Lakisá makambo oyo ezali na kati

kende na sous-menu

Kende na mitó ya makambo

Batatoli ya Yehova

Lingala

Biblia na Internet | BIBLIA - LIBONGOLI YA MOKILI YA SIKA

Ruta 3:1-18

3  Sikoyo Naomi bokilo na ye alobaki na ye ete: “Mwana na ngai, nasengeli kolukela yo esika ya kopema,+ mpo makambo na yo etambola malamu, boye te?  Bongo Boaze oyo yo ozalaki elongo na bilenge basi na ye, azali ndeko mobali ya libota na biso te?+ Talá! Butu ya lelo azali kopupola+ ɔrje na esika ya kotutatuta mbuma.  Mpe osengeli kosukola, komipakola mafuta,+ kolata bilamba na yo+ mpe kokita na esika ya kotutatuta mbuma. Salá ete mobali yango ayeba te ete ezali yo kino akosilisa kolya mpe komɛla.  Mpe talá oyo okosala: ntango akolala, osengeli mpe kotala esika oyo akolala; mpe osengeli koya mpe kolongola elamba oyo ezipi makolo na ye mpe kolala; mpe ye akoyebisa yo nini osengeli kosala.”  Bongo alobaki na ye ete: “Oyo nyonso olobi na ngai nakosala yango.”  Mpe akitaki na esika ya kotutatuta mbuma mpe asalaki na kolanda nyonso oyo bokilo na ye apesaki ye mitindo.  Na ntango yango Boaze azalaki kolya mpe komɛla, mpe motema na ye ezalaki kosepela.+ Bongo akendaki kolala na nsuka ya libondo ya mbuma. Nsima na yango, ye ayaki na kobombana mpe alongolaki elamba oyo ezipaki makolo na ye mpe alalaki.  Mpe esalemaki boye: na midi ya butu, mobali yango abandaki kolɛnga. Bongo amigunzaki, mpe talá! mwasi moko alali na makolo na ye!  Bongo ye alobaki ete: “Yo nani?” Mpe ye alobaki ete: “Ngai Ruta moombo na yo, mpe osengeli kozipa moombo na yo nsɔngɛ ya elamba na yo, mpo ozali mosikoli.”+ 10  Bongo ye alobaki ete: “Yehova apambola yo,+ mwana na ngai. Omonisi motema boboto+ na yo malamu mpenza na mbala oyo koleka mbala ya liboso,+ na ndenge olandi bilenge mibali te, babola to bazwi. 11  Mpe sikoyo, mwana na ngai, kobanga te. Nyonso oyo olobi nakosalela yo yango,+ mpo moto nyonso na engumba* ya bato na ngai ayebi ete yo ozali mpenza mwasi moko malamu mingi.+ 12  Mpe atako ezali solo ete ngai nazali mosikoli,+ ezali mpe na mosikoli mosusu oyo azali mpenza ndeko, oyo azali liboso na ngai.+ 13  Lalá awa butu ya lelo, mpe ekosalema mpenza boye: na ntɔngɔ, soki ye alingi kosikola+ yo, malamu! Asikola. Kasi soki asepeli te kosikola yo, lokola Yehova azali solo na bomoi, ngai moko nakosikola yo.+ Lalá tii na ntɔngɔ.” 14  Mpe alalaki na makolo na ye tii na ntɔngɔ mpe na nsima atɛlɛmaki liboso ete moto akoka koyeba moto mosusu. Bongo Boaze alobaki ete: “Eyebana te ete mwasi moko ayaki na esika ya kotutatuta mbuma.”+ 15  Mpe alobaki lisusu ete: “Yaká na kazaka oyo olati, simbá yango mpe fungolá yango.” Bongo asimbaki yango mpe afungolaki yango, mpe Boaze amekaki mezire motoba ya ɔrje mpe akumbisaki ye yango, nsima na yango akendaki na engumba. 16  Mpe akendaki epai ya bokilo na ye, oyo sikoyo alobaki ete: “Yo nani, mwana na ngai?” Na yango, ayebisaki ye makambo nyonso oyo mobali yango asalelaki ye. 17  Mpe alobaki lisusu ete: “Apesi ngai mezire oyo motoba ya ɔrje, mpo alobi na ngai ete: ‘Kozongela bokilo na yo mabɔkɔ mpamba te.’”+ 18  Bongo ye alobaki ete: “Fandá nyɛɛ, mwana na ngai, kino okoyeba ndenge likambo yango ekosuka, mpo mobali yango akopema te liboso asilisa likambo yango lelo.”+

Maloba na nse

Lil., “porte.”