Lakisá makambo oyo ezali na kati

kende na sous-menu

Kende na mitó ya makambo

Batatoli ya Yehova

Lingala

Biblia na Internet | BIBLIA - LIBONGOLI YA MOKILI YA SIKA

Nzembo 66:1-20

Epai ya mokambi ya nzembo. Loyembo, mondule. 66  Bóganga na koganga ya bolongi epai ya Nzambe, bino nyonso bato ya mabele.+   Bóbɛta mondule mpo na nkembo ya nkombo na ye.+ Bópesa lisanzoli na ye nkembo.+   Bóloba na Nzambe ete: “Misala na yo ezali mpenza nsɔmɔ!+ Lokola ozali na makasi mingi, banguna na yo bakoya kogumbamela yo na kobanga.+   Bato nyonso ya mabele bakogumbamela yo,+ Mpe bakobɛtɛla yo mondule, bakobɛtɛla nkombo na yo mondule.”+ Sela.   Bóya mpe bótala misala ya Nzambe.+ Ndenge asalelaka bana ya bato ezali nsɔmɔ.+   Abongoli mbu mabele oyo ekauki;+ Bakatisaki ebale na makolo.+ Kuna tobandaki kosepela na ye.+   Azali koyangela na nguya na ye libela na libela.+ Miso na ye ezali kotala bikólo.+ Baoyo bazali motó makasi, bámikumisa te.+ Sela.   Ee bino bato ya bikólo,+ bópambola Nzambe na biso, Mpe bóyokisa mongongo ya lisanzoli na ye.+   Azali kobatela molimo na biso na bomoi,+ Mpe apesi nzela te ete lokolo na biso etengatenga.+ 10  Ee Nzambe, mpo otalitali biso;+ Opɛtoli biso lokola na ntango bapɛtolaka palata.+ 11  Okɔtisi biso na monyama ya bokila;+ Otye kilo na loketo na biso. 12  Otambwisi moto—mowei mpamba—na motó na biso;+ Toleki na kati ya mɔtɔ mpe na kati ya mai,+ Mpe obimisi biso kino na esika ya kokitisa motema.+ 13  Nakokɔta na ndako na yo na makabo ya kotumba mobimba;+ Nakokokisa bilako na ngai epai na yo+ 14  Oyo nafungolaki mbɛbu na ngai mpo na koloba+ Mpe oyo monɔkɔ na ngai elobi ntango makambo eyelaki ngai ndongo.+ 15  Nakopesa yo makabo ya kotumba mobimba ya bana ya banyama ya mafutamafuta,+ Ná milinga ya mbeka ya bampate-mibali. Nakopesa ngɔmbɛ-mobali ná bantaba-mibali.+ Sela. 16  Bino nyonso baoyo bobangaka Nzambe, bóya, bóyoka, mpe nakoyebisa+ Oyo ye asaleli molimo na ngai.+ 17  Nabengaki ye na monɔkɔ na ngai,+ Mpe kokumisa ezalaki na lolemo na ngai.+ 18  Soki na motema na ngai natalelaki eloko oyo eyokisaka mpasi, Yehova akoyoka ngai te.+ 19  Ya solo Nzambe ayoki;+ Atye likebi na mongongo ya libondeli na ngai.+ 20  Nzambe apambolama, ye oyo atye libondeli na ngai pembeni te, Mpe alongoli motema boboto na ye epai na ngai te.+

Maloba na nse