Lakisá makambo oyo ezali na kati

kende na sous-menu

Kende na mitó ya makambo

Batatoli ya Yehova

Lingala

Biblia na Internet | BIBLIA - LIBONGOLI YA MOKILI YA SIKA

Kobima 37:1-29

37  Sikoyo Bezalele+ asalaki Sanduku+ na nzete ya akasia. Bolai na yango mapeko mibale na ndambo, mpe bonene na yango lipeko moko na ndambo, mpe bosanda na yango lipeko moko na ndambo.+  Na nsima azipaki yango na wolo ya pɛto na kati mpe na libándá mpe asalelaki yango ndelo ya wolo zingazinga.+  Na nsima, asalelaki yango mpɛtɛ minei na wolo oyo enyangwisami, mpo na kotya yango na likoló ya makolo na yango minei, mpɛtɛ mibale na ngámbo na yango moko mpe mpɛtɛ mibale na ngámbo na yango mosusu.+  Na nsima asalaki banzete ya komema yango na nzete ya akasia mpe azipaki yango na wolo.+  Bongo akɔtisaki banzete yango na mpɛtɛ oyo ezali na mipanzi ya Sanduku mpo na kokumbaka na yango Sanduku.+  Mpe asalaki ezipeli+ na wolo ya pɛto. Bolai na yango mapeko mibale na ndambo, mpe bonene na yango lipeko moko na ndambo.+  Lisusu asalaki bakeruba mibale ya wolo. Asalaki yango eloko oyo ebɛtami na marto na nsuka mibale ya ezipeli.+  Keruba moko azalaki na nsuka oyo, mpe keruba mosusu na nsuka oyo. Asalaki bakeruba likoló ya ezipeli na nsuka na yango mibale.+  Mpe yango ekómaki bakeruba oyo esemboli mapapu mibale epai ya likoló, mpo na kozipa ezipeli na mapapu na yango,+ mpe bilongi na yango ezalaki kotalana. Bilongi ya bakeruba ezalaki kotala ezipeli.+ 10  Mpe asalaki mesa na nzete ya akasia.+ Bolai na yango mapeko mibale, bonene na yango lipeko moko, mpe bosanda na yango lipeko moko na ndambo.+ 11  Na nsima azipaki yango na wolo ya pɛto mpe asalelaki yango ndelo ya wolo zingazinga.+ 12  Na nsima asalelaki yango etando oyo ebimi, oyo ezali na bonene ya tandu zingazinga na yango mpe asalaki ndelo ya wolo mpo na etando na yango oyo ebimi zingazinga.+ 13  Lisusu, asalelaki yango mpɛtɛ minei ya wolo mpe atyaki mpɛtɛ yango likoló ya nsuka minei esika makolo minei ezalaki.+ 14  Mpɛtɛ yango ezalaki pene na etando oyo ebimi, mpo ezala bisimbeli ya banzete ya komema na yango mesa.+ 15  Na nsima asalaki banzete yango na nzete ya akasia mpe azipaki yango na wolo mpo na kokumbaka mesa.+ 16  Nsima na yango, asalaki bisaleli oyo ezali likoló ya mesa, basaani na yango mpe bakɔpɔ na yango mpe mabakuli na yango mpe bilokó na yango oyo bazalaki kosalela mpo na kosopa makabo ya masanga; asalaki yango na wolo ya pɛto.+ 17  Na nsima, asalaki etɛlɛmiselo ya miinda+ na wolo ya pɛto. Asalaki etɛlɛmiselo ya miinda eloko oyo ebɛtami na marto. Mipanzi na yango mpe bitape na yango, bakɔpɔ na yango, mbuma na yango mpe bafololo na yango eutaki na yango.+ 18  Mpe bitape motoba eutaki na mipanzi na yango, bitape misato ya etɛlɛmiselo ya miinda na mopanzi na yango moko mpe bitape misato ya etɛlɛmiselo ya miinda na mopanzi na yango mosusu.+ 19  Kɔpɔ misato oyo esalemi lokola bafololo ya nzete ya amande ezalaki na mokomoko ya bitape ya mopanzi oyo, ná mbuma mpe bafololo oyo elandani, awa mbuma awa fololo; mpe bakɔpɔ misato oyo esalemi lokola bafololo ya nzete ya amande likoló ya mokomoko ya bitape ya mopanzi oyo mosusu, ná mbuma mpe bafololo oyo elandani, awa mbuma awa fololo. Ndenge wana nde bitape motoba eutaki na etɛlɛmiselo ya miinda yango.+ 20  Mpe likoló ya etɛlɛmiselo ya miinda ezalaki na bakɔpɔ minei oyo esalemi lokola bafololo ya nzete ya amande, ná mbuma na yango mpe bafololo na yango oyo elandani, awa mbuma awa fololo.+ 21  Mpe mbuma na nse ya bitape mibale ezalaki kobima na yango, mpe mbuma na nse ya bitape mibale mosusu ezalaki kouta na yango, mpe mbuma na nse ya bitape mibale mosusu ezalaki kouta na yango, mpo na bitape motoba oyo ezalaki kouta na etɛlɛmiselo ya miinda.+ 22  Bambuma na yango mpe bitape na yango ezalaki kouta na yango. Yango mobimba ezalaki eloko kaka moko, eloko oyo ebɛtami na marto, na wolo ya pɛto.+ 23  Na nsima asalaki miinda na yango nsambo mpe bapɛnsi na yango ya mike mpe biloko na yango ya kotya mɔtɔ oyo esalemi na wolo ya pɛto.+ 24  Na talanta moko ya wolo ya pɛto asalaki yango ná bisaleli na yango nyonso. 25  Sikoyo asalaki etumbelo ya mpaka ya malasi+ na nzete ya akasia.+ Bolai na yango lipeko moko mpe bonene na yango lipeko moko, yango ezalaki karé, mpe bosanda na yango mapeko mibale. Maseke na yango ezalaki kouta na yango.+ 26  Na nsima azipaki yango na wolo ya pɛto: etando na yango ya likoló mpe mipanzi na yango zingazinga ná maseke na yango, mpe asalelaki yango ndelo ya wolo zingazinga.+ 27  Mpe asalelaki yango mpɛtɛ mibale ya wolo na nse ya ndelo na yango, na mipanzi na yango mibale, na mipanzi na yango mibale oyo etalani, mpo ezala bisimbeli ya banzete ya komema yango.+ 28  Mpe nsima na yango asalaki banzete yango na nzete ya akasia mpe azipaki yango na wolo.+ 29  Asalaki lisusu mafuta mosantu mpo na kotyaka mafuta+ mpe mpaka ya malasi ya pɛto, ya nsolo kitoko,+ mosala ya moto oyo asalaka malasi.

Maloba na nse