Lakisá makambo oyo ezali na kati

kende na sous-menu

Kende na mitó ya makambo

Batatoli ya Yehova

Lingala

Biblia na Internet | BIBLIA - LIBONGOLI YA MOKILI YA SIKA

Kobima 26:1-37

26  “Mpe okosala tabernakle na bilamba zomi ya hema,+ na lini ya kitoko oyo elíngamalíngamá mpe na nsinga ya bulé mpe na lɛnɛ oyo epakolami langi ya mwa motane-bulé mpe na biloko oyo epakolami langi ya motane makasi.+ Okosala yango na bakeruba,+ ekozala mosala ya moto oyo asalaka mayemi na bansinga.  Bolai ya elamba mokomoko ya hema ezali mapeko ntuku mibale na mwambe (28) mpe bonene ya elamba mokomoko ya hema ezali mapeko minei. Bilamba nyonso ya hema ezali na bolai mpe na bonene ndenge moko.+  Bilamba mitano ya hema esali molɔngɔ, moko ekangani na mosusu, mpe bilamba mitano ya hema esali molɔngɔ, moko ekangani na mosusu.+  Mpe osengeli kosala miso na nsinga ya bulé na mopanzi ya elamba moko ya hema yango, na nsuka ya molɔngɔ mokomoko; mpe okosala kaka bongo na mopanzi ya elamba ya hema oyo ebimi na esika mosusu oyo yango ekangani.+  Okosala miso ntuku mitano (50) na elamba moko ya hema, mpe okosala miso ntuku mitano na nsuka ya elamba ya hema oyo ezali na esika mosusu oyo yango ekangani, miso yango ekotalana.+  Mpe osengeli kosala bakroshɛ ya wolo ntuku mitano (50) mpe kokangisa bilamba ya hema, okokangisa elamba moko na elamba mosusu na bakroshɛ yango, mpe esengeli kokóma kaka tabernakle moko.+  “Mpe osengeli kosala bilamba ya nsuki ya ntaba+ mpo na hema likoló ya tabernakle. Okosala bilamba zomi na moko ya hema.  Bolai ya elamba mokomoko ya hema ezali mapeko ntuku misato (30),+ mpe bonene ya elamba mokomoko ya hema ezali mapeko minei. Bilamba yango zomi na moko ezali na bolai mpe na bonene ndenge moko.  Mpe osengeli kokangisa bilamba mitano ya hema esika moko mpe bilamba motoba esika moko,+ mpe osengeli kogumba na mibale elamba ya motoba na liboso ya hema. 10  Mpe osengeli kosala miso ntuku mitano (50) na mopanzi ya elamba moko ya hema, elamba oyo ezali na nsuka ya molɔngɔ mokomoko, mpe miso ntuku mitano na mopanzi ya elamba oyo ezali na esika mosusu ya kokangisa yango. 11  Mpe osengeli kosala bakroshɛ ya motako+ ntuku mitano (50) mpe kokɔtisa bakroshɛ yango na miso yango mpe kokangisa elamba ya hema esika moko, mpe yango esengeli kokóma kaka moko.+ 12  Mpe elamba oyo etikali na bilamba ya hema ekobanda kodiembela. Ndambo ya elamba ya hema, oyo etikali, ekobanda kodiembela na nsima ya tabernakle. 13  Mpe lipeko oyo ezali na mopanzi oyo mpe lipeko oyo ezali na mopanzi oyo mosusu na oyo etikali na bolai ya bilamba ya hema ekodiembela na mipanzi ya tabernakle, mpo na kozipa yango na mopanzi oyo mpe na mopanzi oyo mosusu. 14  “Mpe osengeli kosalela hema ezipeli moko na mposo ya mpate-mobali, oyo epakolami langi ya motane mpe ezipeli moko na likoló oyo esalemi na mposo ya nyama ebengami fɔkɛ. 15  “Mpe osengeli kosala bakadrɛ+ mpo na tabernakle na nzete ya akasia, okotɛlɛmisa yango kotɛlɛmisa. 16  Bolai ya kadrɛ moko mapeko zomi, mpe bonene ya kadrɛ mokomoko lipeko moko na ndambo. 17  Kadrɛ mokomoko ezali na matutu mibale oyo ekokani. Yango nde lolenge okosala bakadrɛ nyonso ya tabernakle. 18  Mpe osengeli kosala bakadrɛ mpo na tabernakle, bakadrɛ ntuku mibale (20) na ngámbo oyo ezali kotala Negebe, na sudi. 19  “Mpe okosala bitɛlɛmiselo+ ntuku minei (40) ya palata, oyo ezali na mabulu, na nse ya bakadrɛ ntuku mibale (20); bitɛlɛmiselo mibale oyo ezali na mabulu na nse ya kadrɛ moko ná matutu na yango mibale, mpe bitɛlɛmiselo mibale oyo ezali na mabulu na nse ya kadrɛ mosusu ná matutu na yango mibale. 20  Mpe na ngámbo mosusu ya tabernakle, na ngámbo ya nɔrdi, bakadrɛ ntuku mibale (20),+ 21  ná bitɛlɛmiselo na yango ntuku minei (40) ya palata, oyo ezali na mabulu, bitɛlɛmiselo mibale oyo ezali na mabulu na nse ya kadrɛ moko mpe bitɛlɛmiselo mibale oyo ezali na mabulu na nse ya kadrɛ mosusu.+ 22  Mpe na bipai ya nsima ya tabernakle na wɛsti, okosala bakadrɛ motoba.+ 23  Mpe okosala bakadrɛ mibale mpo ezala makonzí ya litumu ya tabernakle+ na bipai na yango mibale ya nsima. 24  Mpe yango ekozala mibale na nse, mpe yango ekozala mibale ekangani tii na nsɔngɛ ya mokomoko na yango, na lopɛtɛ ya liboso. Yango mibale ekozala lolenge wana. Yango ekozala makonzí mibale ya litumu. 25  Mpe esengeli kozala na bakadrɛ mwambe ná bitɛlɛmiselo na yango ya palata, oyo ezali na mabulu, bitɛlɛmiselo zomi na motoba, bitɛlɛmiselo mibale oyo ezali na mabulu na nse ya kadrɛ moko mpe bitɛlɛmiselo mibale oyo ezali na mabulu na nse ya kadrɛ mosusu. 26  “Mpe osengeli kosala bikangiseli na nzete ya akasia:+ mitano mpo na bakadrɛ ya ngámbo mosusu ya tabernakle, 27  mpe bikangiseli mitano mpo na bakadrɛ ya ngámbo mosusu ya tabernakle mpe bikangiseli mitano mpo na bakadrɛ ya ngámbo ya tabernakle na bipai mibale ya nsima, na wɛsti.+ 28  Mpe ekangiseli ya katikati, na katikati ya bakadrɛ, ezali kokatisa banda na nsuka oyo tii na nsuka oyo. 29  “Mpe okozipa bakadrɛ yango na wolo,+ mpe okosala mpɛtɛ na yango na wolo mpo ezala bisimbeli ya bikangiseli; mpe osengeli kozipa bikangiseli yango na wolo. 30  Mpe osengeli kotɛlɛmisa tabernakle engebene plan na yango oyo bamonisaki yo na ngomba.+ 31  “Mpe osengeli kosala rido+ na nsinga ya bulé mpe na lɛnɛ oyo epakolami langi ya mwa motane-bulé mpe na biloko oyo epakolami langi ya motane makasi mpe na lini ya kitoko oyo elíngamalíngamá. Akosala yango ezala na bakeruba,+ mosala ya moto oyo asalaka mayemi na bansinga. 32  Mpe osengeli kotya yango likoló ya makonzí minei ya akasia oyo ezipami na wolo. Bikakiselo na yango ezali ya wolo. Yango ezali likoló ya bitɛlɛmiselo ya palata oyo ezali na mabulu. 33  Mpe osengeli kotya rido na nse ya bakroshɛ mpe kokɔtisa sanduku ya litatoli+ kuna na nsima ya rido; mpe rido yango esengeli kokabola mpo na bino Esika Mosantu+ mpe Esika oyo Eleki Bosantu.+ 34  Mpe osengeli kotya ezipeli likoló ya sanduku ya litatoli na kati ya Esika oyo Eleki Bosantu. 35  “Mpe osengeli kotya mesa libándá ya rido, mpe etɛlɛmiselo ya miinda+ ekotalana na mesa, na mopanzi ya tabernakle na epai ya sudi; mpe okotya mesa na epai ya nɔrdi. 36  Mpe osengeli kosala mpo na monɔkɔ ya hema elamba ya kozipa+ na nsinga ya bulé mpe na lɛnɛ oyo epakolami langi ya mwa motane-bulé mpe na biloko oyo epakolami langi ya motane makasi mpe na lini ya kitoko oyo elíngamalíngamá, eloko esalemi na moto oyo asalaka mayemi na bilamba. 37  Mpe mpo na elamba ya kozipa, osengeli kosala makonzí mitano ya akasia mpe kozipa yango na wolo. Bikakiselo na yango ezali ya wolo. Mpe osengeli konyangwisa motako mpo na kosalela yango bitɛlɛmiselo mitano oyo ezali na mabulu.

Maloba na nse