Lakisá makambo oyo ezali na kati

kende na sous-menu

Kende na mitó ya makambo

Batatoli ya Yehova

Lingala

Biblia na Internet | BIBLIA - LIBONGOLI YA MOKILI YA SIKA

Kobima 36:1-38

36  “Mpe Bezalele asengeli kosala mosala, ná Oholiabe+ ná mobali nyonso oyo azali na motema ya bwanya oyo Yehova apesi bwanya+ mpe mayele+ na makambo wana mpo na koyeba ndenge ya kosala mosala nyonso ya esika mosantu na kolandáká mitindo nyonso oyo Yehova apesi.”+  Mpe Moize abengisaki Bezalele ná Oholiabe mpe mobali nyonso oyo azalaki na motema ya bwanya oyo kati na ye Yehova atyaki bwanya,+ moto nyonso oyo motema na ye etindaki ye akende na mosala mpo na kosala yango.+  Bongo bazwaki liboso ya Moize likabo nyonso+ oyo bana ya Yisraele bamemaki mpo na mosala ya esika mosantu ete yango esalema, mpe, bango, bazalaki kaka komemela ye likabo ya bolingo ntɔngɔ na ntɔngɔ.  Mpe bato nyonso ya bwanya oyo bazalaki kosala mosala mosantu yango nyonso babandaki koya, moko na moko, bauti na mosala na bango oyo bazalaki kosala,  mpe balobaki na Moize ete: “Bato bazali koya na biloko mingi koleka oyo esengeli kosalelama na mosala oyo Yehova apesi mitindo ete esalema.”  Bongo Moize apesaki mitindo ete bápesa liyebisi na kaa mobimba ete: “Mibali ná basi, bósala lisusu biloko te mpo na likabo mosantu.” Na yango bapekisaki bato koya na eloko.  Mpe biloko ekokaki mpo na mosala nyonso oyo esengelaki kosalema, mpe elekaki kutu koleka.  Mpe bato nyonso oyo bazalaki na motema ya bwanya+ na kati ya baoyo bazalaki kosala mosala babandaki kosala tabernakle,+ bilamba zomi ya hema, ya lini ya kitoko oyo elíngamalíngamá, ná nsinga ya bulé ná lɛnɛ oyo epakolami langi ya mwa motane-bulé mpe biloko oyo epakolami langi ya motane makasi; asalaki yango ezala na bakeruba, mosala ya moto oyo asalaka mayemi na bansinga.  Bolai ya elamba mokomoko ya hema ezalaki mapeko ntuku mibale na mwambe (28), mpe bonene ya elamba mokomoko ya hema mapeko minei. Bilamba nyonso ya hema ezalaki na bolai mpe na bonene ndenge moko. 10  Bongo akangisaki bilamba mitano ya hema, elamba moko na elamba mosusu,+ mpe bilamba mitano mosusu ya hema akangisaki yango, elamba moko na elamba mosusu. 11  Nsima na yango asalaki miso na nsinga ya bulé na mopanzi ya elamba moko ya hema yango na nsuka ya esika ya kokangisa yango. Asalaki kaka bongo na mopanzi ya elamba ya hema oyo ebimi na esika mosusu oyo yango ekangani.+ 12  Asalaki miso ntuku mitano (50) na elamba moko ya hema, mpe asalaki miso ntuku mitano na nsuka ya elamba ya hema oyo ezalaki na esika mosusu oyo yango ekanganaki, miso yango etalanaki.+ 13  Nsukansuka asalaki bakroshɛ ya wolo ntuku mitano (50) mpe akangisaki bilamba ya hema, akangisaki elamba moko na elamba mosusu na bakroshɛ yango, bongo yango ekómaki kaka tabernakle moko.+ 14  Mpe asalaki bilamba ya hema na nsuki ya ntaba mpo na hema likoló ya tabernakle. Asalaki bilamba zomi na moko ya hema.+ 15  Bolai ya elamba mokomoko ya hema ezalaki mapeko ntuku misato (30), mpe bonene ya elamba mokomoko ya hema ezalaki mapeko minei. Bilamba yango zomi na moko ya hema ezalaki na bolai mpe na bonene ndenge moko.+ 16  Na nsima akangisaki bilamba mitano ya hema esika moko mpe bilamba mosusu motoba ya hema esika moko.+ 17  Na nsima asalaki miso ntuku mitano (50) na mopanzi ya elamba moko ya hema oyo ebimi na esika oyo yango ekanganaki, mpe asalaki miso ntuku mitano na mopanzi ya elamba mosusu ya hema oyo ekanganaki na yango.+ 18  Nsima na yango asalaki bakroshɛ ya motako ntuku mitano (50) mpo na kokangisa hema esika moko mpo ekóma kaka eloko moko.+ 19  Mpe abandaki kosala ezipeli moko mpo na hema na mposo ya mpate-mobali oyo epakolami langi ya motane mpe ezipeli moko na mposo ya nyama ebengami fɔkɛ+ na likoló.+ 20  Na nsima asalaki bakadrɛ mpo na tabernakle na nzete ya akasia,+ atɛlɛmisaki yango kotɛlɛmisa. 21  Bolai ya kadrɛ moko mapeko zomi, mpe bonene ya kadrɛ mokomoko lipeko moko na ndambo.+ 22  Kadrɛ mokomoko ezalaki na matutu mibale oyo ekangisamaki na eloko moko. Yango nde lolenge asalaki bakadrɛ nyonso ya tabernakle.+ 23  Bongo asalaki bakadrɛ mpo na tabernakle, bakadrɛ ntuku mibale (20) na ngámbo oyo ezali kotala Negebe, na sudi.+ 24  Mpe asalaki bitɛlɛmiselo ntuku minei (40) ya palata oyo ezali na mabulu, na nse ya bakadrɛ ntuku mibale (20), bitɛlɛmiselo mibale oyo ezali na mabulu na nse ya kadrɛ moko ná matutu na yango mibale, mpe bitɛlɛmiselo mibale oyo ezali na mabulu na nse ya kadrɛ mosusu ná matutu na yango mibale.+ 25  Mpe mpo na ngámbo mosusu ya tabernakle, na ngámbo ya nɔrdi, asalaki bakadrɛ ntuku mibale (20)+ 26  ná bitɛlɛmiselo na yango ntuku minei (40) ya palata, oyo ezali na mabulu, bitɛlɛmiselo mibale oyo ezali na mabulu na nse ya kadrɛ moko mpe bitɛlɛmiselo mibale oyo ezali na mabulu na nse ya kadrɛ mosusu.+ 27  Mpe na bipai ya nsima ya tabernakle na wɛsti, asalaki bakadrɛ motoba.+ 28  Mpe asalaki bakadrɛ mibale mpo ezala makonzí ya litumu ya tabernakle na bipai na yango mibale ya nsima.+ 29  Mpe yango ezalaki mibale na nse, mpe yango ezalaki mibale ekangani tii na nsɔngɛ ya mokomoko na yango, na lopɛtɛ ya liboso. Yango nde asalaki mpo na bakadrɛ yango mibale, mpo na makonzí mibale ya litumu.+ 30  Bongo yango nyonso ezalaki bakadrɛ mwambe ná bitɛlɛmiselo na yango zomi na motoba ya palata, oyo ezali na mabulu, bitɛlɛmiselo mibale oyo ezali na mabulu pembeni ya bitɛlɛmiselo mibale oyo ezali na mabulu na nse ya kadrɛ mokomoko.+ 31  Mpe asalaki lisusu bikangiseli na nzete ya akasia: mitano mpo na bakadrɛ ya ngámbo mosusu ya tabernakle+ 32  mpe bikangiseli mitano mpo na bakadrɛ ya ngámbo mosusu ya tabernakle mpe bikangiseli mitano mpo na bakadrɛ ya tabernakle na bipai mibale ya nsima, na wɛsti.+ 33  Na nsima asalaki ekangiseli ya katikati oyo ezali kokatisa na katikati ya bakadrɛ banda na nsuka oyo tii na nsuka oyo.+ 34  Mpe azipaki bakadrɛ yango na wolo, mpe asalaki mpɛtɛ na yango na wolo mpo ezala bisimbeli ya bikangiseli, mpe azipaki bikangiseli yango na wolo.+ 35  Mpe abandaki kosala rido+ na nsinga ya bulé mpe na lɛnɛ oyo epakolami langi ya mwa motane-bulé mpe na biloko oyo epakolami langi ya motane makasi mpe na lini ya kitoko oyo elíngamalíngamá. Asalaki yango ezala na bakeruba, mosala ya moto oyo asalaka mayemi na bansinga.+ 36  Na nsima asalelaki yango makonzí minei ya akasia mpe azipaki yango na wolo, bikakiselo na yango ezalaki ya wolo, mpe anyangwisaki palata mpo na kosalela yango bitɛlɛmiselo minei, oyo ezali na mabulu.+ 37  Mpe asalaki elamba ya kozipa mpo na monɔkɔ ya hema na nsinga ya bulé mpe na lɛnɛ oyo epakolami langi ya mwa motane-bulé mpe na biloko oyo epakolami langi ya motane makasi mpe na lini ya kitoko oyo elíngamalíngamá, mosala ya moto oyo asalaka mayemi na bilamba,+ 38  ná makonzí na yango mitano mpe bikakiselo na yango. Mpe azipaki bansɔngɛ na yango mpe bikangiseli na yango na wolo, kasi bitɛlɛmiselo na yango mitano oyo ezali na mabulu ezalaki ya motako.+

Maloba na nse