Lakisá makambo oyo ezali na kati

kende na sous-menu

Kende na mitó ya makambo

Batatoli ya Yehova

Lingala

Biblia na Internet | BIBLIA - LIBONGOLI YA MOKILI YA SIKA

Masese 26:1-28

26  Lokola nɛjɛ na eleko ya molunge mpe lokola mbula na ntango ya kobuka mbuma,+ nkembo mpe ebongi te mpo na moto ya zoba.+  Ndenge ndɛkɛ ekimaka na ntina mpe ndenge nyampeke epumbwaka na ntina, ndenge mpe kolakelama mabe eyaka na ntina mpenza.+  Fimbo ezali mpo na farasa,+ ebende ya mbanga+ ezali mpo na mpunda, mpe fimbo mpo na mokɔngɔ ya bazoba.+  Koyanola moto oyo azali zoba na kolanda bozoba na ye te, noki yo moko mpe okokana na ye.+  Yanolá moto ya zoba na kolanda bozoba na ye, mpo akóma na bwanya na miso na ye moko te.+  Lokola moto oyo azali komikatakata makolo, lokola moto oyo azali komɛla bwale mpenza, moto oyo azali kotya makambo na lobɔkɔ ya moto oyo azali zoba azali mpe bongo.+  Makolo ya motɛngumi etoká nde mai? Boye lisese ezali na monɔkɔ ya bazoba.+  Lokola moto oyo azali kokanga libanga na libondo ya mabanga, moto oyo azali kopesa zoba nkembo azali mpe bongo.+  Lokola lititi ya nzubɛnzubɛ oyo ebimi na lobɔkɔ ya mo-langwi-masanga, lisese ezali mpe bongo na monɔkɔ ya bazoba.+ 10  Lokola moto ya litimbo oyo azali kotɔbɔla eloko nyonso, moto oyo azwi zoba+ to moleki-nzela na mosala azali mpe bongo. 11  Ndenge mbwa ezali kozongela biloko oyo yango esanzi, zoba azali kozongela bozoba na ye.+ 12  Omoná moto oyo azali na bwanya na miso na ye moko?+ Elikya ezali mingi mpo na zoba+ koleka mpo na ye. 13  Moto ya gɔigɔi alobi: “Mwana-nkɔsi azali na nzela, nkɔsi na kati ya bisika minene ya bato nyonso!”+ 14  Porte ezali kobalukabaluka na ebalukelo na yango, moto ya gɔigɔi mpe na mbeto na ye.+ 15  Moto ya gɔigɔi akɔtisi lobɔkɔ na ye na kibakuli ya fɛti; alɛmbi mingi mpo akoka ata kozongisa yango na monɔkɔ na ye.+ 16  Moto ya gɔigɔi azali na bwanya mingi na miso na ye moko+ koleka bato nsambo oyo bazali kopesa eyano ya mayele. 17  Lokola moto oyo asimbi matoi ya mbwa, moleki-nzela oyo akómi kosilika mpe komikɔtisa na koswana oyo ezali ya ye te azali mpe bongo.+ 18  Lokola moto ya ligboma oyo azali kobwaka mbanzi ya mɔtɔ,+ makula mpe liwa, 19  moto oyo akosi moninga na ye mpe alobi ete: “Nazalaki nde kosakana te?” azali mpe bongo.+ 20  Esika nkoni ezali te mɔtɔ ekufaka, mpe esika moto oyo akoselaka bato makambo azali te kowelana esilaka.+ 21  Ndenge makala ezalaka mpo na makala oyo ezali na mɔtɔ mpe nkoni mpo na mɔtɔ, moto oyo abimisaka kowelana mpo na kongalisa koswana azali mpe bongo.+ 22  Maloba ya moto oyo akoselaka bato makambo ezali lokola biloko oyo esengeli komɛlama na lokoso, biloko oyo ekitaka na kati mpenza ya libumu.+ 23  Lokola palata ya maimai oyo bapakoli na eteni ya mbɛki ya mabele, mbɛbu ya mɔtɔmɔtɔ elongo na motema ya mabe azali mpe bongo.+ 24  Na mbɛbu na ye moyini asalaka ete bato báyeba ye te, kasi atyaka bokosi na kati na ye.+ 25  Ata soki azali koyeisa mongongo na ye elɛngi,+ kondima ye te,+ mpo biloko nsambo oyo eyinamá+ ezali na motema na ye. 26  Koyina ezipami na bokosi. Mabe na ye ekomonisama na lisangá.+ 27  Ye oyo azali kotimola libulu akokwea na kati na yango,+ mpe ye oyo azali kobalola libanga—yango ekozongela ye.+ 28  Lolemo ya lokuta eyinaka moto oyo yango enyati,+ mpe monɔkɔ sukali ebimisaka libebi.+

Maloba na nse