Lakisá makambo oyo ezali na kati

kende na sous-menu

Kende na mitó ya makambo

Batatoli ya Yehova

Lingala

Biblia na Internet | BIBLIA - LIBONGOLI YA MOKILI YA SIKA

Kolimbola Mibeko 2:1-37

2  “Na nsima, tobalukaki mpe tokendaki na esobe na nzela ya Mbu Motane, kaka ndenge Yehova alobaki na ngai;+ mpe tosalaki mikolo mingi mpo na kobaluka pembenipembeni ya Ngomba Seire.  Nsukansuka Yehova alobaki na ngai boye:  ‘Bobaluki mwa ntango molai pembenipembeni ya ngomba oyo.+ Bóbaluka, bókende na nɔrdi.  Mpe pesá bato mitindo ete: “Bozali koleka pene na ndelo ya bandeko na bino,+ bana ya Esau,+ oyo bazali kofanda na Seire;+ mpe bakobanga bino,+ mpe bosengeli mpenza kokeba.  Bówelana na bango te, mpo nakopesa bino mokili na bango te, ata ndambo ya bonene ya lokolo te; mpo napesá Esau Ngomba Seire mpo ezala esika na ye.+  Bilei oyo bokosomba epai na bango na mbongo nde bosengeli kolya; mpe lisusu mai oyo bokosomba epai na bango na mbongo nde bosengeli komɛla.+  Mpo Yehova Nzambe na yo apamboli yo na misala nyonso ya lobɔkɔ na yo.+ Ayebi malamu ndenge otamboli na esobe monene oyo. Mbula ntuku minei (40)+ oyo, Yehova Nzambe na yo azalaki elongo na yo. Ozangaki eloko te.”’+  Bongo tolekaki mosika na bandeko na biso, bana ya Esau,+ oyo bafandi na Seire, mosika na nzela ya Araba,+ na Elate mpe na Ezione-gebere.+ “Na nsima, tobalukaki mpe tolekaki na nzela ya esobe ya Moabe.+  Bongo Yehova alobaki na ngai ete: ‘Kotungisa Moabe te mpe kobunda etumba ná bango te, mpo nakopesa yo ata ndambo moke te ya mokili na ye mpo ezala ya yo, mpamba te napesá Are+ na bana ya Lota+ mpo ezala esika na bango. 10  (Baemime+ bafandaki kuna na ntango ya kala, bato minene mpe ebele mpe milai lokola Baanakime.+ 11  Barefaime,+ bango mpe bazalaki kotalelama lokola Baanakime,+ mpe Bamoabe bazalaki kobenga bango Baemime. 12  Bahori+ bafandaki na Seire na ntango ya kala, mpe bana ya Esau+ babenganaki bango, basilisaki bango nyɛɛ liboso na bango mpe bafandaki na esika na bango,+ kaka ndenge Yisraele asengeli kosala mokili oyo ezali esika na ye, oyo Yehova akopesa mpenza bango.) 13  Sikoyo bótɛlɛma mpe bókatisa lobwaku ya mokɛli ya Zerede.’ Na yango, tokatisaki lobwaku ya mokɛli ya Zerede.+ 14  Mpe mikolo oyo totambolaki longwa na Kadeshe-barnea kino tokatisaki lobwaku ya mokɛli ya Zerede ezalaki mbula ntuku misato na mwambe (38), kino mibali nyonso ya etumba ya ntango wana basilaki na kaa, kaka ndenge Yehova alapelaki bango ndai.+ 15  Mpe lisusu lobɔkɔ+ ya Yehova ezalaki likoló na bango mpo na kobulunganisa bango mpe kolongola bango na kaa, kino basilaki.+ 16  “Mpe esalemaki boye: ntango kaka mibali nyonso ya etumba basilaki kokufa na kati ya bato,+ 17  Yehova alobaki lisusu na ngai ete: 18  ‘Lelo ozali koleka na teritware ya Moabe, elingi koloba, pene na Are,+ 19  mpe okopusana tii liboso ya bana ya Amone. Kotungisa bango te mpe kowelana na bango te, mpo nakopesa yo ata ndambo moke te ya mokili ya bana ya Amone mpo ezala esika na yo, mpamba te napesá yango nde na bana ya Lota mpo ezala esika na bango.+ 20  Bazalaki kotalela yango mpe lokola mokili ya Barefaime.+ (Barefaime bafandaki kuna na ntango ya kala, mpe Baamone bazalaki kobenga bango Bazamuzumime. 21  Bazalaki bato mineneminene mpe ebele mpe milai lokola Baanakime;+ mpe Yehova asilisaki bango nyɛɛ+ liboso na bango, mpo bábengana bango mpe báfanda na esika na bango; 22  kaka ndenge asalaki mpo na bana ya Esau, oyo bafandi na Seire,+ ntango asilisaki Bahori+ nyɛɛ liboso na bango, mpo bábengana bango mpe báfanda na esika na bango tii na mokolo ya lelo. 23  Bongo Baavime,+ oyo bazalaki kofanda na bamboka tii na Gaza,+ Bakafitorime,+ oyo bautaki na Kafitore,+ basilisaki bango nyɛɛ, mpo báfanda na esika na bango.) 24  “‘Bótɛlɛma, bósimba nzela mpe bókatisa lobwaku ya mokɛli ya Arnone.+ Talá, napesi na lobɔkɔ na yo Sihone+ mokonzi ya Heshibone, Moamore. Bongo bandá kozwa mokili na ye, mpe bundá etumba na ye. 25  Mokolo ya lelo nakobanda kotya nsɔmɔ na yo mpe kobanga na yo liboso ya bato ya bikólo oyo bazali na mabele mobimba, baoyo bakoyoka nsango na yo; mpe mpo na yo bakoningana mpe bakozala na mpasi lokola oyo ya kobota.’+ 26  “Bongo natindaki bamemi-nsango longwa na esobe ya Kedemote+ epai ya Sihone+ mokonzi ya Heshibone na maloba oyo ya kimya:+ 27  ‘Tiká naleka na mokili na yo. Nakotambola kaka na balabala. Nakobaluka na lobɔkɔ ya mobali to na lobɔkɔ ya mwasi te.+ 28  Bilei oyo okotɛkɛla ngai na mbongo nde nasengeli kolya; mpe mai oyo okopesa ngai na mbongo nde nasengeli komɛla. Tiká kaka ngai naleka na makolo,+ 29  kaka ndenge bana ya Esau oyo bazali kofanda na Seire+ ná Bamoabe+ oyo bazali kofanda na Are basalaki ngai, kino nakokatisa Yordani mpo na kokɔta na mokili oyo Yehova Nzambe na biso azali kopesa biso.’+ 30  Mpe Sihone mokonzi ya Heshibone atikaki  tóleka epai na ye te, mpamba te Yehova Nzambe na yo atikaki elimo na ye ekóma makasi+ mpe motema na ye ekóma makasi, mpo na kopesa ye na lobɔkɔ na yo, kaka ndenge ezali na mokolo ya lelo.+ 31  “Na yango, Yehova alobaki na ngai ete: ‘Talá, nabandi kopesa yo Sihone ná mokili na ye. Bandá kozwa mokili na ye.’+ 32  Ntango Sihone abimaki, ye ná bato na ye nyonso, kokutana na biso mpo na etumba na Yahaze,+ 33  Yehova Nzambe na biso apesaki biso ye,+ bongo tolongaki ye+ ná bana na ye mpe bato na ye nyonso. 34  Mpe tozwaki bingumba na ye nyonso na ntango yango mpe tobebisaki engumba nyonso,+ mibali ná basi mpe bana mike. Totikaki ata moto moko te na bomoi. 35  Kaka banyama ya mboka nde topunzaki mpo na biso, elongo na biloko oyo etikalaki na bingumba oyo tozwaki.+ 36  Banda na Aroere,+ oyo ezali pembenipembeni ya lobwaku ya mokɛli ya Arnone, mpe engumba oyo ezali kati na lobwaku ya mokɛli yango, tii na Gileade, ezalaki na sité moko te oyo ezalaki na bifelo ya molai koleka mpo na biso.+ Yehova Nzambe na biso apesaki biso yango nyonso. 37  Kaka nde obɛlɛmaki te na mokili ya bana ya Amone,+ na pembenipembeni nyonso ya lobwaku ya mokɛli ya Yaboke,+ ezala na bingumba ya etúká ya ngombangomba, ezala na eloko nyonso oyo mpo na yango Yehova Nzambe na biso apesaki mitindo.

Maloba na nse