Lakisá makambo oyo ezali na kati

kende na sous-menu

Kende na mitó ya makambo

Batatoli ya Yehova

Lingala

Biblia na Internet | BIBLIA - LIBONGOLI YA MOKILI YA SIKA

Yoele 1:1-20

1  Liloba ya Yehova oyo eyelaki+ Yoele mwana ya Petuele:  “Bóyoka likambo oyo, bino bankumu, mpe bótya litoi, bino bato nyonso oyo bofandi na mokili.+ Likambo oyo esilá kosalema na mikolo na bino, to ata na mikolo ya bankɔkɔ na bino?+  Bóbɛtɛla bana na bino lisolo na yango, mpe bana na bino bábɛtɛla bana na bango, mpe bana na bango bábɛtɛla libota oyo ekolanda.+  Oyo mbinzo etiki, liyoyo elei yango;+ mpe oyo liyoyo etiki, liyoyo oyo emibendaka, oyo ezangá mapapu, elei yango; mpe oyo liyoyo oyo emibendaka, oyo ezangá mapapu, etiki, mpɛsɛ elei yango.+  “Bólamuka, bino bala-ngwi-masanga,+ mpe bólela;+ mpe bino nyonso bato oyo bomɛlaka vinyo, bóganga na kolela mpo na vinyo ya elɛngi,+ mpamba te balongoli yango na minɔkɔ na bino.+  Mpo ekólo moko ekɔti na mokili na ngai, ezali na nguya mpe motángo ya bato na yango eyebani te.+ Mino na yango ezali mino ya nkɔsi,+ mpe mikuwa ya mbanga na yango ezali mikuwa ya nkɔsi.  Ekómisi nzete na ngai ya vinyo lokola eloko ya kokamwa,+ mpe nzete na ngai ya figi lokola ekumu.+ Etiki yango bolumbu mpenza mpe ebwaki yango.+ Bitape na yango ya mikemike ekómi mpɛmbɛ.  Gangá na kolela, ndenge ngɔndɔ oyo akangi ngɔtɔ+ na loketo alelaka nkolo na ye na ntango ya bolenge na ye.  “Balongoli likabo ya mbuma+ mpe likabo ya masanga+ na ndako ya Yehova; banganga-nzambe, basaleli+ ya Yehova, baleli.+ 10  Elanga epunzami,+ mabele ekómi kolela;+ mpamba te mbuma epunzami, vinyo ya sika ekauki,+ mafuta ekauki mokemoke.+ 11  Baloni-bilanga bayoki nsɔni;+ basali-bilanga ya vinyo bagangi na kolela, mpo na mbuma ya blé mpe mpo na mbuma ya ɔrje; mpamba te biloko ya bilanga ebebi.+ 12  Nzete ya vinyo ekauki, ata nzete ya figi mpe ekauki. Mpe nzete ya grenade, nzete ya mbila, nzete ya pɔme, banzete nyonso ya elanga, ekaukikauki;+ mpamba te esengo eyoki nsɔni, ekimi bana ya bato.+ 13  “Bómikanga ngɔtɔ na loketo, mpe bóbɛta ntolo na bino,+ bino banganga-nzambe. Bóganga na kolela, bino basaleli ya etumbelo.+ Bókɔta, bólata ngɔtɔ butu mobimba, bino basaleli ya Nzambe na ngai; mpamba te baboyeli ndako ya Nzambe na bino likabo ya mbuma+ mpe likabo ya masanga.+ 14  Bósantisa eleko moko ya kokila bilei.+ Bóbengisa liyangani moko ya monene.+ Bósangisa bankumu esika moko, bato nyonso oyo bafandi na mokili, na ndako ya Yehova Nzambe na bino,+ mpe bóbelela Yehova asalisa bino.+ 15  “Aa! mawa na mokolo yango;+ mpamba te mokolo ya Yehova ekómi pene,+ mpe ekoya lokola nde Mozwi-ya-Nguya-Nyonso azali kopunza! 16  Balongoli biloko ya kolya liboso ya miso na biso; na ndako ya Nzambe na biso, balongoli kosepela mpe esengo, boye te?+ 17  Bafigi ya kokauka oyo ezali na nse ya bapau na bango ebebibebi. Bandako ya kobomba biloko etikali mpamba. Babuki bisika ya kobomba biloko, mpo mbuma ekauki. 18  Talá ndenge nyama ya mboka ekimeli! Bitonga ya bangɔmbɛ etelengani, ekɔti na mobulu! Mpo esika yango ekolya matiti ezali te.+ Bitonga ya bampate mpe ememi ngambo. 19  “Ee Yehova, ngai nakobelela yo;+ mpamba te mɔtɔ etumbi bisika oyo baleisaka banyama matiti na esobe, mpe lolemo ya mɔtɔ ezikisi banzete nyonso ya elanga.+ 20  Banyama ya zamba mpe bazali na mposa na yo makasi,+ mpamba te banzela ya mai ekauki,+ mpe mɔtɔ etumbi bisika oyo baleisaka banyama matiti na esobe.”

Maloba na nse