ
ເປັນຫຍັງພະເຈົ້າຈຶ່ງຍອມໃຫ້ມີຄວາມທຸກ?
ຄຳພີໄບເບິນໃຫ້ຄຳຕອບທີ່ໜ້າພໍໃຈແລະໃຫ້ກຳລັງໃຈເຮົາ.
ກ່ຽວກັບເຮົາ
ຂໍໃຫ້ມີຄົນມາສອນ
ເບິ່ງວ່າຄຳພີໄບເບິນສອນຫຍັງ ຫຼືມາຮູ້ຈັກພະຍານພະເຢໂຫວາຫຼາຍຂຶ້ນ.
