Lakisá makambo oyo ezali na kati

kende na sous-menu

Kende na mitó ya makambo

Batatoli ya Yehova

Lingala

Biblia na Internet | BIBLIA - LIBONGOLI YA MOKILI YA SIKA

Nzembo 102:1-28

Libondeli ya moto ya mpasi soki akómi kolɛmba mpe azali kobimisa mabanzo na ye liboso ya Yehova.+ 102  Ee Yehova, yoká libondeli na ngai;+ Mpe kolela na ngai mpo na kosɛnga lisalisi ekómela yo.+   Kobombela ngai elongi na yo te na mokolo oyo makambo eyeli ngai ndongo.+ Sembolelá ngai litoi na yo;+ Na mokolo oyo nazali kobenga, salá mbangu, yanolá ngai.+   Mpo mikolo na ngai esuki lokola molinga,+ Mpe mikuwa na ngai ekómi mɔtɔ lokola lituka.+   Motema na ngai ebɛtami lokola matiti mpe ekauki,+ Mpo nabosani kolya bilei na ngai.+   Mpo na makɛlɛlɛ ya kokimela na ngai+ Mikuwa na ngai ekangami na mosuni na ngai.+   Nakokani mpenza na libɛki ya esobe.+ Nakómi lokola esulungutu moke ya bisika oyo etikalá mpamba.   Nakɔndi makasi, Mpe nakómi lokola ndɛkɛ oyo ezali yango moko na nsamba.+   Banguna na ngai batuki ngai mokolo mobimba.+ Baoyo bazali kotyola ngai balapi ndai na nkombo na ngai.+   Mpo nalei putulu ya mɔtɔ lokola limpa;+ Mpe biloko oyo nazali komɛla, nasangisi yango na mpisoli,+ 10  Mpo na makaneli na yo mpe mpo na nkanda na yo;+ Mpo otomboli ngai, mpo obwaka ngai mosika.+ 11  Mikolo na ngai ezali lokola elili oyo ekiti,+ Mpe ngai, nakauki lokola matiti mpamba.+ 12  Ee Yehova, yo okotikala seko na seko,+ Mpe ekaniseli na yo ekozala libota na libota.+ 13  Yo moko okotɛlɛma, okoyokela Siona mawa,+ Mpo oyo ezali eleko ya komonisa ete ondimi ye, Mpo ntango oyo etyamá ekoki.+ 14  Mpo basaleli na yo basepeli na mabanga na ye,+ Mpe bazali kotala putulu na ye na boboto.+ 15  Mpe bikólo ekobanga nkombo ya Yehova,+ Mpe bakonzi nyonso ya mabele bakobanga nkembo na yo.+ 16  Mpo Yehova akotonga mpenza Siona;+ Akomonana mpenza na nkembo na ye.+ 17  Akobaluka mpenza mpo na koyoka libondeli ya baoyo biloko na bango nyonso epunzami,+ Mpe akotyola libondeli na bango te.+ 18  Oyo ekomami mpo na libota oyo ekoya;+ Mpe bato oyo bakozalisama bakosanzola Yah.+ 19  Mpo uta na esika na ye mosantu oyo etombwaná atali na nse,+ Uta na likoló mpenza Yehova ye moko atali na mabele,+ 20  Mpo na koyoka kokimela ya moto ya bolɔkɔ,+ Mpo na kofungola baoyo baponami mpo na kobomama;+ 21  Mpo nkombo ya Yehova esakolama na Siona+ Mpe lisanzoli na ye na Yerusaleme,+ 22  Ntango bato ya bikólo bakosangisama bango nyonso,+ Mpe makonzi mpo na kosalela Yehova.+ 23  Asilisaki nguya na ngai na nzela,+ Akómisaki mikolo na ngai mokuse.+ 24  Nalobaki ete: “Ee Nzambe na ngai, Kolongola ngai te liboso nakóma mobange;+ Bambula na yo ezali koumela na mabota nyonso.+ 25  Kalakala otyaki miboko ya mabele,+ Mpe likoló ezali mosala ya mabɔkɔ na yo.+ 26  Yango mpenza ekobeba, kasi yo okozala kaka;+ Mpe yango nyonso ekonzuluka lokola elamba.+ Lokola bilamba, okotya mosusu na esika na yango, mpe ngala na yango ekosila.+ 27  Kasi yo ozali kaka ndenge ozalaka, mpe bambula na yo ekosila te.+ 28  Bana ya basaleli na yo bakokoba kofanda;+ Mpe bana na bango bakopikama makasi liboso na yo.”+

Maloba na nse