Lakisá makambo oyo ezali na kati

kende na sous-menu

Kende na mitó ya makambo

Batatoli ya Yehova

Lingala

Biblia na Internet | BIBLIA - LIBONGOLI YA MOKILI YA SIKA

Yosua 4:1-24

4  Mpe esalemaki boye: ntango kaka ekólo mobimba esilisaki kokatisa Yordani,+ Yehova alobaki na Yosua ete:  “Bózwa mibali zomi na mibale na kati ya bato, mobali moko na libota moko,+  mpe bópesa bango mitindo ete: ‘Bólɔkɔta mabanga+ zomi na mibale na katikati mpenza ya Yordani, na esika oyo makolo ya banganga-nzambe etɛlɛmaki kozanga koningana,+ mpe bokomema yango elongo na bino mpe bokotya yango na esika oyo bokolala,+ epai bokolala na butu ya lelo.’”  Bongo Yosua abengaki mibali zomi na mibale+ oyo aponaki na kati ya bana ya Yisraele, mobali moko na libota moko;  mpe Yosua alobaki na bango boye: “Bóleka liboso ya sanduku ya Yehova Nzambe na bino na katikati ya Yordani, mpe bómema moto na moto libanga moko na lipeka na ye, na kolanda motángo ya mabota ya bana ya Yisraele,  mpo yango ezala elembo na kati na bino.+ Soki bana na bino batuni bino na mikolo ekoya ete: ‘Mpo na nini bozalaka na mabanga oyo?’+  Bongo bokoloba na bango ete: ‘Mpo mai ya Yordani ekatanaki liboso ya sanduku ya kondimana ya Yehova.+ Ntango yango elekaki na kati ya Yordani, mai ya Yordani ekatanaki, mpe mabanga oyo esengeli kozala ekaniseli mpo na bana ya Yisraele mpo na ntango oyo etyami ndelo te.’”+  Mpe bana ya Yisraele basalaki bongo, ndenge Yosua apesaki bango mitindo, mpe bakamataki mabanga zomi na mibale na katikati ya Yordani, ndenge Yehova alobaki na Yosua, mpo ekokana na motángo ya mabota ya bana ya Yisraele;+ mpe bamemaki yango elongo na bango na esika oyo bakendaki kolala+ mpe batyaki yango wana.  Ezalaki mpe na mabanga zomi na mibale oyo Yosua atɛlɛmisaki na katikati ya Yordani na esika oyo makolo ya banganga-nzambe oyo bamemaki sanduku ya kondimana etɛlɛmaki,+ mpe mabanga yango ezali kuna tii na mokolo ya lelo. 10  Mpe banganga-nzambe oyo bazalaki komema Sanduku batɛlɛmaki na katikati+ ya Yordani tii ntango makambo nyonso oyo Yehova apesaki Yosua mitindo ete ayebisa bato esilaki, na kolanda mitindo nyonso oyo Moize apesaki Yosua.+ Na ntango nyonso wana, bato basalaki nokinoki+ mpe bakatisaki. 11  Mpe esalemaki boye: ntango kaka bato nyonso basilisaki kokatisa, sanduku+ ya Yehova ekatisaki, ná banganga-nzambe, na miso ya bato. 12  Mpe bana ya Rubene mpe bana ya Gade mpe ndambo ya libota ya Manase+ bakatisaki na bituluku ya etumba+ na miso ya bana ya Yisraele, ndenge Moize alobaki na bango.+ 13  Bato soki nkóto ntuku minei (40 000), oyo bazalaki na bibundeli mpo na limpinga, bakatisaki liboso ya Yehova mpo na etumba epai mokili patatalu oyo ekauká ya Yeriko ezalaki. 14  Na mokolo yango, Yehova akómisaki Yosua monene na miso ya Yisraele mobimba,+ mpe bakómaki kobanga ye ndenge bazalaki kobanga Moize mikolo nyonso ya bomoi na ye.+ 15  Na nsima, Yehova alobaki na Yosua boye: 16  “Pesá mitindo na banganga-nzambe oyo bazali komema sanduku ya litatoli+ ete bábima na Yordani.” 17  Bongo Yosua apesaki mitindo na banganga-nzambe ete: “Bóbima na Yordani.” 18  Mpe esalemaki boye: ntango banganga-nzambe oyo bamemaki sanduku+ ya kondimana ya Yehova balongwaki na katikati ya Yordani mpe makolo+ ya banganga-nzambe yango ekómaki na mokili, mai ya Yordani ebandaki kozonga na esika na yango mpe etondisaki+ bangámbo na yango ndenge ezalaki liboso. 19  Mpe bato babimaki na Yordani na mokolo ya zomi ya sanza ya liboso mpe batyaki kaa na Gilgale,+ na ndelo ya ɛsti ya Yeriko. 20  Bongo mabanga zomi na mibale oyo bazwaki na kati ya Yordani, Yosua atɛlɛmisaki yango na Gilgale.+ 21  Na nsima, alobaki na bana ya Yisraele boye: “Na mikolo ekoya, ntango bana na bino bakotuna batata na bango ete: ‘Mabanga oyo elakisi nini?’+ 22  Bosengeli koyebisa bana na bino ete: ‘Yisraele ekatisaki Yordani oyo na mabele oyo ekauki,+ 23  ntango Yehova Nzambe na bino akaukisaki mai ya Yordani liboso na bango tii ntango basilisaki kokatisa, ndenge Yehova Nzambe na bino asalaki na Mbu Motane, ntango akaukisaki yango liboso na biso tii tosilisaki kokatisa;+ 24  mpo bato ya bikólo nyonso ya mabele báyeba ete lobɔkɔ ya Yehova+ ezali makasi;+ mpo bino bókoka mpenza kobanga Yehova Nzambe na bino ntango nyonso.’”+

Maloba na nse