Lakisá makambo oyo ezali na kati

kende na sous-menu

Kende na mitó ya makambo

Batatoli ya Yehova

Lingala

Biblia na Internet | BIBLIA - LIBONGOLI YA MOKILI YA SIKA

Kobima 7:1-25

7  Bongo Yehova alobaki na Moize ete: “Talá, nakómisi yo Nzambe liboso ya Farao,+ mpe Arona ndeko na yo mpenza akokóma mosakoli na yo.+  Yo—okoloba nyonso oyo nakopesa yo etinda;+ mpe Arona ndeko na yo akoloba na Farao,+ mpe asengeli kotika bana ya Yisraele bálongwa na mokili na ye,+ bákende.  Nde ngai, nakotika motema ya Farao ekóma makasi,+ mpe nakokómisa bilembo na ngai mpe makamwisi na ngai mingi na mokili ya Ezipito.+  Mpe Farao akoyokela bino te,+ mpe ekosɛnga natya lobɔkɔ na ngai likoló ya Ezipito mpe nabimisa mampinga na ngai,+ bato na ngai,+ bana ya Yisraele,+ na mokili ya Ezipito, na bitumbu minene.+  Mpe Baezipito bakoyeba mpenza ete nazali Yehova ntango nakosembolela Ezipito lobɔkɔ,+ mpe nakolongola solo bana ya Yisraele na katikati na bango.”+  Mpe Moize ná Arona basalaki kaka ndenge Yehova apesaki bango mitindo.+ Basalaki kaka bongo.+  Mpe Moize azalaki na mbula ntuku mwambe (80) mpe Arona azalaki na mbula ntuku mwambe na misato (83) na ntango oyo balobaki na Farao.+  Sikoyo Yehova alobaki na Moize mpe na Arona ete:  “Soki Farao alobi na bino ete: ‘Bósala likamwisi oyo ekondimisa maloba na bino,’+ boye osengeli koloba na Arona ete: ‘Kamatá lingenda+ na yo mpe bwaká yango na nse liboso ya Farao.’ Yango ekokóma nyoka moko monene.”+ 10  Bongo Moize ná Arona bakɔtaki epai ya Farao mpe basalaki kaka ndenge Yehova apesaki mitindo. Na yango, Arona abwakaki lingenda na ye na nse liboso ya Farao ná basaleli na ye mpe yango ekómaki nyoka moko monene. 11  Kasi, Farao mpe abengaki bato ya bwanya mpe banganga-nkisi;+ mpe banganga-nzambe ya Ezipito oyo basalelaka maji, bango mpe basalaki kaka bongo na misala na bango ya maji.+ 12  Bongo babwakaki na nse, moto na moto lingenda na ye, mpe yango ekómaki banyoka ya minene; kasi lingenda ya Arona emɛlaki mangenda na bango. 13  Ata bongo, motema ya Farao ekómaki makasi,+ mpe ayokelaki bango te, kaka ndenge Yehova asilaki koloba. 14  Bongo Yehova alobaki na Moize ete: “Motema ya Farao ezali makasi.+ Aboyi kotika bato bákende.+ 15  Na ntɔngɔ, kende epai ya Farao. Talá! Azali kobima, akei na mai!+ Mpe osengeli kotɛlɛma mpo na kokutana na ye pembeni ya Ebale Nile,+ mpe okozwa na lobɔkɔ na yo lingenda oyo ebongwanaki nyoka.+ 16  Mpe osengeli koloba na ye ete: ‘Yehova Nzambe ya Baebre atindi ngai epai na yo+ mpe alobi: “Tiká bato na ngai bákende kosalela ngai na esobe,”+ kasi talá otosi te tii sikoyo. 17  Talá oyo Yehova alobi:+ “Na likambo oyo okoyeba ete nazali Yehova.+ Talá, na lingenda oyo ezali na lobɔkɔ na ngai, nazali kobɛta mai ya Ebale Nile,+ mpe yango ekobongwana mpenza makila.+ 18  Mpe mbisi ya Ebale Nile ekokufa,+ mpe Ebale Nile ekobimisa mpenza nsolo mabe,+ mpe Baezipito bakoyoka mposa ata moke te ya komɛla mai ya Ebale Nile.”’”+ 19  Na nsima, Yehova alobaki na Moize ete: “Lobá na Arona boye: ‘Kamatá lingenda na yo mpe sembolá lobɔkɔ na yo+ likoló ya mai ya Ezipito, likoló ya bibale na bango, likoló ya banzela ya mai ya Nile mpe likoló ya bitima na bango oyo etondi na matiti+ mpe likoló ya mai nyonso na bango oyo etyamá na bibombelo, mpo ekóma makila.’ Mpe makila ekozala mpenza na mokili mobimba ya Ezipito mpe na biloko oyo babombaka mai, ya mabaya mpe ya mabanga.” 20  Na mbala moko, Moize ná Arona basalaki bongo,+ kaka ndenge Yehova apesaki mitindo,+ mpe atombolaki lingenda mpe abɛtaki mai ya Ebale Nile na miso ya Farao ná basaleli na ye,+ mpe mai nyonso ya Ebale Nile ebongwanaki makila.+ 21  Mpe mbisi ya Ebale Nile ekufaki,+ mpe Ebale Nile ebandaki kobimisa nsolo mabe; mpe Baezipito bakokaki komɛla mai ya Ebale Nile te;+ mpe makila ezalaki na mokili mobimba ya Ezipito. 22  Kasi, banganga-nzambe ya Ezipito oyo basalelaka maji basalaki kaka bongo na misala na bango ya molili;+ bongo motema ya Farao ezalaki kaka makasi,+ mpe ayokelaki bango te, kaka ndenge Yehova asilaki koloba.+ 23  Na yango, Farao abalukaki mpe akɔtaki na ndako na ye, mpe atyaki motema na ye na likambo yango te.+ 24  Mpe Baezipito nyonso bazalaki kotimola zingazinga na Ebale Nile mpo na kozwa mai ya komɛla, mpo bazalaki te kokoka komɛla mai ya Ebale Nile.+ 25  Mpe mikolo nsambo ekokaki nsima ya kobɛta oyo Yehova abɛtaki Ebale Nile.

Maloba na nse