Lakisá makambo oyo ezali na kati

kende na sous-menu

Kende na mitó ya makambo

Batatoli ya Yehova

Lingala

Biblia na Internet | BIBLIA - LIBONGOLI YA MOKILI YA SIKA

Kobima 27:1-21

27  “Mpe osengeli kosala etumbelo na nzete ya akasia, bolai na yango mapeko mitano mpe bonene na yango mapeko mitano. Etumbelo+ ekozala karé, mpe bosanda na yango mapeko misato.  Mpe osengeli kosala maseke+ na yango na nsuka na yango minei, na likoló. Maseke na yango ekobima na yango, mpe osengeli kozipa yango na motako.+  Mpe osengeli kosala bambɛki na yango mpo na kolongola putulu ya mɔtɔ oyo etondi na mafuta, ná bapau na yango, ná mabakuli na yango, ná nkanya na yango, mpe biloko na yango ya kotya mɔtɔ; mpe okosala bisaleli na yango nyonso na motako.+  Mpe osengeli kosalela yango motalaka, monyama+ ya motako; mpe osengeli kosala likoló ya monyama yango mpɛtɛ minei ya motako na nsuka na yango minei.  Mpe osengeli kotya yango na nse ya esika oyo ebimi ya etumbelo na nse epai ya kati mpenza, mpe monyama yango esengeli kozala na katikati ya etumbelo.+  Mpe osengeli kosala banzete ya komema etumbelo, banzete na yango ekozala ya akasia, mpe osengeli kozipa yango na motako.+  Mpe banzete na yango ya komema esengeli kokɔtisama na mpɛtɛ, mpe banzete yango esengeli kozala na mipanzi mibale ya etumbelo ntango bazali kokumba yango.+  Okosala yango kɛsi ya mabaya oyo ezali polele na kati. Kaka ndenge amonisaki yo na ngomba, bakosala yango kaka bongo.+  “Mpe osengeli kosala lopango+ ya tabernakle. Mpo na ngámbo oyo etali Negebe, epai ya sudi, lopango ezali na barido ya lini ya kitoko oyo elíngamalíngamá;+ bolai ya mopanzi moko mapeko nkama moko (100). 10  Makonzí na yango ntuku mibale (20) ná bitɛlɛmiselo na yango ntuku mibale oyo ezali na mabulu, ezali ya motako. Bikakiselo ya makonzí ná bikangiseli na yango ezali ya palata.+ 11  Ezali mpe bongo na ngámbo ya nɔrdi na bolai: barido ezali na bolai ya mapeko nkama moko (100), mpe makonzí na yango ntuku mibale (20) ná bitɛlɛmiselo na yango ntuku mibale oyo ezali na mabulu, ezali ya motako, bikakiselo ya makonzí ná bikangiseli na yango ezali ya palata.+ 12  Mpo na bonene ya lopango, na ngámbo ya wɛsti, barido ezali na mapeko ntuku mitano (50), makonzí na yango ezali zomi mpe bitɛlɛmiselo na yango oyo ezali na mabulu ezali zomi.+ 13  Mpe bonene ya lopango na ngámbo ya ɛsti, epai moi ebimaka, ezali mapeko ntuku mitano (50).+ 14  Mpe barido ya mapeko zomi na mitano na ngámbo moko, makonzí na yango ezali misato mpe bitɛlɛmiselo na yango oyo ezali na mabulu ezali misato.+ 15  Mpe barido ya mapeko zomi na mitano na ngámbo mosusu, makonzí na yango ezali misato mpe bitɛlɛmiselo na yango oyo ezali na mabulu ezali misato.+ 16  “Mpe na monɔkɔ ya lopango, ezali na elamba ya kozipa, molai na yango mapeko ntuku mibale (20), oyo esalemi na nsinga ya bulé mpe na lɛnɛ oyo epakolami langi ya mwa motane-bulé mpe na biloko oyo epakolami langi ya motane makasi mpe na lini ya kitoko oyo elíngamalíngamá, mosala ya moto oyo asalaka mayemi na bilamba,+ makonzí na yango ezali minei mpe bitɛlɛmiselo na yango oyo ezali na mabulu, ezali minei.+ 17  Makonzí nyonso ya lopango zingazinga ezali na biloko ya palata  oyo ekangaka makasi, mpe bikakiselo na yango ezali ya palata kasi bitɛlɛmiselo na yango oyo ezali na mabulu ezali ya motako.+ 18  Bolai ya lopango ezali mapeko nkama moko (100),+ mpe bonene na yango mapeko ntuku mitano (50), mpe bosanda na yango mapeko mitano, esalemi na lini ya kitoko oyo elíngamalíngamá, mpe bitɛlɛmiselo na yango oyo ezali na mabulu ezali ya motako. 19  Mpe bisaleli nyonso ya tabernakle oyo ekosalelama na misala na yango nyonso, mpe bapike na yango nyonso, mpe bapike nyonso ya lopango ezali ya motako.+ 20  “Kasi yo, okopesa bana ya Yisraele etinda ete bázwela yo mafuta ya pɛto mpo na engɛngiseli, mafuta ya mbuma ya olive oyo etutami, mpo na kopelisa miinda ntango nyonso.+ 21  Na kati ya hema ya kokutana, libándá ya rido+ oyo ezali pene na Litatoli, Arona ná bana na ye ya mibali bakobongisa yango mpo epelaka banda mpokwa tii na ntɔngɔ liboso ya Yehova.+ Yango ezali mobeko mpo na ntango oyo etyami ndelo te na boumeli ya mabota na bango,+ oyo bana ya Yisraele basengeli kotosa.+

Maloba na nse