Lakisá makambo oyo ezali na kati

kende na sous-menu

Kende na mitó ya makambo

Batatoli ya Yehova

Lingala

Biblia na Internet | BIBLIA - LIBONGOLI YA MOKILI YA SIKA

Masese 28:1-28

28  Bato mabe bakimaka atako moto moko te azali kolanda bango,+ kasi bayengebene bazali lokola mwana-nkɔsi oyo azali kobanga eloko te.+  Mpo na bobuki-mibeko ya mboka moko, bankumu na yango oyo bazali kokitana bazalaka ebele,+ kasi mpo na moto moko ya bososoli oyo ayebi makambo ya sembo, nkumu akoumela ntango molai.+  Mobali makasi oyo akelelá mpe oyo abubaka+ bato oyo bazangá azali lokola mbula oyo ekɔmbɔlaka nyonso bongo etikaka eloko ya kolya te.  Baoyo bazali kotika mobeko bakumisaka moto mabe,+ kasi baoyo bazali kobatela mobeko basilikelaka bango.+  Bato bamipesá na makambo ya mabe bakangaka ntina ya bosembo te, kasi baoyo bazali koluka Yehova bakangaka ntina ya likambo nyonso.+  Moto oyo akelelá oyo azali kotambola kozanga mbeba azali malamu koleka moto nyonso oyo atɛngamá na banzela na ye, atako azali mozwi.+  Mwana ya mayele abatelaka mobeko,+ kasi ye oyo azali moninga ya bato oyo balyaka na lokoso ayokisaka tata na ye nsɔni.+  Ye oyo azali kobakisabakisa biloko na ye ya motuya na nzela ya benefisi+ mpe ya benefisi ya lokoso asangisaka yango kaka mpo na moto oyo azali komonisa boboto epai ya bato oyo bazangá.+  Ye oyo alongoli litoi na ye ete ayoka mobeko te+—ata libondeli na ye ezali eloko moko oyo eyinamá.+ 10  Ye oyo azali kobungisa bato ya kolongobana nzela+ mpo bákɔta na nzela ya mabe akokwea na libulu na ye moko,+ kasi bato oyo bazangi mbeba bakozwa bolamu.+ 11  Mozwi azalaka na bwanya na miso na ye moko,+ kasi moto oyo azangá, oyo azali na bososoli, alandelaka ye malamumalamu.+ 12  Ntango bayengebene bazali na nsai,+ makambo ya kitoko ezalaka ebele; kasi ntango bato mabe batɛlɛmi, moto asalaka ete báyeba ye te.+ 13  Ye oyo azali kozipa makambo na ye oyo ebuki mibeko akolonga te,+ kasi ye oyo ayamboli mpe atiki yango akoyokelama mawa.+ 14  Esengo na moto oyo azali koyoka nsɔmɔ ntango nyonso,+ kasi ye oyo azali koyeisa motema na ye makasi akokwea kati na mpasi.+ 15  Lokola nkɔsi oyo ezali konguluma mpe urse oyo ezali koya mbangu, moyangeli ya mabe oyo azali koyangela bato bazangá azali mpe bongo.+ 16  Mokambi oyo azangi bososoli ya solosolo atondi mpe na misala mingi ya kobuba,+ kasi ye oyo azali koyina litomba oyo ezwami na ndenge ya mabe+ akoyeisa mikolo na ye molai. 17  Moto oyo amemi mokumba ya ngambo ya makila ya molimo moko boye akokima kino na libulu.+ Bákanga ye te. 18  Ye oyo azali kotambola kozanga mbeba akobika,+ kasi ye oyo atɛngamá na banzela na ye akokwea na mbala moko.+ 19  Ye oyo azali kolona mabele na ye akozala na mampa oyo ekoki na ye,+ mpe ye oyo azali kolanda makambo ya mpambampamba akotonda na bobola.+ 20  Moto ya misala ya bosembo akozwa mapamboli mingi,+ kasi ye oyo azali kowela kozwa bomɛngo akozanga te kozwa likambo.+ 21  Komonisa koponapona ezali malamu te,+ mobali makasi asengeli mpe kobuka mibeko te kaka mpo na eteni ya limpa mpamba. 22  Moto ya liso ya bilulela awelaka kozwa biloko ya motuya mbangumbangu,+ kasi azali koyeba te ete kokelela nde ekoyela ye. 23  Ye oyo azali kopamela moto+ akondimama mingi na nsima koleka ye oyo azali koloba maloba sukali na lolemo na ye. 24  Ye oyo azali koyiba tata na ye mpe mama na ye+ mpe azali koloba: “Ezali kobuka mibeko te,”+ azali moninga ya moto oyo azali kobebisa. 25  Ye oyo azali molimo ya lofundo abimisaka kowelana,+ kasi ye oyo azali kotalela Yehova akokóma mafutamafuta.+ 26  Ye oyo azali kondimela motema na ye moko azali zoba,+ kasi ye oyo azali kotambola na bwanya nde akobika.+ 27  Ye oyo azali kopesa eloko na moto oyo akelelá akokelela te,+ kasi ye oyo azali kobomba miso na ye akozwa bilakeli mabe mingi.+ 28  Ntango bato mabe batɛlɛmi, moto amibombaka,+ kasi ntango bakufi, bayengebene bakómaka ebele.+

Maloba na nse