Lakisá makambo oyo ezali na kati

kende na sous-menu

Kende na mitó ya makambo

Batatoli ya Yehova

Lingala

Biblia na Internet | BIBLIA - LIBONGOLI YA MOKILI YA SIKA

Kobima 8:1-32

8  Bongo Yehova alobaki na Moize ete: “Kɔtá epai ya Farao, mpe osengeli koloba na ye ete: ‘Talá oyo Yehova alobi: “Tiká bato na ngai bákende mpo básalela ngai.+  Mpe soki ozali kaka koboya kotika bango bákende, talá nazali kotinda bolɔzi ya mbemba na teritware na yo mobimba.+  Mpe Ebale Nile ekotondana mpenza na mbemba, mpe yango ekomata solo mpe ekokɔta na ndako na yo mpe na shambrɛ na yo ya kolala ya kati mpe na mbeto na yo mpe na bandako ya basaleli na yo mpe ekomatela bato na yo mpe ekokɔta na bitumbelo na yo ya mampa mpe na bisika na yo ya kobɛta pɔtɔpɔtɔ ya farini.+  Mpe mbemba ekomatela yo mpe bato na yo mpe basaleli na yo nyonso.”’”+  Na nsima, Yehova alobaki na Moize ete: “Lobá na Arona: ‘Sembolá lobɔkɔ na yo ná lingenda na yo+ likoló ya bibale, ya banzela ya mai ya Nile mpe ya bitima oyo etondi na matiti mpe matisá mbemba na mokili ya Ezipito.’”  Na yango Arona asembolaki lobɔkɔ na ye likoló ya mai ya Ezipito, mpe mbemba ebandaki komata mpe kozipa mokili ya Ezipito.  Nzokande, banganga-nzambe ya maji basalaki kaka bongo na misala na bango ya molili mpe basalaki ete mbemba emata na mokili ya Ezipito.+  Na nsima, Farao abengaki Moize ná Arona mpe alobaki ete: “Bóbondela Yehova+ ete alongola mbemba epai na ngai mpe epai ya bato na ngai, mpo nalingi kotika bato bákende mpo bápesa Yehova mbeka.”+  Bongo Moize alobaki na Farao ete: “Yo moko yebisá ngai ntango nini nakobondela mpo na yo mpe mpo na basaleli na yo mpe mpo na bato na yo mpo na kolongola mbemba epai na yo mpe na bandako na yo. Kaka na Ebale Nile nde yango ekotikala.” 10  Na yango, alobaki ete: “Lobi.” Bongo Moize alobaki ete: “Ekosalema ndenge yo olobi, mpo oyeba ete ezali na moto mosusu te lokola Yehova Nzambe na biso,+ 11  na ndenge mbemba ekolongwa mpenza epai na yo mpe na bandako na yo mpe epai ya basaleli na yo mpe epai ya bato na yo. Kaka na Ebale Nile nde yango ekotikala.”+ 12  Na yango, Moize ná Arona babimaki epai ya Farao, mpe Moize abelelaki Yehova+ mpo na mbemba oyo Ye atindelaki Farao. 13  Bongo Yehova asalaki ndenge Moize alobaki,+ mpe mbemba ebandaki kokufa na bandako, na mapango mpe na bilanga. 14  Mpe bazalaki kosangisa yango, mabondo mabondo, mpe mokili ebandaki kobimisa nsolo mabe.+ 15  Ntango Farao amonaki ete bolɔzi yango esili, akómisaki motema na ye makasi;+ mpe ayokelaki bango te, kaka ndenge Yehova alobaki.+ 16  Sikoyo Yehova alobaki na Moize ete: “Lobá na Arona ete: ‘Sembolá lingenda na yo+ mpe bɛtá putulu ya mabele, mpe yango esengeli kokóma bangungi na mokili mobimba ya Ezipito.’” 17  Mpe basalaki yango. Bongo Arona asembolaki lobɔkɔ na ye ná lingenda na ye mpe abɛtaki putulu ya mabele, mpe bangungi ezalaki likoló ya bato mpe banyama. Putulu nyonso ya mabele ekómaki bangungi na mokili mobimba ya Ezipito.+ 18  Mpe banganga-nzambe ya maji bazalaki komeka kosala bongo na misala na bango ya molili,+ mpo na kobimisa bangungi, kasi bazalaki kokoka te.+ Mpe bangungi ezalaki likoló ya bato mpe banyama. 19  Na yango, banganga-nzambe ya maji balobaki na Farao ete: “Ezali mosapi+ ya Nzambe!”+ Kasi motema ya Farao ezalaki kaka makasi,+ mpe ayokelaki bango te, kaka ndenge Yehova alobaki. 20  Bongo Yehova alobaki na Moize ete: “Lamuká ntɔngɔntɔngɔ mpe tɛlɛmá liboso ya Farao.+ Talá! Azali kobima, akei na mai! Mpe osengeli koloba na ye ete: ‘Talá oyo Yehova alobi: “Tiká bato na ngai bákende mpo básalela ngai.+ 21  Kasi soki otiki bato na ngai bákende te, talá nazali kotindela yo mpe basaleli na yo mpe bato na yo mpe bandako na yo mapokopoko;+ mpe bandako ya Ezipito ekotonda mpenza na mapokopoko, mpe lisusu na mabele oyo bazali. 22  Mpe na mokolo yango nakokómisa mpenza mokili ya Goshene, epai bato na ngai bazali kofanda, ndenge mosusu, mpo kuna lipokopoko ata moko ekozala te;+ mpo oyeba ete nazali Yehova na katikati ya mabele.+ 23  Mpe nakosala ete bokeseni ezala kati na bato na ngai ná bato na yo.+ Lobi elembo oyo ekosalema.”’” 24  Mpe Yehova abandaki kosala bongo; mpe maboke mineneminene ya mapokopoko ebandaki kokɔta na ndako ya Farao mpe bandako ya basaleli na ye mpe mokili mobimba ya Ezipito.+ Mokili yango ebebaki mpo na mapokopoko.+ 25  Nsukansuka Farao abengaki Moize ná Arona mpe alobaki ete: “Bókende, bópesa Nzambe na bino mbeka na mokili oyo.”+ 26  Kasi Moize alobaki ete: “Kosala bongo ekoki kondimama te, mpo tokopesa Yehova Nzambe na biso mbeka eloko oyo Baezipito bayinaka.+ Kanisá ete topesi mbeka eloko Baezipito bayinaka na miso na bango; bakobamba biso mabanga te? 27  Tokokende mobembo ya mikolo misato na esobe mpe tokopesa mpenza Yehova Nzambe na biso mbeka kaka ndenge alobi na biso.”+ 28  Sikoyo Farao alobaki ete: “Ngai nakotika bino bókende,+ mpe bokopesa mpenza Yehova Nzambe na bino mbeka na esobe.+ Kaka nde bókende mosika mingi te. Bóbondela mpo na ngai.”+ 29  Bongo Moize alobaki ete: “Talá nazali kobima epai na yo, mpe nakobondela mpenza Yehova, mpe lobi mapokopoko ekolongwa epai ya Farao, epai ya basaleli na ye mpe epai ya bato na ye. Kaka nde Farao asakana lisusu te na koboyáká kotika bato bákende kopesa Yehova mbeka.”+ 30  Nsima na yango, Moize abimaki epai ya Farao mpe abondelaki Yehova.+ 31  Bongo Yehova asalaki ndenge Moize alobaki,+ mpe mapokopoko elongwaki epai ya Farao, epai ya basaleli na ye mpe epai ya bato na ye.+ Ata moko te etikalaki. 32  Nzokande, Farao akómisaki motema na ye makasi mbala oyo lisusu mpe atikaki bato bákende te.+

Maloba na nse