Lakisá makambo oyo ezali na kati

kende na sous-menu

Kende na mitó ya makambo

Batatoli ya Yehova

Lingala

Biblia na Internet | BIBLIA - LIBONGOLI YA MOKILI YA SIKA

Kolimbola Mibeko 27:1-26

27  Mpe Moize, elongo na mikóló ya Yisraele, apesaki lisusu bato mitindo boye: “Bosengeli kotosa mitindo nyonso oyo nazali kopesa bino lelo.+  Mpe ekosalema mpenza boye: na mokolo oyo bokokatisa Yordani+ mpo na kokɔta na mokili oyo Yehova Nzambe na yo azali kopesa yo, osengeli komitɛlɛmisela mabanga minene mpe kopakola yango mpɛmbɛ.  Mpe osengeli kokoma maloba nyonso ya mobeko+ oyo likoló na yango, nsima ya kokatisa,+ mpo okɔta na mokili oyo Yehova Nzambe na yo azali kopesa yo, mokili oyo etondi na miliki mpe na mafuta ya nzoi, kaka ndenge Yehova Nzambe ya bankɔkɔ na yo alobi na yo.+  Mpe ekosalema mpenza boye: nsima ya kokatisa Yordani, bokotɛlɛmisa mabanga yango, kaka ndenge nazali kopesa bino mitindo lelo, na Ngomba Ebala,+ mpe osengeli kopakola yango mpɛmbɛ.+  Osengeli mpe kotongela Yehova Nzambe na yo etumbelo kuna, etumbelo moko ya mabanga. Osengeli te kosalela eloko moko ya ebende likoló na yango.+  Okotonga etumbelo ya Yehova Nzambe na yo na mabanga ya mibimba, mpe osengeli kopesa Yehova Nzambe na yo makabo ya kotumba likoló na yango.+  Mpe osengeli kopesa bambeka ya boyokani+ mpe kolya yango kuna,+ mpe osengeli kosepela liboso ya Yehova Nzambe na yo.+  Mpe osengeli kokoma maloba nyonso ya mobeko oyo likoló ya mabanga yango,+ emonana polele mpenza.”+  Bongo Moize ná banganga-nzambe, Balevi, balobaki na Yisraele mobimba ete: “Fandá nyɛɛ mpe yoká, Ee Yisraele. Mokolo ya lelo, okómi ekólo ya Yehova Nzambe na yo.+ 10  Mpe osengeli koyoka mongongo ya Yehova Nzambe na yo mpe kokokisa mitindo+ na ye mpe malako+ na ye, oyo nazali kopesa yo lelo.” 11  Mpe Moize apesaki lisusu bato mitindo na mokolo yango, alobi: 12  “Talá bato oyo bakotɛlɛma mpo na kopambola bato na Ngomba Gerizime,+ nsima ya kokatisa Yordani: Simeone, Levi ná Yuda, Isakare, Yozefe ná Benyamina. 13  Mpe talá bato oyo bakotɛlɛma mpo na elakeli mabe+ na Ngomba Ebala:+ Rubene, Gade ná Ashere ná Zebulone, Dani mpe Nafatali. 14  Mpe Balevi basengeli kozongisela bato nyonso ya Yisraele maloba na mongongo makasi ete:+ 15  “‘Alakelama mabe moto oyo asali ekeko oyo eyemami+ to ekeko ya ebende oyo enyangwisami,+ eloko oyo Yehova ayini,+ eloko oyo esalemi na mabɔkɔ ya mosali biloko ya mabaya mpe ya bibende,+ mpe oyo atye yango na esika moko ya kobombama.’ (Mpe bato nyonso basengeli koyanola mpe koloba ete: ‘Amen!’)+ 16  “‘Alakelama mabe moto oyo azali kotyola tata na ye to mama na ye.’+ (Mpe bato nyonso basengeli koloba: ‘Amen!’) 17  “‘Alakelama mabe moto oyo azongisi nsima elembo ya ndelo ya moninga na ye.’+ (Mpe bato nyonso basengeli koloba: ‘Amen!’) 18  “‘Alakelama mabe moto oyo azali kobungisa moto oyo akufá miso nzela.’+ (Mpe bato nyonso basengeli koloba: ‘Amen!’) 19  “‘Alakelama mabe moto oyo azali kopɛngwisa+ lisambisi+ ya moto oyo afandi mopaya,+ ya mwana mobali oyo tata akufá mpe ya mwasi oyo mobali akufá.’+ (Mpe bato nyonso basengeli koloba: ‘Amen!’) 20  “‘Alakelama mabe moto oyo alali na mwasi ya tata na ye, mpamba te alongoli elamba ya tata na ye.’+ (Mpe bato nyonso basengeli koloba: ‘Amen!’) 21  “‘Alakelama mabe moto oyo alali na nyama ezala ya lolenge nini.’+ (Mpe bato nyonso basengeli koloba: ‘Amen!’) 22  “‘Alakelama mabe moto oyo alali na ndeko na ye ya mwasi, mwana ya tata na ye to mwana ya mama na ye.’+ (Mpe bato nyonso basengeli koloba: ‘Amen!’) 23  “‘Alakelama mabe moto oyo alali na bokilo na ye ya mwasi.’+ (Mpe bato nyonso basengeli koloba: ‘Amen!’) 24  “‘Alakelama mabe moto oyo abomi moninga na ye na esika ya kobombana.’+ (Mpe bato nyonso basengeli koloba: ‘Amen!’) 25  “‘Alakelama mabe moto oyo andimi kanyaka mpo na koboma molimo moko boye, nzokande yango ezali makila ya moto oyo azali na likambo te.’+ (Mpe bato nyonso basengeli koloba: ‘Amen!’) 26  “‘Alakelama mabe moto oyo akosalela maloba ya mobeko oyo te, oyo akotosa yango te.’+ (Mpe bato nyonso basengeli koloba: ‘Amen!’)

Maloba na nse