Lakisá makambo oyo ezali na kati

kende na sous-menu

Kende na mitó ya makambo

Batatoli ya Yehova

Lingala

Biblia na Internet | BIBLIA - LIBONGOLI YA MOKILI YA SIKA

Kobima 18:1-27

18  Sikoyo Yetro nganga-nzambe ya Midiane, bokilo ya Moize,+ ayokaki makambo nyonso oyo Nzambe asalelaki Moize mpe Yisraele bato na ye, ndenge Yehova abimisaki Yisraele na Ezipito.+  Bongo Yetro, bokilo ya Moize, akamataki Zipora, mwasi ya Moize, wana Moize asilaki kozongisa ye,  mpe bana na ye mibale ya mibali,+ moko nkombo na ye Gereshome,+ “mpamba te,” alobaki ete: “nakómi moto oyo afandi mopaya na mokili ya bopaya”;  mpe mosusu nkombo na ye ezalaki Eliezere,+ “mpamba te,” mpo na kozongela maloba na ye: “Nzambe ya tata na ngai azali mosungi na ngai na ndenge abikisaki ngai na mopanga ya Farao.”+  Bongo Yetro, bokilo ya Moize, ná bana mibali mpe mwasi ya Moize bayaki epai ya Moize na esobe epai ye atyaki kaa, na ngomba ya Nzambe ya solo.+  Bongo atindelaki Moize maloba ete: “Ngai, bokilo na yo, Yetro,+ nayei epai na yo, ngai ná mwasi na yo ná bana na ye mibale ya mibali elongo na ye.”  Na mbala moko Moize abimaki kokutana na bokilo na ye, mpe afukamaki elongi na nse mpe apwɛpwaki ye;+ mpe babandaki kotunana soki bazali malamu. Nsima na yango bakɔtaki na hema.  Mpe Moize abandaki koyebisa bokilo na ye makambo nyonso oyo Yehova asalaki Farao mpe Ezipito mpo na Yisraele,+ mpe bampasi nyonso oyo ekwelaki bango na nzela,+ kasi ata bongo Yehova azalaki kobikisa bango.+  Bongo Yetro asepelaki mingi mpo na makambo nyonso ya malamu oyo Yehova asalelaki Yisraele na ndenge abikisaki bango na lobɔkɔ ya Ezipito.+ 10  Na yango Yetro alobaki ete: “Yehova apambolama, oyo abikisi bino na lobɔkɔ ya Ezipito mpe na lobɔkɔ ya Farao, mpe oyo alongoli bato na nse ya bokonzi ya Ezipito.+ 11  Sikoyo nayebi mpenza ete Yehova azali monene koleka banzambe+ mosusu nyonso mpo na likambo oyo Baezipito basalelaki Bayisraele na lofundo.” 12  Bongo Yetro, bokilo ya Moize, akamataki likabo ya kotumba mpe bambeka mpo na Nzambe;+ mpe Arona ná mikóló nyonso ya Yisraele bayaki kolya mampa elongo na bokilo ya Moize, liboso ya Nzambe ya solo.+ 13  Mpe esalemaki boye: na mokolo oyo elandaki Moize afandaki lokola na momeseno mpo na kosambisa bato,+ mpe bato batɛlɛmaki liboso ya Moize banda ntɔngɔ tii mpokwa. 14  Mpe bokilo ya Moize amonaki makambo nyonso oyo azalaki kosala mpo na bato. Bongo alobaki ete: “Oyo mosala ya ndenge nini ozali kosalela bato? Mpo na nini yo moko kaka ozali kofanda mpe bato nyonso bazali kaka kotɛlɛma liboso na yo banda ntɔngɔ tii mpokwa?” 15  Bongo Moize alobaki na bokilo na ye ete: “Mpo bato bazali kaka koya epai na ngai mpo na kotuna Nzambe.+ 16  Soki likambo moko ebimi kati na bango,+ esengeli koya epai na ngai mpe nasengeli kosambisa bango, mpe nasengeli koyebisa bikateli ya Nzambe ya solo mpe mibeko na ye.”+ 17  Na yango bokilo ya Moize alobaki na ye ete: “Ndenge oyo ozali kosala ezali malamu te. 18  Okolɛmba mpenza, yo ná bato oyo bazali elongo na yo, mpamba te mosala oyo ezali mokumba monene oyo eleki yo.+ Okoki kosala yango yo moko te.+ 19  Sikoyo yoká mongongo na ngai.+ Nakopesa yo toli, mpe Nzambe akozala elongo na yo.+ Yo moko zalá momonisi ya bato liboso ya Nzambe ya solo,+ mpe yo moko osengeli komema makambo epai ya Nzambe ya solo.+ 20  Mpe osengeli kokebisa bango na ntina na malako mpe mibeko,+ mpe osengeli koyebisa bango nzela oyo basengeli kotambola mpe mosala oyo basengeli kosala.+ 21  Kasi yo moko osengeli kopona kati na bato nyonso mibali oyo bakoki,+ oyo babangaka Nzambe,+ mibali oyo babongi kotyelama motema,+ oyo bayinaka litomba oyo ezwami na ndenge ya mabe,+ mpe osengeli kotya bango bázala bakonzi na bango, bázala bakonzi ya bato nkóto nkóto,+ bakonzi ya bato nkama nkama, bakonzi ya bato ntuku mitano ntuku mitano mpe bakonzi ya bato zomi zomi.+ 22  Mpe basengeli kosambisa bato na ntango nyonso oyo ebongi; mpe ekosalema mpenza boye: likambo nyonso ya monene bakomemela yo yango,+ kasi bango moko bakosambisa likambo nyonso ya moke. Boye okoyeisa mokumba na yo pɛpɛlɛ, mpe bango bakomema yango elongo na yo.+ 23  Soki osali likambo oyo, mpe Nzambe apesi yo etinda, boye okokoka mpenza yango mpe, lisusu, bato oyo, bango nyonso, bakokóma na esika na bango na kimya.”+ 24  Na mbala moko Moize ayokaki mongongo ya bokilo na ye mpe asalaki makambo nyonso oyo alobaki.+ 25  Mpe Moize aponaki mibali oyo bakoki na kati ya Yisraele mobimba mpe apesaki bango bisika bázala bakonzi ya bato,+ bázala bakonzi ya bato nkóto nkóto, bakonzi ya bato nkama nkama, bakonzi ya bato ntuku mitano ntuku mitano mpe bakonzi ya bato zomi zomi. 26  Mpe basambisaki bato na ntango nyonso oyo ebongi. Likambo ya makasi bazalaki komemela yango Moize,+ kasi likambo nyonso ya moke bango moko bazalaki kosambisa yango. 27  Nsima na yango, Moize atikaki bokilo na ye akende,+ mpe asimbaki nzela akei na mokili na ye.

Maloba na nse