Lakisá makambo oyo ezali na kati

kende na sous-menu

Kende na mitó ya makambo

Batatoli ya Yehova

Lingala

Biblia na Internet | BIBLIA - LIBONGOLI YA MOKILI YA SIKA

Sefania 1:1-18

1  Liloba ya Yehova oyo eyelaki Sefania mwana ya Kushi mwana ya Gedalia mwana ya Amaria mwana ya Hizikiya, na mikolo ya Yosiya+ mwana ya Amone+ mokonzi ya Yuda:  “Ya solo mpenza, nakosilisa eloko nyonso nyɛɛ na mabele,” yango nde liloba ya Yehova.+  “Nakosilisa nyɛɛ moto ya mabele ná nyama.+ Nakosilisa nyɛɛ ekelamu oyo epumbwaka na likoló ná mbisi ya mbu,+ ná biloko oyo ebɛtisaka libaku, ná bato mabe;+ mpe nakoboma bato na mabele,”+ yango nde liloba ya Yehova.  “Mpe nakosembolela Yuda lobɔkɔ na ngai ná bato nyonso oyo bafandi na Yerusaleme,+ mpe na esika oyo, nakoboma bato ya Baala+ oyo batikali, nkombo ya banganga-nzambe ya banzambe ya bapaya ná banganga-nzambe mosusu,+  ná baoyo bazali kogumbamela mampinga ya likoló na bansamba ya bandako,+ ná baoyo bazali kogumbama+ mpe kolapela Yehova ndai+ mpe kolapa ndai na nkombo ya Malakame;+  ná baoyo bazali kozonga nsima mpe kotika kolanda Yehova,+ oyo baluki Yehova te mpe batuni ye te.”+  Fandá nyɛɛ liboso ya Yehova Nkolo Mokonzi-Oyo-Aleki-Nyonso;+ mpamba te mokolo ya Yehova ekómi pene,+ mpo Yehova abongisi mbeka moko;+ asantisi+ bato oyo ye abengisi.  “Mpe na mokolo ya mbeka ya Yehova ekosalema mpenza boye: nakotyela bankumu likebi, ná bana ya mokonzi,+ ná baoyo nyonso balati bilamba ya bapaya.+  Mpe nakotya likebi na moto nyonso oyo azali komata na estradɛ na mokolo yango, baoyo bazali kotondisa ndako ya bankolo na bango na mobulu mpe na bokosi.+ 10  Mpe na mokolo wana, ekosalema mpenza boye: makɛlɛlɛ ya koganga ekouta na Porte ya Mbisi,+ mpe kolela makasi na kartye ya mibale,+ mpe lokito makasi na bangomba mike,”+ yango nde liloba ya Yehova. 11  “Bóganga na kolela,+ bino bato oyo bofandi na Makateshe, mpamba te bato nyonso ya mombongo basili nyɛɛ;+ baoyo nyonso bamekaka kilo ya palata babomami. 12  “Mpe na ntango yango, ekosalema mpenza boye: nakoluka malamumalamu na miinda na kati ya Yerusaleme,+ mpe nakotya likebi na bato oyo bazali kokangama lokola vinyo likoló ya mbɔtɔ na yango+ mpe baoyo bazali koloba na mitema na bango ete: ‘Yehova akosala malamu te, mpe akosala mabe te.’+ 13  Mpe bomɛngo na bango ekokóma mpenza eloko ya kopunza mpe bandako na bango ekotikala mpamba.+ Bakotonga bandako, kasi bakofanda kuna te;+ mpe bakolona bilanga ya vinyo, kasi bakomɛla vinyo na yango te.+ 14  “Mokolo monene+ ya Yehova ekómi pene.+ Ekómi pene, mpe ezali koya mbangu mpenza.+ Lokito ya mokolo ya Yehova ezali bololo.+ Na mokolo yango, mobali ya nguya akoganga.+ 15  Mokolo yango ezali mokolo ya nkɛlɛ, mokolo ya mpasi mpe ya bwale,+ mokolo ya mbula ya mopɛpɛ makasi mpe ya libebi, mokolo ya molili mpe ya kozanga pole,+ mokolo ya mapata mpe ya molili tuu, 16  mokolo ya lokito ya liseke mpe ya elembo ya kokebisa,+ mpo na kotɛmɛla bingumba oyo ebatelami makasi mpe kotɛmɛla manɔ́ngi milai ya matumu.+ 17  Mpe nakopesa bato mpasi, mpe bakotambola mpenza lokola bato bakufá miso;+ mpamba te basaleli Yehova lisumu.+ Mpe makila na bango ekosopana mpenza lokola putulu,+ mpe misɔpɔ na bango lokola nyɛi.+ 18  Ezala palata na bango to wolo na bango ekokoka kobikisa bango te na mokolo ya nkɛlɛ ya Yehova;+ kasi mabele mobimba ekolyama na mɔtɔ ya molende na ye,+ mpamba te akosilisa nyɛɛ bato nyonso oyo bafandi na mabele, ɛɛ ekozala nsɔmɔ mpenza.”+

Maloba na nse